جمہوری حکومت وچ نوٹس حکومت یاں عدلیا نُوں لینا چاہیدا:مریم نواز۔۔۔٭رویل نیوز٭

لاہور (نمایندا رویل) پاکستان مسلم لیگ (ن) دی نائب صدر مریم نواز نے کہیا اے کہ کراچی واقع جعلی حکومت اُتے وی حملا اے‘ جمہوری حکومت وچ نوٹس حکومت یاں عدلیا نُوں لینا چاہیدا اے کسے ہور نُوں نہیں لینا چاہیدا اے‘ واقع دے بعد وزیر اعلا سندھ نے مینوں جہڑی تفصیل دَسی ا اوہ حیران کن اے جہناں نُوں ایتھے نہیں دَس سکدی‘ انکوایری رپورٹ نُوں پبلک کیتا جانا چاہیدا اے کیوں جے اسیں ایہنوں لُکان نہیں دواں گے‘ نواز شریف نے تے گل کیتی سی کہ عمران خان مہرہ اے پر کراچی واقع دے بعد عمران خان نے اپنے کردار نال عملی ثبوت دے دِتا اے‘ بے شک تہانوں ڈمی بنا کے بٹھایا گیا اے پر ڈمی وی غایب اے‘ گھٹ توں گھٹ عہدے دی ای لاج رکھ لیندے‘ نواز شریف تے شہباز شریف دے بغیر پنجاب تے ملک لا وارث اے‘ آرمی چیف دی مدت ملازمت وچ وادھے دے معاملے اُتے مینوں اختلاف سی پر پارٹی ڈسلپن وچ چُپ رہی۔ ایہناں خیالاں دا اظہار اوہناں نے مال روڈ اُتے اپنے مطالبیاں دے حق وچ دھرنا دین والے پڑھیاراں نال اکسُرتا دے اظہار دے بعد میڈیا نال گلبات کردیاں ہویاں کیتا۔ مریم نواز نے کہیا کہ ڈی جی خان‘ بلوچستان راجن پور تے فاٹا دے پڑھیار اپنے حق لئی سڑکاں اُتے نیں‘ ایہ بچے 12 دن توں سڑکاں اُتے رُل رہے نیں پر کسے نُوں ایہناں توں پُچھن دی توفیق نہیں ہوئی کہ تہاڈا کیہ مسئلا اے‘ 35 ہزار پڑھیاراں لئی 600 سیٹاں نیں پر اوہ وی ایہناں توں کھوہ لئیاں گئیاں نیں جو انتہائی غلط گل اے۔ ایہ کہیا جاندا اے کہ پنجاب وڈا بھرا اے پر میں تے کہندی آں بلوچستان وڈا بھرا اے‘ ایہناں سیٹاں لئی کِنا خرچا آ جاوے گا؟۔ مطالبا اے کہ ایہناں پڑھیاراں دا کوٹا تے سکالر شپس بحال کیتیاں جان۔ شہباز شریف نے ایہناں پڑھیاراں نُوں کوٹا تے سکالرشپس دِتیاں سن پر ایہو جہی کہڑی آفت آ گئی کہ تُسیں ایہناں نُوں بند کر دِتا اے۔ اوہناں نے کہیا کہ میں کوئٹہ جلسے وچ وی ایہدے اُتے گل کراں گی۔ مینوں سمجھ آندی اے کہ تُسیں نااہل تے نالایق او پر ایہناں بچیاں دا تعلق مسلم لیگ (ن) نال نہیں اے‘ تہانوں شرم آنی چاہیدی اے جہڑا ایہناں نُوں ایہناں دا حق نہیں د ے رہے‘ ایہ پاکستان دا مستقبل نیں جہڑے سڑکاں اُتے رُل رہے نیں۔ اوہناں نے کہیا کہ میں ایس حکومت توں اپیل کر کے ایس حکومت نُوں تسلیم کرن دا حق نہیں دواں گے پر جے کسے دے سینے وچ دل اے تے اوہنوں چاہیدا اے کہ ایتھے آ کے ایہناں پڑھیاراں دا مسئلا سنے۔ اُنج مینوں امید نہیں اے کہ ایس حکومت دے ہوندیاں ہویاں پڑھیاراں دا مسئلا حل ہووے گا۔ اوہناں نے سوالاں دے جوابات دیندیاں ہویاں کہیا کہ نواز شریف پاکستان وچ نہیں پر اوہ ہر تھاں موجود نیں‘ نواز شریف بیرون ملک ہوندیاں ہویاں وی حکومت دے اعصاب اُتے سوار نیں‘ نواز شریف تے شہباز شریف دے بغیر پنجاب تے پاکستان لاوارث نیں‘ شہباز شریف نُوں کرپشن کرن اُتے نہیں سگوں بھرا دے نال نہ لڑن اُتے جیل وچ رکھیا گیا اے۔ اوہناں نے کہیا کہ کراچی واقع وچ سندھ سرکار ملوث نہیں‘ کراچی واقع روز روشن وانگوں عیاں اے تے ایس واقع دی تحقیقات دی وی ضرورت نہیں۔ کراچی وچ جو ہویا اوہدا ساریاں نُوں پتا لگ گیا اے کہ عمران خان صرف مہرہ اے تے ایہ ساڈا ہدف نہیں‘ کراچی واقع دے بعد ڈمی نے ساہمنے نہ آ کے ایہدا عملی ثبوت دے دِتا اے‘ لوکائی نُوں پتا لگ گیا اے کہ حکومت دے اُتے حکومت کیہ ہوندی اے۔ اوہناں نے کہیا کہ ایس واقع دے بعد مینوں بلاول بھٹو دا فون آیا تے میرے توں ودھ غصے وچ سن تے اوہناں نے کہیا کہ میں ایہدے اُتے شرمندا آں‘ مینوں وزیر اعلا سندھ نے فون کیتا تے اوہناں نے مینوں جہڑی حیران کن تفصیل دَسی اوہ میں ایتھے نہیں دَس سکدی۔ جہڑی وی انکوایری ہووے اوہ لوکائی دے ساہمنے ہووے‘ اسیں انکوایری رپورٹ دا انتظار کراں گے تے ایہنوں پبلک ہونا چاہیدا اے‘ اسیں ایہنوں لُکان نہیں دواں گے‘ جہناں نے ایہ کم کیتا اصل وچ شرمندگی دا اظہار تے اوہناں نُوں کرنا چاہیدا اے۔ اوہناں نے اِک سوال دے جواب وچ کہیا کہ حکومت گھبرا گئی اے تے بنی گالا وچ لُک کے بیٹھی اے‘ ایہناں دے چہرے دیاں ہوائیاں اُڈیاں ہوئیاں نیں تے مینوں تے لگدا اے کہ ایہ جنوری توں پہلے چلدے بنن گے۔ اوہناں نے کراچی واقع وچ بطور گواہ پیش ہون دے سوال دے جواب وچ کہیا کہ جے مینوں بلایا گیا تے میں ضرور پیش ہوواں گی پر ایہدیاں ساریاں گ لاں قوم ساہمنے آ چُکیاں نیں‘ ایہدی ویڈیوز تے سی سی ٹی وی فوٹیج موجود نیں۔ جے کسے دے کول وارنٹ گرفتاری سی وی تے اوہ صفدر دی گرفتاری دا سی اوہ میری گرفتاری دا نہیں سی‘ اِک سوانی دے کمرے اُتے دھاوا بولیا گیا‘ ساڈا تے دین وی کہندا اے کہ جنگ وچ مخالف دے مد مقابل ہوو تے سوانیاں تے بچیاں دا پچھا نہ کرو۔ میں صرف نواز نہیں ایس قوم دی دھی تے بھین آں‘ جے میرے نال ایہ سلوک ہو سکدا اے تے دوجیاں دھیاں‘ بھیناں نال نال کس طرحاں دا سلوک کیتا جا سکدا اے‘ ریاست تے اپنیاں دھیاں‘ بھیناں دی حفاظت کردی اے‘ ایس ریاست وچ کسے بھین تے دھی دی عزت محفوظ نہیں۔ اوہناں نے کہیا کہ حکومت دے ترجمان تے مشینری اپنی خفت مٹان لئی گھٹیاں گلاں کر رہے نیں‘ تہاڈے تے علم وچ لیاندے بغیر ایہ اپریشن کیتا گیا‘ ایہ جعلی حکومت اُتے وی حملا اے۔ اوہناں نے کہیا کہ حکومت نواز شریف اُتے مقدمے بنا کے اپنا مونہ کالا کر رہی اے‘ نواز شریف حالے پاکستان نہیں آئے تے حکومت دے اعصاب اُتے سوار نیں۔