ایس ملک وچ ہُن کیہ محفوظ رہ گیا‘ سوانی دی عزت سر راہ محفوظ نہیں‘ ملک وچ بیروزگاری‘ مہنگائی ٹیسی اُتے:مولانا فضل الرحمان……٭رویل نیوز٭

اسلام آباد (نمایندا رویل) جمعیت علماء اسلام (ف) دے آگو مولانا فضل الرحمان نے کہیا اے کہ 20 ستمبر نُوں اے پی سی وچ سارے معاملات ڈسکس ہون گے‘ پیپلز پارٹی مجمان اے۔ ملک وچ بیروزگاری‘ مہنگائی ٹیسی اُتے تے رُپئے دی قدر وی ڈِگدی جا رہی اے۔ ہُن ملک وچ عام سوانی دی عزت وی محفوظ نہیں۔ موٹروے واقع دے ذمے داراں نُوں کیفر کردار تک پہنچایا جاوے‘ساڈے اداریاں دا فرض اے کہ ایس واقع نُوں سنجیدگی نال لین۔ جدوں تک سلیکٹڈ حکمران نیں اوس ویلے تک کسے دی عزت محفوظ نہیں۔ ایس ویلے فرقا واریت دی اگ بھڑک رہی اے۔ ریاست دی چُپ اپنے خُفیا کردار دی نشاندہی کر رہی اے۔ پی ٹی آئی والے بندے دے پُتر بن جان۔ سر عام پھانسی بارے حالے سوچیا نہیں‘ نواز شریف دور وچ سرعام پھانسی ہوئی سی کیہ جرایم رُک گئے سن؟۔ ایہناں خیالاں دا اظہار اوہناں نے ہفتے نُوں مسلم لیگ ق دے صدر شجاعت حسین نال اوہناں دی رہایشگاہا ُتے ملاقات دے بعد میڈیا نال گلبات کردیاں ہویاں کیتا۔ مولانا فضل الرحمان دی چودھری شجاعت دے گھر آمد ہوئی تے اوہناں دی خیریت پُچھی۔ دوہاں آگوواں وچ موجودا سیاسی صورتحال اُتے گلبات ہوئی۔ میڈیا نال گلبات کردیاں ہویاں مولانا فضل الرحمان دا کہنا سی کہ چودھری شجاعت دی عیادت لئی آیا آں‘ اللہ تعالیٰ چودھری شجاعت نُوں صحت عطاء فرمائے۔ اوہناں نے 20 ستمبر نُوں اے پی سی وچ سارے معاملات ڈسکس ہون گے۔ اے پی سی دی مجمان پیپلز پارٹی اے۔ اِک سوال اُتے اوہناں نے کہیا کہ ایس ملک وچ ہُن کیہ محفوظ رہ گیا‘ سوانی دی عزت سر راہ محفوظ نہیں‘ ملک وچ بیروزگاری‘ مہنگائی ٹیسی اُتے اے۔ رُپئے دی قدر وی ڈِگدی جا رہی اے۔ ہُن ملک وچ عام سوانی دی عزت وی محفوظ نہیں‘ ایس قسم دے واقعات دے بعد وی ریاست مدینہ دا ناں آندا اے‘ موٹروے واقع دے ذمے داراں نُوں کیفر کردار تک پہنچایا جاوے۔ ذمے دار ایہو جہیاں گلاں کر رہے نیں جہڑیاں پھٹاں اُتے لون سُٹن وانگوں نیں۔ ملک وچ نوجواناں دا کوئی مستقبل نہیں‘ سر بازار ناموس رسال‘ صحابہ دی شان اُتے حملے کیتے جا رہے نیں۔ ایہ مذہبی مسئلا نہیں ساڈے قانون وچ ایہ گل موجود اے۔ ایس ویلے فرقا واریت دی اگ بھڑک رہی اے۔ جدوں تک ٹھوس قسم دے فیصلے نہیں ہون گے‘ روایتی قرار داداں دی کوئی اہمیت نہیں۔ جے حکمران کسے نُوں سرعام پھانسی دینا چاہن تے اوہناں دے کول ایگزیکٹو اختیارات نیں‘ ماضی وچ انج ہو چکیا اے‘ نواز شریف دور وچ سر عام پھانسی ہوئی سی کیہ جرایم رُک گئے سن؟‘اصل مقصد ایہو جہے مجرماں نُوں گرفت وچ لیانا اے۔ پی ٹی آئی والے صرف اپنی ریفارمز کر لین۔ پی ٹی آئی والے بندے دے پُتر بن جان۔