جہدا جین مرن پاکستان نال اے اوہنوں وی غداراں وچ شامل کر لیا:راجا فاروق حیدر خان۔۔۔٭رویل نیوز٭

مظفر آباد (نیوز ڈیسک) وزیراعظم ازاد کشمیر راجا فارو ق حیدر خان نے کہیا اے کہ ایس توں وڈی بدقسمتی تے بدبختی ہور کیہ ہو سکدی اے کہ جہدا جینا مرنا پاکستان دے نال اے اوہنوں وی غداراں وچ شامل کر لیا گیا‘ وزیراعظم نہ ہوندا تے بطور مسلم لیگی آگو سبھ توں پہلے جا کے گرفتاری دیندا‘ تفتیش لئی سدیا گیا تے سرکاری گڈی وچ ہتھکڑیاں پا کے جاواں گا‘ ساڈا مستقبل تے قبلہ پاکستان اے‘ پاکستان نال جُڑت ہور مضبوط ہووے گی‘ عزم کمزور نہیں ہووے گا‘ خاہش اے کہ سری نگر وچ پاکستان دا جھنڈا لہراواں۔ وزیراعظم ازاد کشمیر راجا فاروق حیدر دا بغاوت دے مقدمے دے بعد اپنے اِک انٹرویو وچ کہنا سی کہ ایف آئی آر درج ہون د ا پتا لگن اُتے بُہت دُکھ ہویا‘ پی ڈی ایم دے تِن چوتھائی آگو مودی دے ایجنٹ نیں تے پاکستان دے وجود اُتے سوال اُٹھدا اے‘ میں کسے نُوں نہیں کہیا نہ کہواں گا کہ میرا ناں ایف آئی آر توں کڈھو۔ وزیراعظم ازاد کشمیر دا کہنا سی کہ ایس توں وڈی بدقسمتی تے بدبختی ہور کیہ ہو سکدی اے کہ جہدا جینا مرنا پاکستان دے نال اے اوہنوں وی غداراں وچ شامل کر لیا گیا۔راجا فاروق حیدر دا کہنا سی کہ ایف آئی آر وچ شامل دفعات کیہ کوئی عام بندا درج کروا سکدا اے؟ ایہناں نُوں تے اینی توفیق وی نہیں ہوئی کہ ٹیلی فون کر کے معذرت کر لیندے‘ پاکستان دا وزیراعظم جہڑا وی ہووے ساڈے لئی احترام جوگ اے‘ جدوں وزیراعظم کہوے اپوزیشن دے پچھے مودی اے تے ایہو جہی ایف آئی آر درج ہوندی اے‘ ایف آئی آر اخلاقی دیوالیا پن تے ملک دشمنی دا سبھ توں وڈا ثبوت اے۔ اِک سوال دے جواب وچ راجا فاروق حیدر دا کہنا سی کہ پیکا سنے مسلم لیگ ن دی حکومت وچ بنے کئی قوانین درست نہیں نیں‘ ایتھے مادرِ ملت نُوں غدار کہیا گیا‘ ایہو جہیاں مضحکا خیز شیواں ملک نُوں کمزور کردیاں نیں‘ پریشانی ایہ اے میں انڈین ایجنٹ آں تے بطور کشمیری میرا مستقبل کیہ اے؟ اے پی سی وچ صرف پاکستان نُوں آئین دے مطابق چلان دی گل ہوئی‘ وزیراعظم نہ ہوندا تے بطور مسلم لیگی آگو سبھ توں پہلے جا کے گرفتاری دیندا۔ پی ڈی ایم دی احتجاجی تحریک وچ رلت دے حوالے توں راجا فاروق حیدر دا کہنا سی کہ حالے احتجاجی تحریک وچ براہ راست رلت دا فیصلا نہیں کیتا۔ راجا فاروق حیدر نے کہیا کہ 5 اگست دے اقدام دے بعد کشمیریاں دیاں توقعات دے مطابق پاکستان سرکار نے اقدامات نہیں کیتے‘ بھارت پونے 17 لکھ لوکاں نُوں مقبوضا کشمیر وچ ڈومیسائل دے چُکیا اے۔