لوکائی نُوں کیہ ریلیف دِتا‘ وزیراعظم اج تک لوکائی دی گل نہیں کر سکیا:شاہدخاقان عباسی۔۔۔٭رویل نیوز٭

اسلام آباد (بیورو رپورٹ) مسلم لیگ ن دے سینئر نائب صدر تے پچھلے وزیراعظم شاہدخاقان عباسی نے کہیا اے کہ کنٹینر تے رکاوٹاں کم نہیں آن گیاں‘ اج جمہوریت دی فتح ہووے گی‘ گوجرانوالا جان والی ہر سڑک اُتے رکاوٹاں کھڑیاں کر دِتیاں گئیاں نیں‘ جلسے وچ کئی لکھ لوک ہون گے‘ حکومت نے مجبور ہو کے اج سویرے 5 وجے جلسے دی اجازت دِتی‘ معاشی بدحالی‘ آٹا‘ کھنڈ مہنگے ہو چکے نیں‘ حکومت ناکام ہو چکی اے۔ ایہناں خیالاں دا اظہار اوہناں نے میڈیا نال گلبات کردیاں ہویاں کیتا۔ اوہناں دا کہنا سی کہ گوجرانولا جان والی ہر سڑک اُتے رکاوٹاں کھڑیاں کر دِتیاں گئیاں نیں۔ کنٹینر تے رکاوٹاں کم نہیں آن گیاں‘ اج انشاء اللہ جمہوریت دی فتح ہووے گی۔ اِک پاسے لوکائی مشکل و چ اے‘ معیشت تباہ ہو چکی ا ے پر وزیراعظم‘ وزیر سوائے اپوزیشن نُوں دھمکیاں دین تے ہر قسم دے جھوٹھے الزامات لا رہے نیں‘ ملک وچ کسے وی پریشانی دا ذکر نہیں کردے‘ کوئی وزیر نہیں دَسدا کہ اوہدے محکمے نے لوکائی نُوں کیہ ریلیف دِتا‘ وزیراعظم اج تک لوکائی دی گل نہیں کر سکیا‘ ملک دے اندر آٹا‘ کھنڈ کیوں مہنگی اے‘ بجلی گیس دے بل کیوں ودھ گئے نیں۔ وزیراعظم نُوں پتا نہیں کہ غریب بندا سبھ توں پہلے بجلی‘ گیس دے بل ادا کردا اے فیر اپنے بچیا دی روٹی لیندا اے۔ اوہناں نے کہیا کہ اسیں ہمیشا پارلیمان دا احترام کیتا‘ 3 ہفتے پہلاں 16 تاریخ نُوں گوجرانوالا دے جلسے د اعلان کیتا گیا‘ سپیکر نے کل قومی اسمبلی دا ساڈھے 4 وجے اجلاس بلا لیا اے‘ ایسے رویے کارن ملک نہیں چل رہیا‘ ایہ لوک پارلیمان نُوں مفلوج کرنا چاہندے نیں‘ جمعے والے دن اجلاس صبح 10 وجے ہوندا اے‘ پر ایتھے شام نُوں رکھیا گیا‘ 4 دن لئی اجلاس بلایا گیا اے۔ سینیٹ دا اجلاس وی بلا لیا گیا اے۔ سپیکر دوہاں پاسے توازن قایم کردا اے‘ پر سپیکر وی اِک جماعت دا فریق بن چُکیا اے۔ اوہناں نے کہیا کہ اپوزیشن نُوں گرفتاریاں توں کوئی فرق نہیں پیندا‘ گرفتاریاں کرنا حکومت دی بزدلی‘ شکست دا ثبوت اے‘ نیب دے چیئرمین نُوں شرم آنی چاہیدی اے‘ سانوں پتا نہیں کیوں وارنٹ جاری کیتے گئے؟ سپریم کورٹ وی ایہو کہندی اے کہ نیب پولیٹیکل انجینئرنگ کر رہیا اے‘ جدوں وی جلسا ہوندا اے وارنٹ جاری کر دِتے جاندے نیں۔ استاد‘ ڈاکٹر ‘ تاجر سبھ احتجاج کر رہے نیں‘ سارا ملک پریشان اے‘ لوکائی نُوں موقع دینا پوے گا کہ اوہ حقیقی نمایندیاں لئی ووٹ دا استعمال کرن۔ شاہد خاقان عباسی نے کہیا کہ کل ڈیمو کریٹک موومنٹ دا پہلا جلسا ہو رہیا اے‘ انتظامیا نے رکاوٹاں پان دی کوشش کیتی پر ناکام ہوئی‘ اج لوکائی غربت دی چکی وچ پِس رہی اے‘ حکومت دی نا اہلی تے کرپشن دی وجھا توں اج ملکی معیشت تباہ ہو چکی اے‘ ایہ لوکائی دے مسئلے حل کرن لئی سنجیدا نہیں نیں‘ ساڈی تحریک ایس لئی اے کہ ملک وچ حقیقی جمہوریت قایم ہووے‘ اج اسیں ایہناں نُوں کہندے آں جواب دین کہ ایہناں نے لوکائی لئی کیہ کیتا‘ جہڑی کرپشن اج ہو رہی اے اوہ پچھلے 73 سال وچ نہیں ہوئی‘ حکومت دے دوالے گھیرا لوکائی نے ہُن تنگ کر دِتا اے۔ وزیراعظم آپ کَہ رہیا اے کہ فوج تے ایجنسیاں وزیراعظم اُتے نظر رکھدیاں نیں‘ عمران خان دے ایس بیان نال نواز شریف دے بیان نُوں تقویت ملدی اے‘ اج پورا ملک پریشان اے‘ لیڈیز ہیلتھ ورکر وی دھرنا دِتا ہویا اے‘ سوسائٹی دا ہر بندا پریشان اے‘ لوکائی بجلی دا بل دیوے یاں دو ویلے دی روٹی کھائے‘ پی ڈی ایم لوکائی دے نال کھلوتی اے‘ ملک گیر وڈے جلسے کراں گے‘ کل دے جلسے وچ لوکائی دی وڈی گنتی رلت کرے گی۔