حکومت دی سازش اے اداریاں نال لڑوایا جاوے: ن لیگی آگو رانا ثناء اللہ۔۔۔٭رویل نیوز٭

لاہور (نمایندا رویل) مسلم لیگ (ن) پنجاب دے صدر رانا ثناء اللہ خان نے کہیا اے کہ اپوزیشن نہیں سگوں حکومت ملک دشمن پراپیگنڈے نُوں اگے ودھا رہی اے‘ حکومت دی سازش اے کہ اداریاں نال لڑوایا جاوے‘ پرا یہناں نُوں دَسنا چاہندے آں کہ اداریاں نال جھیڑا ریاست دے حق وچ بہتر نہیں ہو سکدا‘ نواز شریف نُوں کسے ادارے یاں شخصیت توں مسئلا نہیں اے‘ اوہناں نُوں مسئلا اوس کردار نال اے جہڑا ووٹ تبدیل کردا اے‘ ایاز صادق دے خلاف چلن والی مہم مذمت جوگ اے‘ ایاز صادق دے خلاف بینرز حکومتی اگوائی وچ لائے گئے‘ حکومت فواد چودھری دے بیان اُتے وضاحتاں دے رہی اے تے ایاز صادق دے بیان اُتے پراپیگنڈا کر رہی اے۔