kraamaat@gmail.com
+ +92 333-430-6384


بناوٹی مہنگائی دا توڑ‘یوٹیلیٹی سٹورز۔۔۔٭رویل کالم٭


شیخ محمد انور November 02, 2020


ملک وچ کھان پین دیاں شیواں دیاں قیمتاں وچ آئے دن وادھے دے حوالے نال لوک پریشانی وچ مبتلا نیں۔ جس بندے دا مہینا وار راشن 7 ہزار وچ آجاندا سی ہن اوہو راشن 15 ہزار وچ آوندا اے۔ جدوں مصنوعی مہنگائی ایس حد تیکر چلی جاوے گی تے عام بندا ڈھڈ دی جہنم کویں بھرے گا؟ ملک وچ کرونا وایرس وچ تے کسے حد تیکر کمی آگئی اے پر لوکائی دیاں مشکلاں اُنج دیاں اُنج نیں۔ ایہدے وچ کوئی شک نہیں وزیراعظم عمران خان ایس ملک تے قوم لئی کجھ کرنا چاہندے نیں پر حالات ایہو جہے پیدا ہو چکے نیں کہ اوہ کجھ کرنہیں پارہے۔ ملک وچ آئے دن دی مصنوعی مہنگائی پاروں لوک حکومت توں متنفر ہورہے نیں۔ ساڈی اپوزیشن دی وی ایہو خاہش ے کہ لوک پاکستان تحریک انصاف اتے تے متنفر ہون۔ تاریخ گواہ اے کہ اوہناں لوکاں دی حکومت احسن انداز وچ چلی اے جہناں لوکائی دے بنیادی مسائل نوں ہنگامی بنیاداں اتے حل کیتا اے تے لوکائی نوں سہولتاں دتیاں نیں۔ ملک وچ انصاف دا بول بالا کیتا اے۔ تعلیم نوں عام کیتا اے۔ ارباب اختیار نوں خوے ایس گل دا ادراک نہیں کہ نوکری پیشا بندے نہ تنخاواں وچ وادھا ہویا تے نہ ای مزدور دی مزدوری وچ کسے صورت وادھا ہویا اے تے مصنوعی مہنگائی وچ ہر دن وادھا ہورہیا اے۔ لوکائی دی بنیادی لوڑاں دی کھان پین دیاں شیواں تے جان بچان والیاں دوائیاں دیاں قیمتاں غریب بندے دی اپڑ توں دور ہوچکیاں نیں۔

اج دے بدلے پاکستان وچ مہنگائی‘ بھکھ تے غربت اک سماجی بے چینی دا کارن بن چکی اے۔ گندگی دے ڈھیر‘ فائیو سٹارہوٹلاں تے شادی ہالاں دے باہر رزق تلاش کرن والیاں وچ مسلسل وادھا ہورہیا اے۔ صنعتاں بند پئیاں نیں حتی کہ قاید دے شہر کراچی وچ 350 ملین ڈالر توں بنی ہوئی التویرقی سٹل مل وی بند پئی اے فیر پاکستان وچ کہڑا ملک انویسٹمنٹ لے کے آوے گا؟ زراعت زبوں حالی دا شکار اے تے کاروباری طبقا اپنا سرمایا لان نوں تیار نہیں۔ ودھدی بے روزگاری تے مہنگائی جرایم وچ وادھے دا کارن بن رہی اے جہدے توں بدعنوانی کھلر رہی اے۔ انسانی تے معاشرتی کردار دا تاریک پہلو روز کسے نہ کسے صورت میڈیا اتے نظر آرہیا اے۔ دوجے پاسے ساڈی جمہوریت طرز حکمرانی بہتر بنان دی بجائے بھُکھی تے بے روزگارلوکائی توں صبر سچائی شرافت تے ایمانداری دی توقع کررہی اے جد کہ غریب بندا اپنے تے گھر والی تے بچیاں لئی 2ویلے دی روٹی تے دوائی تیکر نوں ممکن نہیں کرپارہیا۔ جدوں ایہو جہی صورتحال پیدا ہووے گی تے فیر احتجاج تے دھرنے ای جنم لیندے نیں۔

سرکاری ملازم آئے دن مہنگائی دا رونا روندے وکھالی دیندے نیں۔ پچھلے دناں اسلام آباد وچ لیڈی ہیلتھ ورکرز احتجاج اتے مجبور ہوئیاں۔ لوک مسایل دی چکی وچ پس رہے نیں۔ زرعی ملک ہون دے باوجود آٹے دے بحران نے عام بندے نوں پریشان کرکے رکھ دتا اے۔ لوک روز دی مہنگائی توں تنگ آچکے نیں۔ جے کسے شے دے نرخ ودھدے نیں تے تاجر اپنا منافع رکھ کے ای ویچدا اے ایس حال وچ نقصان وچارے عام بندے نوں ای چُکنا پیندا اے۔ وزیراعظم عمران خان جے فوری طور تے کھان پین دیاں شیواں دے حوالے نال لوکائی دیاں مشکلاں وچ کمی لیانا چاہندے نیں تے حکومت کول یوٹیلٹی سٹورز مہنگائی دا بہترین توڑ نیں ملک بھر وچ موجود یوٹیلٹی سٹورز اتے ہر قسم دیاں شیواں دی سستے دام فراہمی نوں یقینی بنایا جاوے۔ تے ایہدے نال نہ صرف لوکائی نوں فوری ریلیف ملے گا سگوں مصنوعی مہنگائی کرن والے عناصر دی وی حوصلا شکنی ہووے گی۔ ماضی دیاں حکومتاں وی ایس صورتحال توں دوچار رہیاں نیں جہدے توں ایس ویلے وزیراعظم عمران خان گزر رہے نیں۔

ماضی وچ وی ملک وچ مہنگائی دا جن بے قابو سی۔ انج ای لوک سڑکاں اتے سن۔ ایسے پاروں 1973 وچ سابق وزیراعظم ذولفقار علی بھٹو دے دور حکومت وچ یوٹیلٹی سٹورز دا قیام عمل وچ لیایا گیا سی جہدا مقصد ایہ سی کہ لوکاں نوں عام بزاراں دے مقابلے سستیاں تے معیاری شیواں میسر ہون۔ ایہ اک نیک مقصد سی ایس لئی شروعات وچ ای عوامی سطح اتے خوب پذیرائی ملی۔ لوکائی دی وڈی گنتی ایس اقدام دی ناصرف تعریف کردی سی سگوں مہنگائی دے دور وچ ایہ اوہناں لئی نعمت توں گھٹ نہیں سی۔ ابتدا وچ یوٹیلٹی سٹورز دیاں برانچاں سارے وڈے شہراں وچ بہت گھٹ سن۔ پر اوہدے باوجود لوکائی دی وڈی گنتی ایہدے توں فایدا چُکدی سی تے ایہدا معیار وی بہتر ہوندا سی تے لوک رش دے باوجود ایتھوں خریداری کرن نوں ترجیح دیندے سن۔ جے ویکھیا جاوے تے سارے عوامی مسائل نہ سہی اوہناں وچوں کجھ نہ کجھ تے تھوڑی جہی توجا نال حل کیتے جاسکدے نیں۔ یوٹیلٹی سٹوراں دے دایرا کار نوں ناصرف ودھایا جاوے سگوں اوہدے وچ ہور بہتری لیا کے حکومت لوکائی وچ اپنی ساکھ بہتر کرسکدی اے۔ پرجے کوئی حکومتی مشیر ایس پاسے توجا دیوے تے فیر اے۔

عمران خان ہوراں نوں خورے معلوم نہیں کہ ملک بھر وچ موجود یوٹیلٹی سٹورز دی موجودا گنتی 22 کروڑ لوکائی دیاں لوڑاں نوں پورا کرن لئی ناکافی نیں۔یوٹیلٹی سٹورز کارپوریشن شیواں دی سبھ توں وڈی پبلک سیکٹر سٹورز دی چین اے۔ ملک بھر دے یوٹیلٹی سٹورز حکومت دی توجا دے مستحق نیں۔

حکومت نے کھان پین دیاں شیواں اتے جو ریلیف دتا اوہ ناکامی اے۔ تے ایہدے نال نال یوٹیلٹی سٹورز دیاں شیواں دیاں قیمتاں وچ وی کئی واری وادھا کیتا جاچکا اے۔ جدوں حکومت یوٹیلٹی سٹورز اتے قیمتاں ودھاندی اے تے مارکیٹ وچ جاری کردا نرخ نامے بے معنی ہوجاندے نیں تے انتظامیالئی ایہناں نرخ نامیاں اتے عملدرآمد کرانا ممکن نہیں رہندا۔ انج ایہ سارا عمل ناصرف بے معنی ہوجاندا اے سگوں لوکائی سطح اتے ابہام وی پیدا ہوندا اے۔ حکومتی رٹ چیلنج ہوندی اے تے ناجایز منافع خوراں نوں فروغ ملدا اے۔

جے ایس ادارے وچ مسائل دا جایزا لیاجاوے تے پتا چلدا اے کہ سیاسی بھرتیاں ایس ادرے وچ بہت زیادا ہوئیاں نیں۔ آئے دن اخباراں وچ یوٹیلٹی سٹورز ملازماں دی لٹ مار دیاں خبراں پڑھن نوں ملدیاں نیں۔ کرپشن وی ہولی ہولی ایس قومی ادارے نوں دیمک وانگ چٹ رہی اے۔ ضرورت ایس امر دی اے کہ ایہناں ملازماں دیاں تنخاواں وچ وادھا کیتا جاوے تاں جے ایہ بدعنوانی ول نہ جان۔ وزیراعظم تسلسل نال پاکستان نوں ریاست مدینہ دی طرح بنانا چاہندے نیں۔ کدرے احساس پروگرام اے تے کدرے دسترخوان تے کدرے پناہ گاہواں دا منصوبا اے۔ انج ای کدرے بینظیر انکم سپورٹ دے بجٹ اتے کم کررہی اے تے کدرے راشن کارڈز دا سلسلا دوبارا شروع کرن اتے غور کیتاجارہیا اے۔ حکومتی اقدامات نوں ویکھیا جاوے تے ایہ سمجھ آوندی اے کہ اک ای طرحاں دے کئی منصوبے شروع کردتے گئے نیں پر کوئی وی منصوبا لوکائی دے حقیقی مسائل نوں حل کرن وچ کارآمد نظر نہیں آرہیا۔ اک طرحاں دے مختلف منصوبیاں دا اجرا ناقص منصوبا بندی نوں ظاہر کردا اے۔