شہرت گلاں نال نہیں ملدی،کم نال انصاف وچ ای عزت تے کامیابی اے: مریم نور۔۔۔٭رویل نیوز٭

خالق نگر (نمایندا رویل) معروف اداکارا مریم نور نے کہیا اے کہ اپنے کم نال انصاف وچ ای عزت تے کامیابی اے‘ شہرت گلاں کرن نال نہیں کم کرن نال ملدی اے۔ مریم نور دا کہنا اے کہ اپنے کیریئر دے اغاز توں ہمیشا سکھن دی ای کوشش کیتی اے تے ایہدے وچ کدی عار محسوس نہیں کیتی۔ اوہناں نے کہیا کہ اِک فنکار دی ہمیشا ایہ کوشش ہوندی اے کہ اوہ اپنی زندگی وچ ایہو جہیا کردار ادا کر جاوے جہنوں لوک مدتاں یاد رکھن۔ مریم نور نے کہیا کہ ایہو جہے کئی چہرے نیں جہڑے سینئرز دی عزت نہ کرن دی وجھا توں ناکام ہو گئے۔ اوہناں نے کہیا کہ دوجیاں اُتے تنقید کرنا سبھ توں سوکھا اے پر اپنے آپ نُوں منوانا سبھ توں مشکل کم اے۔ عزت تے کامیابی اوہنوں ملدی اے جہڑے اپنے کم دے نال انصاف کردے نیں۔