قرضے وچ گھاٹے دا کوئی دعوا پورا نہ ہو سکیا، نیب نے 9 ارب رُپئے دی پلی بارگین کیتی:خواجا آصف۔۔۔٭رویل نیوز٭

اسلام آباد(نیوز ڈیسک) موجودا دور حکوم دے گردشی قرضے نُوں کنٹرول کرن دے سارے دعوے ہوا ہو گئے تے قرضا 1139 ارب رُپئے دے وادھے دے نتیجے وچ 2300 ارب رُپئے تک پہنچ گیا۔ رانا تنویر حسین دی صدارت ہیٹھ پبلک اکاؤنٹس کمیٹی دا اجلاس ہویا جہدے وچ وزیر توانائی عمر ایوب دے گردشی قرضے وچ کمی دے سارے دعوے ہوا ہون دا انکشاف ہویا۔ حکام پاور ڈویژن نے کہیا کہ توانائی شعبے دا گردشی قرضا بے لگام ہو گیا اے۔ موجودا دور حکومت وچ گردشی قرضے وچ 1 ہزار 139 ارب رُپئے دا وادھا ہویا جہدے نتیجے وچ قرضا 2300 ارب رُپئے تک پہنچ گیا اے۔ سیکرٹری توانائی نے دَسیا کہ پچھلے 3 مہینیاں وچ 116 ارب رُپئے گردشی قرضا ودھیا۔ مالی سال 2019 دی پہلی شماہی وچ گردشی قرضے وچ 288 ارب‘ دوجی شماہی وچ 198 ارب رُپئے دا وادھا ہویا‘ مالی سال 2020 دی پہلی شماہی وچ 243 ارب رُپئے تے دوجی شماہی وچ 294 ارب گردشی قرضا ودھیا۔ چیئرمین کمیٹی نے کہیاکہ موجودا حکومت نے 5 وار بجلی دیاں قیمتاں وچ وادھا کیتا اے‘ حکومت تے نجی پار کمپنیاں دے وچکار ہون والے نویں معاہدے وی کرپشن دے ذمرے وچ آندے نیں‘ حکومت نے نجی پار کمپنیاں دے ذمے 900 ارب رُپےء معاف کر دِتے نیں جد کہ ہور 400 ارب رُپئے ادا کرن دا واعدا کیتا اے‘ ایہ معاہدا وی لوکائی اُتے زلزلا بن کے ڈِگے گا تے لوکائی دے حقاں اُتے ڈاکا ماریا جا رہیا اے۔ ایس توں وکھ خواجا آصف دی صدارت ہیٹھ پبلک اکاؤنٹس کمیٹی دی ذیلی کمیٹی دا اجلاس ہویا جہدے وچ کے الیکٹرک تے پاکستان سٹیل ملز دا سوئی سدرن گیس کمپنی دے 164 ارب رُپئے دے نادیندڑ ہون دا انکشاف ہویا۔ ایم ڈی نے دَسیا کہ پاکتان سٹیل ملز دے ذمے 64 ارب رُپئے دے بقایا جات نیں‘ کے الیکٹرک تے پاکستان سٹیل ملز دے ذمے واجب الادا وڈی رقم توں ایس ایس جی سی نُوں اوکڑاں نُوں ساہمنا اے۔ ایس ایس جی سی ایل حکام نے دَسیا کہ گیس میٹرز لئی 28 لکھ درخاستاں پئیاں نیں‘ پر اوگرا نے صرف 4 لکھ میٹر دین دی اجازت دِتی اے۔ کنوینئر کمیٹی خواجا آصف نے پچھلے دناں 9 ارب رُپئے دی پلی بارگین اُتے تشویش دا اظہار کردیاں ہویاں کہیا کہ نیب نے 9 ارب رُپئے دی پلی بارگین کیتی پر میڈیا اُتے خبر نہیں آن دِتی‘ سیاستدان 50 لکھ دی پلی بارگین کر لین تے 4 دن تک کھل لاہی جاندی اے‘ ریاست مدینہ وچ باہر کجھ تے اندر کجھ ہور اے۔