صنعتاں نُوں بجلی دے گھٹ ریٹ، صوبے ٹی ٹی کیو تے سمارٹ لاک ڈاؤن دی حکمتِ عملی اُتے عملدرآمد یقینی بنان:عمران خان ۔۔۔٭رویل نیوز٭

لاہور (نیوز ڈیسک) وزیراعظم عمران خان نے چھوٹیاں تے درمیانی صنعتاں لئی توانائی دے پیکج دا اعلان کر دِتا جہدے مطابق پہلی نومبر توں صنعتاں نُوں بُہتی بجلی استعمال کرن اُتے 50 فیصد رعایت ملے گی‘ صنعتاں نُوں 24 گھنٹے آف پیک آور ملن گے‘ وزیراعظم نے ہور کہیا کہ کرونا وایرس دے ودھدے ہوئے کیسز کارن ملک دُبارا لاک ڈاؤن دا متحمل نہیں ہو سکدا۔ایہناں خیالاں دا اظہار وزیراعظم عمران خان نے اسلام آباد وچ منعقدا وفاقی کابینا دے اجلاس سنے وزیراں دے نال بریفنگ دیندیاں ہویاں کیتا۔کابینا اجلاس وچ جموں و کشمیر سٹیٹ پراپرٹی بجٹ‘ ٹیلی کام ایپلیٹ ٹریبونل دے قیام سنے پوسٹل لائف انشورنس کارپوریشن دے بورڈ آف ڈائریکٹرز دیاں نامزدگیاں دی منظوری دِتی گئی۔ وزیراعظم دا کہنا سی کہ رعایتی پیکج نال ملک وچ صنعتی ترقی وچ وادھا ہووے گا۔ اوہناں نے کہیا کہ بدقسمتی نال بجلی دے مہنگے کنٹریکٹ کیتے گئے‘ صنعتی شعبے لئی پیکج تیار اے‘ مہنگی بجلی دی وجھا توں صنعتاں نُوں مشکل دا ساہمنا اے۔ وزیراعظم عمران خان نے کہیا کہ دنیا نے منیا اے کہ پاکستان کرونا وایرس دی وباء توں سبھ توں تیزی نال نکلیا اے۔ اوہناں نے دَسیا کہ ساڈے پیکج نال برآمدات ودھن گیاں‘ چھوٹیاں تے درمیانی صنعتاں نُوں پہلی نومبر توں 30 جون تک وادھو بل اُتے 50 فیصد گھٹ ریٹ اُتے بجلی ملے گی۔ وزیراعظم نے دَسیا کہ چھوٹیاں تے درمیانے درجے دیاں صنعتاں نُوں بجلی دے گھٹ ریٹ 30 جون 2021 تک ملن گے‘ ساریاں صنعتاں نُوں وادھو بجلی اُتے اگلے 3 سال تک 25 فیصد گھٹ ریٹ اُتے بجلی ملے گی۔ وزیراعظم نے کرونا ایس او پیز اُتے سختی نال عملدرآمد کرن دی ہدایت کردیاں ہویاں کہیا کہ صوبے ٹی ٹی کیو تے سمارٹ لاک ڈاؤن دی حکمتِ عملی اُتے عملدرآمد یقینی بنان۔ ایس موقع اُتے وفاقی وزیر صنعت تے پیداوار حماد اظہر نے کہیا کہ ساریاں صنعتاں لئی پیک آورز ختم کر دِتا گیا اے‘ ہُن 24گھنٹے آف پیک ہووے گا‘ پیک آور وچ 7 توں 11 وجے تک بجلی دی کھپت اُتے 25 فیصد بھاء ودھ جاندے سن۔ وفاقی وزیر اسد عمر نے کہیا کہ ہر اوہ فیصلا کرنا اے جہدے نال معیشت دی رفتار تیز کیتی جا سکدی اے‘ مربوط اصلاحات دا پیکج بنایا گیا اے‘ توانائی سیکٹر وچ وڈے فیصلے کیتے گئے نیں۔ اوہناں نے کہیا کہ ہر اوہ کم کرنا اے کہ لوکائی دا روزگار متاثر نہ ہووے‘ اسیں چاہندے آں کہ صنعتاں دا پہیا 24 گھنٹے چلے‘ امریکی وی کہندے نیں کہ پاکستان وانگوں کرونا وایرس دی وباء دا مقابلا کیتا ہوندا تے 10 کھرب دے نقصان توں بچ جاندے۔