منفی سیاست توں توبا کر لینی چاہیدی اے: سردار عثمان بزدار۔۔۔٭رویل نیوز٭

لاہور (نمایندا رویل) وزیر اعلا پنجاب سردار عثمان بزدار نے کہیا کہ اپوزیشن جماعتاں نے پاکستان دے مفادات نُوں داء اُتے لان وچ کوئی کسر نہیں چھڈی۔ اپوزیشن دا حالیا بیانیا پاکستان دے بیانیے دے بلکل خلاف اے۔ اپوزیشن آگوواں نُوں منفی سیاست توں توبا کر لینی چاہیدی اے۔ اوہناں نے کہیا کہ 22 کروڑ لوکائی پاکستان دے خلاف کوئی مذموم سازش کامیاب نہیں ہون دیوے گی۔ اپوزیشن آگوواں نے کرونا دی دوجی لہر دے باوجود اجتماعواں دی سیاست توں گریز نہیں کیتا۔ شہریاں دیاں زندگیاں تے صحت نال کھیڈن والے اپوزیشن آگوواں دے سینے وچ لوکائی دا کوئی درد نہیں۔ اوہناں نے کہیا کہ لوکائی دے مسئلیاں توں بے خبر اپوزیشن صرف سیاسی پوائنٹ سکورنگ وچ لگی ہوئی اے۔ اپوزیشن نے لوکائی دے نال کھلون دی بجائے ایہناں نُوں ونڈن دی مذموم کوشش کیتی۔ اپوزیشن دا منفی کردار مذمت جوگ اے۔ وزیراعظم عمران خان نے ہمیشا قومی مفاد نُوں ترجیح دِتی اے۔ اوہناں نے کہیا کہ اپوزیشن جماعتاں نے ذاتی مفاد دی خاطر پاکستان دے مفادات نُوں نظرانداز کیتا اپوزیشن آگوواں نُوں پاکستان خلاف بیانیے دا حساب دینا پوے گا۔ وزیر اعلا نے کہیا کہ بدقسمتی اے کہ اپوزیشن آگوواں دا بیانیا پاکستان دے ازلی دشمن نُوں فایدا پہنچا رہیا اے۔ اسیں اپنے اداریاں دے نال کھلوتے آں تے کھلوتے رہواں گے۔ اداریاں دے خلاف گلاں کرن والیاں دا کوئی مستقبل نہیں۔ اوہناں نے کہیا کہ لوکائی راہبراں دے بھیس وچ راہزناں ں دے چہرے پچھان چُکی اے۔