گورنمنٹ ڈگری کالج ڈسکہ وچ انعام تے سنداں ونڈن دی بیٹھک،اُچیچے پروہنیاں ولوں پنجاب دی ونڈ روکن تے مڈھلی پدھر تے پنجابی لاگو کرن دی منگ -----٭رویل نیوز٭

نمائندا رویل September 27, 2020

ڈسکہ (اکبر علی غازی توں ) اج 27 ستمبر 2020 ءنوں گورنمنٹ ڈگری کالج ڈسکہ وچ دنے ساڈے دس وجے بھیل ادبی سنگت ننکانہ صاحب ولوں تاج پوشی, سنداں تے ایوارڈ ونڈن دی بیٹھک ہوئی, جہدے وچ منڈی بہاؤالدین, گجرات, گوجرانوالہ, حافظ آباد, فیصل آباد, شیخوپورہ, لاہور, نارووال تے سیالکوٹ دے محققاں, نقاداں تے شاعراں نے رلت کیتی. بھیل ادبی سنگت انٹرنیشنل ننکانہ صاحب دے صدر تے بانی زاہد اقبال بھیل دی موجودگی وچ پروفیسر اکبر علی غازی نے نقابت دا فرض ادا کیتا. تلاوت کلام پاک دی سعادت محمد حسنین بھٹی لاہور تے نعت رسول مقبول صل اللہ علیہ والہ و سلم دی سعادت سائیں شہباز دانش نارووال دے حصے وچ آئی . وڈے وڈے علمی تے ادبی لوکاں دے ڈسکہ وچ آن دا دلوں شکریا ادا کرن توں بعد پروفیسر تفاخر محمود گوندل, پروفیسر سید افتخار شاہ, محمد عمر ندیم تے حکیم گل شیر احمد گل دی گل بات دے نال نال ایوارڈ ونڈن دی تقریب جاری رہی. سبھ توں پہلاں ڈاکٹر حفیظ احمد, ڈاکٹر احسان اللہ طاہر,پروفیسر تفاخر محمود گوندل, سائیں احسان باجوہ, محمد عمر ندیم, محمد نواز چیمہ تے رانا توقیر سرور ہوراں دی دستار بندی کیتی گئی. ایس توں بعد ایوارڈ ونڈن دا کم شروع ہویا. اتفاق نال پہلی شیلڈ پروفیسر اکبر علی غازی دی نکلی جہڑی کہ زاہد اقبال بھیل ہوراں راقم نوں دان کیتی. ایس توں بعد درج ذیل قلمکاراں نوں اوہناں دیاں کتاباں تے علمی ادبی خدمتاں اُتے ایوارڈ پیش کیتے گئے. آزاد حسین آزاد گجراتی مرحوم تے اعظم کامران سوہدروی دا ایوارڈ غازی ہوراں نے وصول کیتا جدوں کہ ڈاکٹر عادل صدیقی مرحوم تے محمد اقبال نجمی ہوراں دا ایوارڈ ڈاکٹر احسان اللہ طاہر نے وصولیا.

محمد عمر ندیم,شریف فیاض وزیر آبادی, محمد نذیر اختر نوشاہی( اوہناں دے بھانجے آئے سن) ,صائم کرنالی( آوہناں دے بھتیجے نے وصولیا), عروس فاروقی, مورس نواب بھٹی,سائیں شہباز دانش, پروفیسر تفاخر محمود گوندل,عاشق علی عاشق ,حکیم گل شیر احمد گل ,رانا توقیر سرور, فیصل مشتاق, ڈاکٹر طارق محمود آکاش,تنظیم الفانوس دے شہباز سحر, سائیں احسان باجوہ, ڈاکٹر احسان الله طاہر,ڈاکٹر حفیظ احمد,شبیر بلو صراف, سائیں اکبر وسیم قادری, وقاص مجددی ممتاز احمد(ڈاکٹر طارق محمود آکاش نے وصولیا) تے راکی ولسن ساگر, شیلڈاں توں بعد حافظہ شبانہ کوثر ساہی, فرانسس سائل , محمد حسنین بھٹی,رحمان امجد مراد,عبدالمجید صابری, امین شاد ٹھروہی, افتخار شاہد, ڈاکٹر اے جی خان تے بھٹی نوں سند امتیاز پیش کیتی گئی.

پروگرام دے دوجے حصے وچ ڈاکٹر اے جی خان, محمد حسنین بھٹی, سائیں احسان باجوہ, پروفیسر اکبر علی غازی, چوہدری محمد انور کمبوہ تے کجھ ہور سجناں نے پنجابی زبان دی ضرورت تے اہمیت بیان کرن توں اڈ مڈھلی پدھر اُتے پنجابی نوں تعلیمی زبان بنان تے ایہدی لگوتی دی منگ کیتی تے پنجاب حکومت دے اوس فیصلے اُتے سخت غم تے غصے دا اظہار کیتا جہدے تحت اوہنے پنجاب واسیاں دیاں اُمنگاں تے سدھراں دے خلاف اردو نوں ٹنگی رکھن دا غاصبانا فیصلا کیتا اے. سائیں احسان ہوراں دسیا جے پنجاب وچ خواندگی دی شرح حقیقی طور تے سوفیصد تاں ای کیتی جا سکدی اے جے بالاں نوں ماں بولی وچ پڑھن دا موقع دتا جائے. غیر مادری زبان وچ پڑھن لئی مجبور کرنا بذات خد اک عالمی جرم اے. اکبر علی غازی نے آکھیا پئی کسے جھوٹھے سروے دی بنیاد اُتے کروڑاں بالاں اُتے جبر غیر قانونی تے مجرمانا فعل اے. حکومت ایس غیر حقیقی فیصلے نوں واپس لوَے تے پنجابی بالاں نوں اپنی مادری زبان وچ تعلیم دا حق دیوَے. بیٹھک دے آخر اُتے اک ریلی وی گڈی گئی جہدی قیادت ڈاکٹر احسان اللہ طاہر تے سائیں احسان باجوہ ہوراں کیتی. ایہدے وچ پنجاب دی ونڈ روکن تے مڈھلی پدھر تے پنجابی لاگو کرن دی منگ کیتی گئی. ایہدی میڈیا کوریج محمد حسنین بھٹی نےکیتی. ایس توں بعد شبیر بلو سنیارے ہوراں رَلتیاں نوں ان پانی پیش کیتا.