ساڈی اصل اپوزیشن مہنگائی اے،آٹے  تے کھنڈ دیاں قیمتاں کیوں نہیں کنٹرول  نہ ہو سکیاں :وزیراعظم عمران خان۔۔۔٭رویل نیوز٭

اسلام آباد (نیوز ڈیسک) وزیراعظم عمران خان نے وفاقی کابینا دے اجلاس دے دوران آٹے تے کھنڈ دیاں قیمتاں کنٹرول نہ ہون اُتے برہمی دا اظہار کردیاں ہویاں رپورٹ منگ لئی جد کہ وزراء نُوں ہدایت کیتی کہ مہنگائی دے خاتمے نُوں ای اپنا پہلا مشن بناؤ۔ وزیراعظم عمران خان دی صدارت ہیٹھ ہون والے وفاقی کابینا دے اجلاس دے دوران کھل کے ملک وچ جاری مہنگائی خاص طور اُتے آٹے تے کھنڈ دیاں ودھدیاں قیمتاں بحث ہیٹھ آئیاں۔ وسیلیاں مطابق اجلاس دے دوران وزیراعظم عمران خان نے آٹا تے کھنڈ دیاں قیمتاں گھٹ نہ ہون اُتے برہمی دا اظہار کیتا تے سوال کیتا کہ کھنڈ دا سٹاک وادھو ماترا وچ موجود ہون دیاں رپورٹاں دے باوجود قیمت گھٹ کیوں نہیں ہوئی؟۔ وزیراعظم عمران خان نے مہنگائی دے خاتمے لئی سارے سرکاری محکمیاں نُوں اپنا اِن پُٹ دین دی ہدایت کردیاں ہویاں کہیا کہ وزراء مہنگائی دے خاتمے نُوں ای اپنا پہلا مشن بناؤ‘ غفلت ورتن والیاں دی نشاندہی کرو۔ وسیلیاں مطابق وزیراعظم تے وزیراں نے اتفاق کیتا کہ ساڈی اصل اپوزیشن مہنگائی اے‘ جد کہ وزراء دی اکثریت نے لوڑی دیاں شیواں مہنگیاں ہون اُتے تحفظات تے تشویش توں اگاہ کیتا۔ اجلاس دوران وزیراعظم دے معاون خصوصی ندیم افضل چن نے تجویز پیش کیتی کہ کنک تے کھنڈ سستی ہو سکدی اے‘ متعلقا حکام میرے نال بَہ جان۔ ندیم افضل چن نے ایہ وی کہیا کہ ویکھدا آں کہ کنک تے کھنڈ کویں سستی نہیں ہوندی۔ وفاقی کابینا دے اجلاس دے دوران اپوزیشن ولوں غیر سیاسی سوانیاں نوں تنقید دا ہدف بنان اُتے کابینا وچ بحث ہوئی۔ کابینا اجلاس وچ اتفاق کیتا گیا کہ مشرقی تہذیب وچ وی سوانیاں دے بارے وچ شائستگی نُوں برقرار رکھیا جاندا اے۔ وزیراعظم عمران خان نے کابینا اراکین نُوں سیاسی سوانیاں دے حوال توں وی محتاط انداز اپنان دی ہدایت کیتی۔ ایس توں وکھ کابینا اجلاس وچ گن اینڈ کنٹری کلب اسلام آباد دی عارضی مینجمنٹ کمیٹی دی منظوری سنے اقتصادی رابطا کمیٹی دے 14 تے 15 اکتوبر 2020 دے اجلاساں وچ کیتے گئے فیصلیاں دی توثیق کر دِتی گئی۔ کابینا کمیٹی برائے ادار جاتی اصلاحات 7 اکتوبر 2020 دے اجلاس وچ لئے گئے فیصلیاں دی توثیق وی کر دِتی گئی‘ کابینا نے سندھ انفراسٹرکچر ڈویلپمنٹ (لمیٹڈ) نُوں وزارتِ منصوبا بندی‘ ڈویلپمنٹ تے خصوصی اقدامات دے تحت رکھن دی تجویز دی منظوری دِتی‘ کابینا نے سندھ انفراسٹرکچر ڈویلپمنٹ کمپنی دے چیف ایگزیکٹیو دے عہدے دے وادھو چارج دی مدت وچ وادھے دی منظوری وی دے دِتی۔ کابینا نے 98 نویں اوور سیز ایمپلائمنٹ پروموٹر لائسنس دے اجرا 18 لائسنس واپس لین‘ 10 دے ٹرانسفر جد کہ 5 لائسنساں دے دایرا کار وچ تبدیلی دی تجویز دی منظوری دے دِتی‘ کابینا کمیٹی برائے قانون سازی دے 19 اکتوبر 2020 دے اجلاس وچ لئے گئے فیصلیاں دی وی توثیق کیتی گئی۔ کابینا کمیٹی برائے توانائی د 15 اکتوبر 2020 دے اجلاس وچ فرنس آئل دی طلب نُوں پورا کرن دے حوالے توں لئے گئے فیصلے دی توثیق کیتی گئی۔ وزیراعظم عمران خان نے کہیا اے کہ مہنگائی دی اصل وجھا ذخیر اندوزی اے۔ ذخیرا اندوزی اُتے قابو پا لیا تے مہنگائی دی صورت وچ واضح بہتری نظر آئے گی۔ ایس توں وکھ منگل والے دن وزیراعظم دی صدارت ہیٹھ مہنگائی کنٹرول کرن بارے اجلاس ہویا۔ اجلاس وچ ذخیرا اندوزی دی حوصلا شکنی لئی ٹائیگر فورس نُوں پہلا ٹاسک دے دِتا گیا۔ اجلاس وچ پائلٹ پراجیکٹ اسلام آباد توں شروع کرن دا فیصلا کیتا گیا جہد تحت ابتدائی طور اُتے اسلام آباد دیاں ہزار دُکاناں دی مانیٹرنگ ہووے گی۔ ٹائیگر فورس کمشنر اسلام آباد تے ڈپٹی کمشنر دے نال رَل کے نشاندہی کرن گے۔ شہر دیاں ساریاں دُکاناں اُتے ریٹ لسٹ تے اوور چارجنگ دی مانیٹرنگ ہووے گی۔ ٹائیگر فورس لوڑ توں ودھ سٹاک یاں ذخیر ا اندوزی دی فوری نشاندہی کرے گی۔ اجلاس وچ ہور کہیا گیا کہ ٹائیگر فورس دی نشاندہی اُتے ضلعی انتظامیا فوری کارروائی کرے گی۔ کارروائیاں دی رپورٹ براہ راست وزیراعظم نُوں پیش کیتی جاوے گی۔ ریٹ لسٹ نہ لان یاں اوور چارجنگ دی صورت وچ بھاری جرمانے ہون گے۔ اجلاس دوران وزیراعظم عمران خان نے کہیا کہ مسئلے دی اصل وجھا ذخیرا اندوزی اے‘ انتظامیا ذخیرا اندوزی وچ ملوث عناصر خلاف سخت ایکشن لوے۔