تعلیمی نظام ناصرف جدید دور دا تقاضا اے سگوں ہر بچے دا بنیادی حق اے:وزیراعظم عمران خان۔۔۔٭رویل نیوز٭

اسلام آباد (نیوز ڈیسک) وزیراعظم عمران خان نے ریاستی اداریاں دے تقدس تے تحفظ نُوں آئینی‘ سیاسی تے اخلاقی فریضا متھدیاں ہویاں کہیا اے کہ پی ڈی ایم بھارت دے ایجنڈے اُتے کم کر رہی اے‘ پی ڈی ایم دی قیادت نُوں ہر فورم اُتے جواب دِتا جاوے۔ وسیلیاں دے مطابق وزیراعظم عمران خان دی صدارت ہیٹھ حکومتی ترجماناں دا منگل نُوں اجلاس ہویا‘ اجلاس وچ مہنگائی‘ اپوزیشن دے بیانیے تے قومی سلامتی اُتے مشاورت کیتی گئی۔ اجلاس وچ ایاز صادق دے بیان اُتے وی وچار وٹاندرا کیتا گیا تے اپوزیشن دے ریاست مخالف بیانیے نُوں کاؤنٹر کرن لئی حکمت عملی طے کیتی گئی۔ اجلاس وچ پارٹی ارکان نے ایاز صادق خلاف کارروائی دا مطالبا کیتا۔ پارٹی ارکان دا کہنا سی ایاز صادق تے پی ڈی ایم قیادت دے بیاناں نال اوہناں دا ایجنڈا کھُل کے ساہمنے آ گیا۔ وزیراعظم نے کہیاکہ پی ڈی ایم بھارت دے ایجنڈے اُتے کم کر رہی اے‘ ایہناں دے کرپشن دے کیسز لوکائی دے ساہمنے لیاندے جان۔ ایس توں وکھ وزیراعظم دی صدارت ہیٹھ اِک قومی تعلیمی نصاب دے حوالے توں اجلاس ہویا جہدے وچ خطاب کردیاں ہویاں وزیراعظم عمران خان نے کہیا کہ تعلیم دے شعبے وچ ملک وچ موجود طبقاتی ونڈ نُوں ختم کرنا موجودا حکومت دی پہلی ترجیح اے‘ اِک تعلیمی نظام ناصرف جدید دور دا تقاضا اے سگوں ہر بچے دا بنیادی حق اے۔ وزیراعظم نے کہیا کہ نویں نسل نُوں خاتم النبینؐ دی حیات مبارکا تے سنت دے بارے مکمل اگاہی ہونی چاہیدی اے کیوں جے حضرت محمدؐ ای ساڈے رول ماڈل نیں تے اوہناں دی سنت ساڈے لئی مشعل راہ اے۔ وزیراعظم نے ایس گل اُتے زور دِتا کہ قومی تعلیمی پالیسی نال تعلیمی معیار وچ بہتری آئے گی تے معاشرے دے سارے طبقیاں نُوں با اختیار بنان دے مساوی موقعے ملن گے۔ وزیراعظم نے کہیا کہ ایس نظام دی کامیابی تدریسی عملے دے انتخاب تے استعداد کار وچ وادھے اُتے منحصر اے۔ نویں پالیسی دی بدولت پاکستان وچ معیاری تعلیم دا حصول ممکن ہو سکے گا اِک تعلیمی نظام خطے دے ہور ملکاں لئی تقلید جوگ مثال قایم کرے گا۔