این آر او اسیں نہیں ایہ ساڈے توں منگ رہے نیں تے اسیں ایہناں نُوں این آر او نہیں دے رہے: مولانا فضل الرحمان۔۔۔٭رویل نیوز٭

لاڑکانا (نمایندا رویل) آگو پی ڈی ایم مولانا فضل الرحمان دا کہنا اے کہ این آر او اسیں نہیں‘ سگوں ساڈے توں منگ رہے نیں تے اسیں این آ ر او نہیں دے رہے۔ لاڑکانا وچ میڈیا نال گلبات کردیاں ہویاں آگو پی ڈی ایم مولانا فضل الرحمان دا کہنا سی کہ پورے ملک وچ اضطراب تے بے چینی دی صورتحال اے‘ ملک وچ کوئی حکومت نہیں‘ انتظامی ڈھانچا کھلر چکیا اے‘ کراچی واقعے اُتے وفاق فرار حاصل نہیں کر سکدا‘ جہناں نُوں ذمے دار متھیا جا رہیا انکوایری وی اوہی کرن گے‘ سندھ حکومت نے انکوایری نُوں قبول کیتا اے پر سوالات اپنی تھاں اہم نیں۔ مولانا فضل الرحمان دا کہنا سی کہ پی ڈی ایم دی او ہ قیادت جہناں اُتے نیب مقدمے نیں تے اوہ ضمانت اُتے رہا نیں اوہناں دیاں ضمانتاں رَد کروائیاں جا رہیاں نیں‘ صورتحال ایہو جہی نہیں کہ نیب نُو ں برداشت کیتا جا سکے‘ اسیں جیلاں ول رُخ موڑن نُوں تیار آں‘ اسیں ساری زندگی مارشل لاء نال لڑن دے عادی آں پی دی ایم ابتدائی طور اُتے اِک تحریک اے‘ نادیدا قوتاں دی اُچیرتا کسے طور قبولن جوگ نہیں۔ آمرانا قوت نُوں ایس طرحاں دا کھلواڑ کرن دی اجازت نہیں دواں گے۔ آگو جے یو آئی نے کہیا کہ میری شرافت مینوں اجازت نہیں دیندی کہ میں وفاق دے الزاماں دا جواب دواں‘ ہوچھے ہتھکنڈے استعمال کرن نال ملک وچ انتشار ودھے گا‘ این آر او اسیں نہیں ایہ ساڈے توں منگ رہے نیں تے اسیں ایہناں نُوں این آر او نہیں دے رہے‘ اسیں پوری قوم دے جمہوری حق دی جنگ لڑ رہے آں‘ حکمراناں دی نا اہلی نال معیشت متاثر ہوئی‘ ایہدی بحالی دی جنگ لڑ رہے آں۔ آگو پی ڈی ایم نے ہور کہیا کہ بلاول بھٹو دا دورا گلگت بلتستان پہلے توں شیڈول سی‘ اسیں فیر وی بلاول بھٹو زرداری نال رابطے وچ آں‘ کراچی جلسے وچ نواز شریف نے آپ تکریر نہیں کیتی‘ تے کوئٹہ وچ وی اوہناں دی مرضی اے کہ اوہ تقریر کردے نیں یاں نہیں۔