امریکا قومانتری پدھر تے امن نہیں چاہندا:کرنل یوژیان ……٭رویل نیوز٭

بیجنگ (اُچیچا نمایندا) چین دی وزارت دفاع نے امریکی فوج نُوں جگت امن لئی سبھ توں وڈا خطرا متھ دِتا۔ عالمی خبر رساں ادارے دے مطابق 2 ستمبر نُوں امریکی محکما دفاع ولوں کانگریس وچ جمع کروائی گئی رپورٹ وچ چینی فوج نُوں امریکا دے قومی مفاد تے عالمی امن لئی خطرا متھ دِتا گیا سی۔ ایس رپورٹ اُتے رد عمل ظاہر کردیاں ہویاں چینی وزارت دفاع نے اپنے بیان وچ کہیا اے کہ امریکا ولوں حقایق نُوں مدھیا گیا اے تے ایہدے دفاعی استعداد دے مقاصد نُوں غلط رنگ دِتا گیا اے۔ رپورٹ وچ پیپلز لبریشن آرمی تے سوا ارب توں ودھ چینی لوکائی دے رشتیاں نُوں کمزور کرن دی کوشش وی کیتی گئی اے۔ چین دی وزارت دفاع دے ترجمان کرنل یوژیان نے کہیا کہ کئیگرزے برس ایس گل دا واضح ثبوت نیں کہ ایہ امریکا ای اے جہڑا علاقائی بے چینی تے عالمی سطح اُتے امن نُوں برباد کرن والا ملک اے۔ امریکا ولوں عراق‘ لیبیا‘ شام تے ہور ملکاں وچ دو دہاکیاں دے دوران کیتی گئی جارحیت دے نتیجے وچ 8 لکھ توں ودھ بندے ہلاک تے کروڑاں نقل مکانی اُتے مجبور ہوئے۔ کرنل یوژیان نے کہیا کہ اپنیاں غلطیاں دا اعتراف کرن دی بجائے امریکا نے اِک ناں نہاد رپورٹ جاری کیتی اے جہدے وچ چین دی معمول دی دفاعی ترقی دے بارے وچ جھوٹھے دعوے کیتے گئے نیں۔ امریکی وزارت دفاع دی 150 صفحیاں اُتے مبنی رپورٹ وچ چین دی عسکری قوت تے ایہدے مقاصد دا جایزا لیا گیا اے۔ خاص طور اُتے تائیوان بارے چین دی حکمت عملی دا باریک بینی نال تجزیا کیتا گیا اے۔ رپورٹ وچ چین دی عسکری قوت نُوں امریکی مفادات تے عالمی نظم عاما تے امن لئی خطرا متھیا گیا سی۔ رپورٹ وچ کہیا گیا اے کہ 20 لکھ اہلکاراں دے نال چین دے کول دنیا دی سبھ توں و ڈی فوج اے۔ 350 بحری بیڑیاں تے 293 آبدوزاں دے نال چین دی بحری قوت امریکا توں وی اگے ودھ چکی اے۔ ایہدے علاوا چین دے کول لمے فاصلے تک مار کرن والے بیلسٹک تے کروز میزائل دی وی سبھ توں وڈی کھیپ موجود اے۔