عمران خان دے وزراء وار وار قومی اداریاں دے پچھے لُک رہے نیں:احسن اقبال ۔۔۔٭رویل نیوز٭

اسلام آباد (نیوز ڈیسک) پچھلے وزیراعظم شاہد خاقان عباسی تے پچھلے وزیر داخلا احسن اقبال نے کہیا اے کہ گرفتاریاں دا سیز ن ٹو شروع ہون والا اے‘ اسیں گرفتاریاں دے سیزن ٹو لئی وی تیار آں‘ عمران خان دی نالایقی اُتے قومی اداریاں دا وقار قربان ہو رہیا اے‘ عمران خان دے وزراء وار وار قومی اداریاں دے پچھے لُک رہے نیں۔ ایہناں خیالاں دا اظہار ایہناں نے احتساب عدالت اسلام آباد دے باہر میڈیا نال گلبات دوران کیتا۔ احسن اقبال نے کہیا کہ موجودا حکومت کدی عدلیا تے کدی ہتھیار بند فوجاں نُوں ساہمنے کردی اے‘ حکومت اپنی ناکامی اُتے پردا پان لئی ایہ گھناؤنا کھیڈ کھیڈ رہی اے‘ اسیں پہلے ای کہندے ساں ایہ کمپنی نہیں چلے گی‘ ہُن کمپنی پِٹ چُکی اے کجھ لوک کہندے سن ”گل ودھ گئی“ میں کہندا آں ”گل مُک گئی“ اے۔ سارے اداریاں نُوں جھون دِتا گیا کہ کشمیر بھُل جاؤ‘ ن لیگ خلاف کارروائی کرو‘ اِک دن وچ ساڈے 20 جون شہید ہوئے اوہناں نُوں سلام پیش کردے آں نال سوال وی پُچھدا آں کہ دہشتگردی نُوں ختم کر دِتا سی دُبارا زور کیوں پھڑ رہی اے؟۔ اوہناں نے کہیا کہ جہناں اداریاں نے دہشتگردی نال لڑنا سی اوہناں نُوں سیاسی جنگ وچ لا دِتا گیا‘ اج نیشنل ایکشن پلان نُوں سیاسی انتقام دا پلان بنا دِتا گیا اے۔ پچھلے وزیراعظم شاہد خاقان عباسی نے کہیا کہ ڈھائی سال توں اسیں ای سی ایل وچ آں‘ زندگی دے معاملات نہیں چلا سکدے‘ حالے تک حکومت تے نیب فیصلا نہیں کر سکے‘ ساڈے خلاف کیس کیہ اے؟۔