اسیں وردیاں اُتے الزام نہیں لانا سگوں وردی نُوں داغدار کرن والیاں نُوں پچھاننا اے: مریم نواز۔۔۔٭رویل نیوز٭

لاہور (رویل نیوز) پاکستان مسلم لیگ ن دی مرکزی نائب صدر مریم نواز نے کارکناں نُوں فوج دی وردی خلاف نعرے تے الزام تراشی توں روک دِتا۔ اوہناں نے کہیا کہ ایہ میرے فوجیاں دی اوہ وردی اے جہڑے سیاچن وچ ساڈی حفاظت کردے شہید ہوندے نیں‘ جدوں ایہناں نُوں خاک حوالے کیتا جاندا اے تے ایہ وردیاں خون وچ لَت پَت ہوندیاں نیں‘ اسیں وردیاں اُتے الزام نہیں لانا سگوں وردی نُوں داغدار کرن والیاں نُوں پچھاننا اے۔ تفصیلات دے مطابق پاکستان مسلم لیگ (ن) نے ”شیر جوان موومنٹ“ دا اغاز کر دِتا۔ لاہور دے علاقے ماڈ ٹاؤنو چ مسلم لیگ (ن) دے ہیڈ آفس وچ منعقد ا تقریب وچ نائب صدر مسلم لیگ (ن) مریم نواز نے شیر جوان موومنٹ دا اغاز کیتا۔ تقریب نال خطاب کردیاں ہویاں مریم نواز نے کہیا کہ آئین دی کتاب نُوں ویکھو تے پڑھو کہ نواز شریف دے کیہ مطالبات نیں؟ آئین وچ سبھ لکھیا اے کہ کہدا کیہ کیہ حق اے‘ نواز شریف دا جے اِک وی مطالبا آئین توں متصادم اے تے نواز شریف تے مریم نواز دا بلکل ساتھ نہ دینا۔ پر نواز شریف آئین دی پاسداری تے حلف دی پاسداری دی گل کر رہیا اے۔ اوہناں نے تقریب وچ وردی اُتے نعرے بازی لان توں منعد کیتا تے کہیا اسیں و ردی د ے اُتے الزام نہیں لانا‘ ایہ میرے فوجیاں دی اوہ وردی اے جہڑے سیاچن وچ ساڈی حفاظت کردے شہید ہو ندے نیں‘ جہناں دیاں ماواں‘ بھیناں‘ دھیاں تے بچے‘ جدوں ایس وردی وچ اوہناں نُوں خاک حوالے کرن لے لے جاندے نیں تے اوہ وردیاں خون وچ لت پت ہوندیاں نیں۔ اسیں وردی دے اُتے الزام نہیں لانا‘ اسیں ایس وردی نُوں داغدار کرن والے دو تِن کرداراں نُوں پچھاننا اے۔ ایہناں کرداراں نُوں فیر اسیں وردی پچھے لُکن نہیں دینا۔ جہدے اُتے رلتیاں نے صرف پاپا جونز دے نعرے لائے۔ مریم نواز نے کہیا کہ پاپا جونز تے پیزا والیاں خلاف جہڑی اواز اُٹھ رہی اے نواز شریف نُوں سمجھ اے کہ جنرل عاصم سلیم باجوا قوم دے جوان سوال کر رہے نیں کہ تہاڈے کول ارباں دیاں جائیداداں کتھوں آئیاں؟ اِک نوکری پیشا ہون دے کارن کس طرحاں کھرباں دیاں جائیداداں دنیا وچ کھلار دِتیاں۔ جے 3 وار دا وزیراعظم تے میں سینکڑاں پیشیاں بھگت سکدے آں تے فیر سبھ نُوں وجاب دینا پوے گا۔ نواز شریف ازای دی گل کر رہیا اے‘ آئین دی ہری کتاب نُوں جُتیاں تھلے مدھن والیاں نُوں عبرت دا نشان بناؤ‘ نواز شریف کہندا اے سوال پُچھو کہنے ووٹ نُوں چوری کیتا۔ ووٹ نُوں عزت دو صرف نعرا نہیں اے‘ جدوں ووٹ نُوں عزت ملدی اے تے لیپ ٹاپس‘ سکالر شپس‘ وظایف‘ سکول کالجز‘ یونیورسٹیاں ملدیاں نیں‘ ہسپتال بندے نیں‘ انٹرن شپس ملدیاں نیں۔ یوتھ لون ملدے نیں‘ 22`22 گھنٹے دی لوڈشیڈنگ ختم ہو جاندی اے‘ بم دھماکے ختم ہو جاندے نیں۔ مریم نواز نے کہیا کہ شیر جوان تحریک شروع ہون توں پہلاں ا ی مقبولیت حاصل کر چکی اے‘ ہزاراں پڑھیار ایس تقریب وچ رلت کرنا چاہندے سن پر ساڈے کول تھاں نہیں سی کیوں جے ساڈے لئی ساڈی زمین تنگ کر دِتی گئی اے‘ کے پی کے دے پڑھیاراں دے شکوے آ رہے سن کہ اوہناں نُوں مدعو کیوں نہیں کیتا گیا پر سانوں جے کسے وڈی تھاں ایہ تقریب کرنی پیندی تے سانوں اجازت نہ لدی‘ خیبر پختونخواہ دے بچیاں نال وعدا اے کہ میں آپ کے پی کے آ کے ایس تحریک دا اوتھے وی اغاز کراں گی۔ اوہناں نے کہیا کہ ایس تحریک دا ناں ”شیر جوان“ نواں اے پر ایہ تحریک 83 سال پہلے 1937 وچ قائداعظم محمد علی جناح نے آل انڈیا مسلم لیگ سٹوڈنٹ فیڈریشن دے ناں نال شروع کیتی سی‘ جہنے تحریک پاکستان وچ ہر اول دستے دا کردار ادا کیتا سی۔ کلکتا وچ نوجوان پڑھیاراں نال خطاب کردیاں ہویاں قائداعظم نے کہیا سی نویں نسل دے نوجوانوں! تہاڈے وچ کئی اقبال تے جناح بنن گے‘ مینوں پورا یقین اے کہ قوم دا مستقبل تہاڈے ورگے مضبوط ہتھاں وچ رہوے گا۔ مریم نواز شریف نے ہور کہیا کہ ایس تحریک دے ناں اُتے اعتراضات کیتے جاندے نیں کہ ایہدے وچ شیر جوان مرد تے سوانی دی تفریق اے‘ انج بلکل نہیں اے‘ شیر جوان کڑیاں تے منڈیاں دوہاں لئی اے تے ایہ تحریک پاکتان دے نوجواناں نُوں اوہناں دے حقاں دا احساس دلوان تے شعور بیدا کرن دی تحریک اے‘۔ تہانوں ساریاں نُوں آئین دا مطلب سمجھان دی تحریک اے‘ پاکستان دے نوجواناں نُوں جمہوری نظام دی اہمیت سمجھان دی تحریک اے۔ ایہ مستقبل دے آگو بنان دی تحریک اے۔ پاکستان دے نوجواناں نُوں ہائبرڈ نظام دے خطرات سمجھان دی تحریک اے۔ تہاڈیاں جہڑیاں امیداں ڈگمگا رہیاں نیں‘ خاب جہڑے ٹُٹ رہے نیں ایہناں امیداں نوں کھلرن تے خاباں نُوں ٹُٹن توں بچان دی تحریک اے۔ اوہناں نے پڑھیاراں نُوں مخاطب کردیاں ہویاں کہیا کہ میرے بچیوں! جاندے او نا کہ غلامی کنی وڈی سزا اے‘ غلامی توں وڈی کوئی سزا نہیں اے‘ غلامی اوہ بلا اے جہڑی انساناں توں گل کرن دی ازادی کھوہ لیندی اے‘ اوہ زنجیر اے جہڑی تہانوں طاقتور دے ساہمنے نیواں ہون اُتے مجبور کردی اے‘ غلامی اوہ پردا اے جو ساڈے ذہناں اُتے پا دِتا جاندا اے تاں جے سانوں سچائی تے حق دا راہ نظر نہ آوے‘ تاں جے تُسیں غلط نُوں غلط نہ کَہ سکو‘ تُسیں اپنا حق نہ منگ سکو‘ تُسیں اپنے حق اُتے چُپ ہو جاؤ‘ تہاڈا حق بھیک وانگوں دِتا جاوے تے تہانوں اوہی حق دِتا جاوے جہڑا طاقتور دی مرضی ہووے‘ تے جے کوئی حق منگ منگے تے اوہنوں کالے پانیاں دی سزا دِتی جاوے۔