موٹروے زیادتی کیس دی ذمے دار پی ٹی آئی حکومت  اے،کال کوٹھڑی وچ کرونا دے شکارقید حمزہ شہباز نُوں فوری طور اُتے صحت واسطے سہولتاں دتیاں جاون: احسن اقبال……٭رویل نیوز٭

لاہور (نمایندا رویل) مسلم لیگ ن دے آگو احسن اقبال نے موٹروے زیادتی کیس دی ذمے دار پی ٹی آئی حکومت اُتے پاندیاں ہویاں حکومت توں مستعفی ہون دا مطالبا کر دِتا‘ 20 ستمبر نُوں اپوزیشن حکومت خلاف سانجھا لائحے عمل بنائے گی‘ کرونا وچ مبتلا کال کوٹھڑی وچ قید حمزہ شہباز نُوں فوری طور اُتے طبی سہولتاں فراہم کیتیاں جان۔ ایتوار والے دن لاہور وچ میڈیا نال گلبات کردیاں ہویاں لیگی آگو احسن اقبالنے کہیا کہ موٹروے زیادتی کیس دے معاملے اُتے حکمراناں نُوں مستعفی ہونا چاہیدا اے‘ سی سی پی او نُوں وی فوری طور اُتے تبدیل کیتا جاوے‘ جویں عمران خان اناڑی سن اُنج ای عثمان بزدار نیں‘ مجرم نُوں سنگین توں سنگین سزا دین تے کیفر کردار تک پہنچان لئی اہلیت چاہیدی اے جہڑی ایہناں وچ نہیں اے‘ اسیں انتظامی تے قانونی طریقے نال دہشتگردی دا مقابلا کیتا‘ ملزماں دی نشاندہی دا سہرا پنجاب فرانزک لیب دے سر جاندا اے‘ ایس واقع اُتے حکومت نے کیہ کیتا‘ ایہ سبھ شہباز شریف دا کمال اے کہ اوہناں نے پنجاب وچ فرانزک لیب بنوائی‘ حکومت نے تے صرف میڈیا اُتے خبراں چلائیاں تے ایکشن کرن دی بجائے مجرم نُوں نَسا دِتا‘ کہڑے کہڑے واقع دا ذکر کراں‘ ہر دوجے دن اندوہناک واقع ہوندا اے تے حکومت چُپ تماشائی بنی ہوندی اے۔ اوہناں نے ہور کہیا کہ پی ٹی آئی حکومت دی صبح وی انتقام نال ہوندی اے تے شام وی۔ اِک سوال دے جواب وچ اوہناں نے کہیا کہ 20 ستمبر نُوں اپوزیشن حکومت خلاف سانجھا لائحے عمل بنائے گی‘ اے پی سی وچ حکومت دے خلاف نواں لائحے عمل بنایا جاوے گا جہدے وچ ساری اپوزیشن دی رائے شامل ہووے گی‘ اوہناں نے کہیا کہ کال کوٹھری وچ تنہا قید حمزہ شہباز کرونا دا شکار نیں‘ حکومت اوہناں نُوں طبی سہولتاں نہیں فراہم کر رہی‘ ساڈا مطالبا اے کہ اوہناں نُوں طبی سہولتاں فراہم کیتیاں جان۔