پنجاب دے پارٹی دے سینئر صوبائی وزراء چُپ کیوں نیں؟ریاست دے بیانیے دی جنگ فرنٹ فٹ اُتے آ کے لڑن۔۔۔٭رویل نیوز٭

اسلام آباد (نیوز ڈیسک) وزیراعظم عمران خان دا بھوٹان دے وزیراعظم نال ٹیلیفونک رابطا‘ گلبات دوران وزیراعظم عمران خان دا کہنا سی کہ پاکستان بھوٹان دے نال تعلقات نُوں خصوصی اہمیت دیندا اے‘ پاکستان نُوں بدھ مت دے ورثے دا امین ہون اُتے فخر اے۔ وزیراعظم نے وباء دے دوران اقدامات اُتے بھوٹانی وزیراعظم نُوں سلاہیا‘ دوہاں آگوواں وچکار وباء بارے اقدامات اُتے وچار وٹاندرا ہویا۔ وزیراعظم نے کہیا کہ ساڈی حکومت دی توجا قیمتی جاناں دے تحفظ تے معیشت نُوں متحرک کرن اُتے مرکوز رہی تے سمارٹ لاک ڈاؤن دی حکمت عملی تے ہور اقدامات دی وجھا توں کرونا وباء نُوں ودھن توں روکیا۔ عمران خان نے بھوٹانی ہم منصب نُوں پاکستان دے دورے دی دعوت دیندیاں ہویاں کہیا کہ پاکستان بھوٹان دے نال تعلقات نُوں خصوصی اہمیت دیندا اے‘ پاکستان نُوں بدھ مت دے ورثے دا امین ہون اُتے فخر اے‘ پاکستان بھوٹان توں آن والے زائرین نُوں بدھ مت دے مقدمے مقامات اُتے خُش آمدید کہوے گا۔ ایس توں وکھ وزیراعظم عمران خان نے پنجاب دے وزیراں نُوں ہدایت کیتی اے کہ ملک تے ریاست دے بیانیے دی جنگ فرنٹ فٹ اُتے آ کے لڑن۔ وسیلیاں دے مطابق وزیراعظم عمران خان نال میاں محمود الرشید‘ ڈاکٹر یاسمین راشد‘ راجا بشارت‘ فیاض الحسن چوہان‘ ڈاکٹر مراد راس‘ راجا یاسر ہمایوں تے انصر مجید نے ملاقات کیتی‘ وزیراعظم نے پنجاب دے وزراء نُوں میڈیا وچ پارٹی مؤقف بھرویں انداز نال اجاگر کرن دا ٹاسک دے دِتا۔ وسیلیاں دے مطابق وزیراعظم عمران خان نے وزراء توں پُچھیا کہ پنجاب دے پارٹی دے سینئر صوبائی وزراء چُپ کیوں نیں‘ آخر کیہ وجھا اے کہ وزراء میڈیا اُتے فرنٹ فٹ اُتے نظر نہیں آندے‘ وزراء ملک تے ریاست دے بیانیے دی جنگ فرنٹ فٹ اُتے آ کے لڑن۔ وزیراعظم نے وزیر اطلاعات فیاض الحسن چوہان دے پارٹی مؤقف نُوں اجاگر کرن دے حوالے توں کردار دی تعریف کردیاں ہویاں کہیا کہ فیاض الحسن چوہان وانگوں دوجے وزراء وی کھُل کے ساہمنے آن‘ تے سینئر وزراء خاموشی ختم کرن۔ دوجے پاسے وزیراعظم عمران خان دی صدارت ہیٹھ قومی رابطا کمیٹی برائے ہاؤسنگ‘ تعمیرات و ڈیویلپمنٹ دا ہفتا وار اجلاس ہویا۔ اجلاس وچ گورنر سٹیٹ بینک نے غریب تے متوسط طبقے لئی سوکھیاں قسطاں اُتے قرضیاں دی فراہمی دے حوال توں بریفنگ دِتی گئی۔ وزیراعظم نے تاکید کیتی کہ غریب بندیاں نُوں بینکاں توں قرضیاں دے حصول دے دوران ہر قسم دی اسانی فراہم کیتی جاو تے خاص طور اُتے اوہناں دی عزت نفس دا خیال رکھیا جاوے۔ وزیراعظم نے کہیا کہ سارے صوبے آن لاین پورٹل دا بھرواں استعمال کرن تاں جے منظوری دے عمل نُوں مکمل طور اُتے شفاف تے چھیتی ممکن بنایا جاوے۔