اوکھے پینڈے ، لمیاں راہواں عشق دیاں (4)ـــــــ٭رویل٭

اوکھے پینڈے ، لمیاں راہواں عشق دیاں (4(ـــــــ٭رویل٭

چلاس توں اگے دا سفر کوئی ایڈا چنگا تجربا نہیں سی ۔ گرمی نال برا حال تے باکے دیہاڑے سن ۔ اک تے اسیں اپنے ساتھیاں نالوں وچھڑ گئے ساں تے دوجے سیل فون دے سنگنل نہ ہون کر کے کسے نال رابطا وی نہیں ہو رہیا سی ۔ تیجے اسیں اس طرحاں دے خشک پہاڑاں دی توقع نہیں ساں کر رہے جس طرحاں دے پہاڑاں نال ساڈا واہ پیا سی ۔ رستے وچ نہ کوئی رکھ سی تے ای ہریالی ۔ سندھو سائیں دا پانی وی ریت تے پتھراں نال رلیا ملیا رنگ وٹا کے ویہ رہیا سی تے دوناں پاسے پہاڑاں وچ گھری ہوئی قراقرم ہائی وے تپدی پئی سی ۔ ڈھیر چر بعد ساڈا وچھڑے ہوئے قافلے نال رابطا ہویا شاید گونر فارم دے نیڑے تیرے جا کے اوہ اک اڈے تے رک گئے تے اسیں اوہنوں نوں جا ملے ۔ اوہناں دا حال وی ساڈے ورگا ای سی ۔ انجئنیر محمد بوٹا نیکر پہنی ہوئی سی تے باہواں ننگیاں ہون پاروں تھاں تھاں تے گرمی دے جھلسان دے نشان وکھا رہیا سی ۔ بولان وچ اے سی ناں دی کوئی سہولت نہیں سی ۔ ایدھر مہران وچ وی بس ناں دا اے سی سی ۔ سڑک ہن بہت حد تیک ٹھیک سی ۔ کدھرے رکھ وی نظریں آ رہے سن ۔ اگے جاکے رائے کوٹ پل تے نیڑے اک چشمے توں پانی پیندیاں کجھ لوکاں سانوں ہاک لا کے آکھیا پئی مہران لے کے اگے نہ جاؤ سمجھو اگے کندھ اے تے ایتھوں ای پچھے مڑ جاؤ پر اسیں رکن آلے کتھوں سی ۔ خشک تے مٹیالے پہاڑاں وچکار اک کیڈٹ کالج دی وڈی ساری عمارت ویکھ کے اک انملی خشی دا احساس ہویا پئی ایتھوں دے لوکاں نوں وی تعلیم حاصل کرن دے اعلا موقعے ملن گے ۔ ایہ جدید طرز دی لمی چوڑی عمارت سی جہڑی بلکل تیار حالت وچ سی تے بجلی ورگیاں سہولتاں وی موجود سن ۔ اگے جا کے جگلوٹ توں کوئی چودھاں پندرھاں کلو میٹر پہلے ای نانگا پربت ویو پوائنٹ سی جتھے اسیں جاندی واری نہ رکے تے استور ول نوں جاندی سڑک تے مڑ گئے ۔ سندھ دریا دے اتے نواں پل بنیا ہویا سی اساں اوہ پل کراس کیتا تے سوچیا پئی ہن اگلا رستا سدھا پدھرا تے سوکھا ہووے گا پر ساڈا ایہ خیال وی غلط ثابت ہویا تے رستے دے ہر موڑ تے اچیائی ، اترائی سانوں رب یاد کرا دتا ۔ دریا سندھ دا پاٹ چوڑا وی سی تے ڈونگھا وی تے پانی دا شور تے ایناں سی پئی کن شاں شاں کرن لگ پئے ۔ اتوں تنگ سڑک تے پہاڑ سراں تے انج جھکے ہوئے سن پئی لگدا سی کہ ہنے ڈگ پین گے ۔ جے کوئی ساہمنیوں کراسنگ ہوندی تے ساڈی مہران دریا ول بڑی اوکھی جیہی جا کھلوندی تے ساڈے ساہ ٹنگئی جاندے. اتوں پین لئی پانی وی مکیا ہویا سی تے ناشتا توں بعد کوئی کھان دا وی ویلا نہیں ملیا سی ۔ ہن ساڈا وس نہیں سی چلدا پئی پچھے مڑ جائیے کیوں جے اک تے رل ٹریاں دی لج ماردی سی تے دوجا واپسی دا رستہ وی اسیں ویکھ چکے ساں جیہڑا ایناں سوکھا نہیں سی ۔ استور بارے آن جان والے جس مقامی بندے کولوں وی پچھیا اوہنے بس ایہو ای آکھیا پئی تھوڑا جیہا پندھ باقی اے پر ایہ تھوڑا جیہا پندھ نہ مکن وچ آ رہیا سی ۔ اک پولیس چوکی تے جا کے شناخت کرائی تے اوہناں وی ایہو ای کیہا پئی بس تھوڑا ای پندھ رہ گیا اے ۔ پر پندھ فیر وی اونا ای رہیا ۔ بس ایہ شکر اے پئی اگے اک پہاڑی چشمے دا ٹھنڈا ٹھار پانی لبھ گیا تے کجھ جان وچ جان آ گئی ۔ تھوڑی دور اک آبادی لاگے محمد علی ڈرائیور اپنی بولان دے ٹائر نوں پنچر لگوایا تے اسیں وی ساہ لین واسطے رک گئے ۔ پچھوں اک جیپ آن رکی تے پتہ اودوں لگیا جدوں مخصوص پہاڑی ساز وجن دی آواج آون لگ پئی ۔ اس جیپ وچ گلگت دے مقامی نوجوان سن جیہناں اپنے نال ساز وی لیاندے ہوئے سن ۔ اک ڈھولک ورگا ساز سی جہیڑا اک بچہ اپنے گوڈھیاں وچکار لے کے وجا رہیا سی تے اک رباب تے سوہنیاں تے من بھاونیاں سراں بکھیر رہیا سی اک کولا جہیا منڈا نفیری وجا رہیا سی تے دو نوجوان راما رقص پیش کر رہے سن ۔ اس آبادی دے مقامی منڈے وی پل وچ ای سازاں دی واج تے کٹھے ہو گئے تے ویکھدے ای ویکھدے اک مجمع لگ گیا ۔ سازندے تے رقاص سارے پینٹ شرٹ پہنے ماڈرن منڈے سن جیہڑے سکولاں کالجاں دے سٹوڈنٹس جاپدے سن ۔ اوہناں دے ساز تے ناچ ساڈے پنجابی ناچ گانیاں توں وکھرے سی ۔ اوہ کدی گول گول پھیریاں لاندے تے جویں جویں ساز تیز ہوندے اوہناں دے پیراں تے پورے جُسے دی حرکت وی تیز ہو جاندی انج لگدا اوہناں نوں حال پئے گیا اے ۔ دریا سندھ دے کنارے پہاڑاں وچکار موسیقی تے رقص دا ایہ تال میل اک پر لطف نظارا سی ۔ ساڈے سنگتی کجھ چر تے تاڑیاں مار مار اوہناں نوں داد دیندے رہے پر اخیر اوہ وی میدان وچ اتر آئے تے پنجابی گھمر تے سمی ورگا رلواں ملواں رقص کرن لگ پئے ۔ ہن مقامی افراد ولوں تاڑیاں وچ ہور وی وادھا ہو گیا ۔ جویں راما رقص ساڈے لئی نواں سی انج ای ساڈا پنجابی ناچ اوہناں لئی نویکلا سی ۔ کجھ تماشائیاں ولوں پیسے وارن دا کم وی شروع ہو گیا تے محفل ہور وی بھخ پئی ۔ کجھ دیر بعد ساز بدلے تے کجھ مقامی بندیاں اپنی ابادی دے اک منڈے نوں کھچ دھروہ کے میدان وچ واڑ لیا تے اوہنے مور وانگ ہتھ پیر موڑ موڑ کے نچنا شروع کر دتا ۔ قاضی باقر وی اس وانگ رقص کر کے لوکاں نوں حیران کر چھڈیا ۔ انجینیر محمد بوٹا وی پچھے نہ رہیا تے ڈھول دی تھاپ تے پنجابیاں دی جھمر تے سمی دا واہوا سماں بجھ گیا ۔ ایہ وکھالا ایناں خوشگوار تے سوادی سی پئی سفر دے سارے دکھ بھل گئے تے اسیں ہشاش بشاش تے تازہ دم ہو گئے ۔ جاندی وار جیپ دے اسوار منڈیاں کھڑے متھے ساڈے ساریاں نال سلام دعا کیتی تے راما لیک تے جا کے ڈانس پارٹی دا سدا وی دتا ۔ سچی گل اے پئی اس ڈانس تے روایتی موسیقی دے نال سارے راہ دی اوکھت دا ازالہ ہو گیا تے انج لگیا پئی ساڈا پندھ پورا ہو گیا اے ۔

( چلدا)