وزیراعظم لوکائی دی طاقت توں ڈرے ہوئے نیں:بلاول بھٹو زرداری۔۔۔٭رویل نیوز٭

غذر (نیو ز ڈیسک) پاکستان پیپلز پارٹی دے چیئرمین بلاول بھٹو زرداری دا کہنا اے کہ عمران خان دی سیاست منافقت اُتے اے۔ یاسین غذر وچ جلسا عام نالخطابکردیاں ہویاں بلاول بھٹو زرداری نے کہیا کہ پیپلز پارٹی لوکائی دی خدمت اُتے یقین رکھدی اے‘ پیپلز پارٹی دا منشور گلگت بلتستان دے لوکاں دا منشور اے‘ ساڈا منشور کسے دے اشارے اُتے نہیں بنیا‘ پیپلز پارٹی گلگت بلتستان دی لوکائی نُوں حق حاکمیت تے حق مالکیت دلوائے گی‘ 15 نومبر ساڈے تے تہاڈے امتحان دا دن اے‘ ایہ عام الیکشن نہیں اِک ریفرنڈم اے‘ اسیں الیکشن جتاں گے تے کوئی نہیں کَہ سکے گا کہ ایہ سازش دا نتیجا اے۔ بلاول بھٹو زرداری نے کہیا کہ پاکستان تے چین دے وچکار معاشی تے مواصلاتی معاہدے نال گلگت بلتستان وچ ترقی دا اغاز ہویا سی‘ سی پیک منصوبا گلگت بلتستان تے گوادر دی وجھا توں ملیا پر سی پیک دے تحت گلگت بلتستان دے لوکاں نُوں حالے تک حصا نہیں ملیا‘ گلگت بلتستان دے لوک پیپلز پارٹی دے نال کھلوتے نیں۔ چیئرمین پیپلز پارٹی دا کہنا سی کہ عمران خان دی سیاست منافقت اُتے مبنی اے‘ عمران خان نے کشمیر دا سودا کیتا اے‘ وزیراعظم لوکائی دی طاقت توں ڈرے ہوئے نیں‘ عمران خان دے آن نال کرپشن‘ بیروزگاری تے رشوت خوری وچ وادھا ہویا‘ ایہناں نے 100 دن وچ تبدیلی دا وعدا کیتا‘ جنوبی پنجاب والیاں نُوں وی 100 دن وچ وکھرا صوبا دین دا وعدا کیتا سی‘ ہُن کہندے نیں تبدیلی سوئچ نہیں کہ آن کیتا جاوے‘ جدوں تک جنرل تے جج لئی وی اِکو جہیا قانون نہیں ہووے گا کرپشن دا خاتما نہیں ہو وے گا۔