حمزہ شہباز  نوں  کوٹ لکھپت جیل توں فوری ہسپتال منتقل کیتا جاوے:ترجمان مسلم لیگ ن ……٭رویل نیوز٭

لاہور (نمایندا رویل) مسلم لیگ (ن) دے آگو تے پنجاب اسمبلی وچ قائد حزب ختلاف حمزہ شہباز دا کرونا ٹیسٹ مثبت آیا اے۔ تفصیلات مطابق حمزہ شہباز وچ کرونا وایرس دی تصدیق ہوئی اے‘ اوہناں دی طبیعت جیل وچ کجھ دن توں خراب سی۔ حمزہ شہباز دا کرونا ٹیسٹ مثبت آن دے بعد پاکستان مسلم لیگ (ن) دی ترجمان مریم اورنگزیب نے حمزہ شہباز نُوں علاج لئی فوری ہسپتال منتقل کرن دا مطالبا کردیاں ہویاں کہیا اے کہ حمزہ شہباز دا کرونا ٹیسٹ مثبت آیا اے تے اوہ پچھلے 3 دن توں شدید بخار وچ مبتلا نیں۔ وِگڑدی ہوئی صحت نُوں ویکھدیاں ہویاں اوہناں نُوں کوٹ لکھپت جیل توں فوری ہسپتال منتقل کیتا جاوے۔ ترجمان مسلم لیگ ن نے ہور کہیا کہ حمزہ شہباز دے علاج دی ساریاں قانونی ذمے داریاں پوریاں کیتیاں جان۔ علاج وچ سستی یاں لاپرواہی نال پنجاب اسمبلی وچ قائد حزب اختلاف دی صحت خطرے نال دوچار ہو سکدی اے۔ قوم تے پارٹی کارکناں توں حمزہ شہباز دی صحت لئی دُعا دی اپیل اے۔ حمزہ شہباز دے والد تے قائد حزب اختلاف شہباز شریف نے ٹویٹر اُتے جاری بیان وچ کہیا اے کہ میرے پُتر حمزہ نُوں جیل وچ کرونا ہو گیا اے‘ حمزہ شہباز نے مشرف دور وچ نیب مقدمیاں دا ڈٹ کے مقابلاکیتا‘ حمزہ شہباز نیب نیازی گٹھ جوڑ دے سیاسی انتقام دا جراتمندی تے ثابت قدمی نال ساہمنا کر رہیا اے‘ میری تہاڈے ساریاں توں درخاست اے کہ حمزہ دی چھیتی صحتیابی لئی خصوصی دُعا فرماؤ۔ جزاک اللہ خیر۔ دوجے پاسے جیل حکام دا کہنا اے کہ حمزہ شہباز دے ٹیسٹ بارے حالے تک رپورٹ موصول نہیں ہوئی‘ اوہناں دے ہور ٹیسٹ ہون گے۔ حمزہ دی حالت پہلے توں بہتر اے ایس لئی اوہناں نُوں جیل توں ہسپتال منتقل نہیں کیتا‘ اوہ اپنی بیرک وچ ای موجود نیں۔