ووٹ نوں عزت دیو ہر پاکستانی دا نعرا بن گیا اے:مریم نواز۔۔۔٭رویل نیوز٭

شیخوپورا (نمایندا رویل) پاکستان مسلم لیگ ن دی مرکزی سینئر نائب صدر مریم نواز نے کہیا اے کہ سلیکٹڈ سرکار دے جان دا ویلا ہو گیا اے‘ جمہوریت دی اُچیرتا تے ووٹ نُوں عزت دو دا نعرا ہُن 22 کروڑ لوکائی دا نعرا بن چُکیا اے‘ 16 اکتوبر نُوں گوجرانوالا دا جلسا پی ڈی ایم آگوواں دی خصوصی رلت نال تواریخ ساز بن جاوے گا‘ پی ڈی ایم وچ انتشار کھلارن دیاں گلاں کرن والے احمقاں دی جنت وچ رہندے نیں۔ ایہناں خیالاں دا اظہار مرکزی نائب صدر پاکستان مسلم لیگ ن مریم نواز نے مانا نوالا توں ن لیگ دے گوجرانوالا جلسے دے حوالے توں آئے وفد جہدے وچ سردار محمد عرفان ڈوگر ایم این اے‘ چودھری محمود الحق ایم پی اے‘ میاں عبدالرؤف ایم پی اے نال ملاقات دے دوران کیتا۔ اوہناں نے کہیا کہ سلیکٹڈ سرکار ریاستی اداریاں دے پچھے لُکن دی کوشش کر رہی اے‘ حکومت دے سارے ہوچھے ہتھکنڈیاں دے باوجود گوجرانوالا 16 اکتوبر دا جلسا تواریخ ساز جلسا ہووے گا جہدے وچ پی ڈی ایم دے آگو وی خطاب کرن گے‘ سلیکٹڈ سرکار نُوں اپنے دوالے بیٹھے چور نظر نہیں آ رہے نیں‘ صرف اپوزیشن نُوں انتقامی سیاست دا نشانا بنان لئی سارے حربے ورتے جا رہے نیں پر ن لیگ تے ہور اتحادی جماعتاں دے کارکناں دے حوصلے اُچے نیں‘ حکومت دے غبارے توں ہوا نکل چکی اے‘ ہُن حقیقی جمہوریت دی اُچیرتا تے ووٹ نُوں عزت دو دا نعرا 22 کروڑ لوکائی دا نعرا بن چُکیا اے‘ نالایق سرکار توں نجات دا ویلا ہو گیا اے۔ اوہناں نے کہیا کہ اپنے متھے کمیشن وچ کھنڈ چور ثابت ہون والے جہانگیر ترین نوں جہاز وچ بٹھا کے بیرون ملک روانا کر دِتا تے لوکائی دیاں اکھاں وچ مٹی پان لئی خسرو بختیار دی وزارت بدل دِتی گئی‘ سلیکٹڈ سرکار دے اپنے میڈیکل بورڈ دیاں رپورٹاں اُتے میاں نواز شریف بیرون ملک علاج لئی گئے پر ہُن حکومت میاں نواز شریف دی بیمای دے پچھے لُک کے اپنیاں ناکامیاں نُوں لُکان دی کوشش کر رہی اے۔ نوی پاکستان وچ احتساب دے ناں اُتے صرف اپوزیشن نُوں شکار بنایا جا رہیا اے۔ مریم نواز نے گوجروانال جلسے وچ کارکناں دی ودھ توں ودھ رلت دے حوال توں وی ہدایتاں دِتیاں جہدے اُتے وفد وچ شامل ن لیگ دے ممبران اسمبلی نے جلسے وچ بھرویں رلت دے عزم دا اظہار کیتا۔