بال،بزرگ تے جوان دی اِکو ای منگ اے’ووٹ نوں عزت دو‘:مریم نواز ۔۔۔٭رویل نیوز٭

لاہور (نیوز ڈیسک) مریم نواز تے کیپٹن صفدر سنے ن لیگی آگوواں اُتے ٹریفک وچ رکاوٹ تے پنجاب ساؤنڈ ایکٹ دی خلاف ورزی دا مقدما درج کر لیا گیا جہدے وچ ایہناں اُتے ریاستی اداریاں دے خلاف اشتعال انگیز تقریراں کرن دا الزام وچ لایا گیا اے۔مقدما درج کر ن اُتے پچھلے وزیراعظم نواز شریف دی صاحبزادی تے مسلم لیگ ن دی نائب صدر مریم نواز نے کہیا اے کہ ووٹ نُوں عزت دو دے نعریاں اُتے مقدمے درج کروان نال جیلاں گھٹ پے جان گیاں تے حکومت دے خلاف عوامی عدالت وچ ریفرنس دایر ہو چکیا۔ مریم نواز نے ٹویٹ کردیاں ہویاں ہور کہیا کہ جس رفتار نال محمد نواز شریف دا بیانیا ہر گھر وچ پہنچ رہیا اے تے لوکائی دا حکومت تے اِک پیج دے خلاف ردِ عمل ساہمنے آ رہیا ا‘ چھیتی ایہناں نفُژ 2200 بندیاں اُتے نہیں سگوں 22 کروڑ لوکائی اُتے مقدمے درج کرنے پین گے‘ حکومت دے خلاف ریفرنس عوامی عدالت وچ دایر ہو چکیا تے اوہ نیب وانگوں جعلی نہیں۔ مریم نواز دا کہنا سی کہ جے تُسیں ووٹ نُوں عزت دو دے نعریاں اُتے پرچے درج کروا رہے او تے تہاڈیاں جیلاں گھٹ پے جان گیاں کیوں جے اج پاکستان دے ہر بچے‘ بزرگ‘ تے جوان دا اِک ای مطالبا اے کہ اوہناں دے ووٹ نُوں عزت دِتی جاوے۔ ایس نعرے توں تکلیف صرف اوہناں نُوں اے جہڑے لوکائی دے ووٹ اُتے ڈاکا مارن دے جرم دے مرتکب ہوئے نیں۔ آگو ن لیگ نے کہیا کہ حکومت نے 1 مہینے وچ دوجی وار دوائیاں دیاں قیمتاں وچ 22 توں 35 فیصد وادھا کر دِتا۔ 2 اسل وچ بیرونی قرضے 17 ارب ڈالر ودھ گئے۔ نیازی صاحب جے اپوزیشن نُوں ٹارگٹ کرن دی بجائے لوکائی دے مسئلیاں اُتے توجا دِتی ہوندی تے اج قوم تہانوں جھولیاں چُک کے دُعاواں نہ دے رہی ہوندی۔ سبزی‘ دال‘ گوشت‘ گھیو‘ آٹا غریب دی پہنچ توں دور ہو چکیا۔ اوہ ویلا آ گیا اے جدوں تہانوں عوامی قہر دا ساہمنا کرنا پوے گا۔ یاسمین راشد صاحبہ لاہور دیاں سڑکاں اُتے جہڑی نفرت دا نشانا بنے اوہ اوہناں دے نہیں‘ تہاڈے خلاف سی۔ کیوں جے تُسیں عوام دی زندگی جہنم بنا کے رکھ دِتی۔ مریم نواز نے ہور کہیا کہ لوکائی دی مرضی دے خلاف آئی حکومت کدی ایہناں دی خیر خواہ نہیں ہووے گی۔