ملک وچ آئین تے قانون دی اُچیرتا لئی لازوال قربانیاں دِتیاں نیں:وزیراعظم عمران خان۔۔۔٭رویل نیوز٭

اسلام آباد (نیوز ڈیسک) وزیراعظم عمران خان نے اِک واری فیر دو ٹوک لفظاں وچ کہیا اے کہ اپوزیشن دی احتجاجی تحریک توں کوئی خوف نہیں‘ حکومت ہر صورت اپنی مدت پوری کرے گی‘ احتجاج اپوزیشن دا آئینی حق اے‘ تحریک انصاف دے کول اج وی سٹریٹ پاور اے‘ میرے توں چنگا لوکاں نُوں اکٹھا کرن دا فن کوئی نہیں جاندا۔ جمعرات والے دن وزیراعظم نال مشیر پارلیمانی امور بابر اعوان نے ایتھے وزیراعظم ہاؤس وچ ملاقات کیتی۔ دوہاں آگوواں دے وچکار اج جمعے توں شروع ہون والے سینیٹ تے قومی اسمبلی دے اجلاس دے ایجنڈے سنے ملک دی مجموعی سیاسی صورتحال اُتے وچار وٹاندرا کیتا گیا‘ مشیر پارلیمانی امور بابر اعوان نے وزیراعظم نُوں مختلف آئینی تے قانونی امور اُتے اعتماد وچ لیا۔ وزیراعظم نے بابر اعوان نُوں عوامی مفاد دی قانون سازی نُوں ترجیح دین دی ہدایت کیتی۔ وسیلیاں نے دَسیا کہ ملاقات دے دوران پچھلے دن سپریم کورٹ ولوں وزیراعظم نُوں گھلے جان والے نوٹس دا معاملاوی بحث ہیٹھ آیا تے بابر اعوان نے آئینی تے قانونی نقات اُتے تفصیلی بریفنگ دِتی۔ وزیراعظم عمران خان نے کہیا کہ ساڈی حکومت عدلیا دا احترام کردی اے‘ ملک وچ آئین تے قانون دی اُچیرتا لئی لازوال قربانیاں دِتیاں نیں‘ ملک آئین تے قانون دی اُچیرتا دے بغیر اگے نہیں ودھ سکدا۔ اوہناں نے کہیا کہ اپوزیشن دی احتجاجی تحریک توں خوف نہیں اے‘ اپوزیشن دے کول سٹریٹ پاور نہیں اے‘ لوک اج وی تحریک انصاف ولو یکھ رہے نیں‘ میرے توں بہتر لوکاں نُوں اکٹھا کرن دا فن کوئی نہیں جاند ا اے‘ عمران خان نے کہیا کہ احتجاج اپوزیشن دا حق اے پر حکومت ہر صورت اپنی مدت پوری کرے گی۔ اپوزیشن دا ایجنڈا عوامی مسئلیاں دے حل دی اواز چُکنا نہیں حکومت ڈگانا اے۔ ریاستی اداریاں نُوں نشانا بنا کے اپوزیشن کہڑے مقاصد حاصل کرنا چاہندی اے۔ اپوزیشن دا ڈَٹ کے مقابلا کراں گا۔ وزیراعظم نے کہیا کہ مہنگائی دا احساس اے‘ مہنگائی مافیا جنا وی طاقتور ہووے اوہناں دے خلاف کارروائی ہووے گی۔ ایس توں وکھ وزیراعظم دی صدارت ہیٹھ قومی رابطا کمیٹی برائے ہاؤسنگ‘ کنسٹرکشن تے ڈیویلپمنٹ دا ہفتا وار اجلاس ہویا۔ اجلاس نُوں چیئرمین ایف بی آر نے آن لاین رجسٹریشن سسٹم تے اگاہی سیمینار دے حوالے توں بریفنگ دِتی۔ اجلاس نُوں دَسیا گیا کہ کراچی‘ لاہور تے اسلام آباد وچ اگاہی سیمینار منعقد کیتے جا چکے نیں۔ کنسٹرکشن شعبے نال جڑے 112 بندے تے کمپنیاں ایف بی آر دے نال رجسٹر ہو چکے نیں تے 123 منصوبیاں اُتے کم کر ن گے۔