ذمے داراں دے خلاف معاملا فیٹف‘ انٹر پول تے اقوام متحدا وچ چُکاں گے، سرینا عیسیٰ دی  صدر نوں چِٹھی ۔۔۔٭رویل نیوز٭

اسلام آباد (نیوز ڈیسک) جسٹس قاضی فائز عیسیٰ دی گھروالی سرینا عیسیٰ نے صدر مملکت نُوں خط لکھ کے عندیا دِتا اے کہ جے اوہناں دے خاوند جسٹس قاضی فائز عیسیٰ‘ اوہناں نُوں یاں اوہناں دے خاندان نُوں کوئی نقصان پہنچایا گیا تے اوہ ذمے داراں دے خلاف معاملا فیٹف‘ انٹر پول تے اقوام متحدا وچ چُکن گے۔ 3 صفحیاں اُتے مشتمل خط وچ سرینا عیسیٰ نے کہیا کہ اوہناں دے خاوند نُوں قتل کرن اُتے اُکسان والے مولوی مرزا افتخار الدین دے خلاف دہشتگردی دیاں دفعات ختم کیتیاں گئیاں جہنوں چیلنج کیتا جا سکدا اے پر اوہناں نے انسداد دہشتگردی دی عدالت دا فیصلا چیلنج نہ کرن دا فیصلا کیتا اے کیوں جے شہریاں دی حفاظت دی ذمے دری حکومت اُتے عاید اے۔ اوہناں نے خط وچ ہور کہیا کہ ساڈے کول اسلحا بردار بندیاں دا دستا نہیں تے ساڈی سیکیورٹی صرف اللہ دی ذات اے پر جہڑے عناصر سانوں نقصان پہنچان دے در اُتے نیں اوہناں نُوں پتا ہونا چاہیدا اے کہ ہُن سانوں نقصان پہنچایا گیا تے معاملا بین الاقوامی سطح اُتے چُکیا جاوے گا۔ اوہناں نے ناں لئے بغیر مقتدر حلیاں دے بارے وچ کہیا کہ ایہ طاقت دے نشے وچ بھُل گئے نیں کہ ایہناں محشر دیہاڑ جواب دینا اے۔ سرینا عیسیٰ نے ہور لکھیا کہ میں بطور استاد اپنے شاگرداں نُوں دَسدی آں کہ غلطی دا اعتراف کرن اُتے معافی منگ لینی چاہیدی اے۔ 4 صفحیاں اُتے مشتمل خط وچ سرینا عیسیٰ نے کہیا کہ صدارتی ریفرنس راہیں میرے خلاف بدنیتی اُتے مبنی تضحیک آمیز مہم چلائی گئی‘ 19 جون 2020 نُوں تہاڈا صدارتی ریفرنس کوڑے دان وچ سُٹ دِتا گیا‘ میرے خاوند فائز عیسیٰ نُوں مرزا افتخار الدین نامی بندے نے قتل کرن دیاں دھمکیاں دِتیاں‘ پچھلے چیف جسٹس آصف سعید کھوسا نال ملاقات وچ میرے خاوند نے جائیداداں نال لاتعلقی ظاہر کیتی‘ جسٹس کھوسا نے کہیا کہ فیر تے ایہ ریفرنس سنوائی جوگ ای نہیں‘ اچانک صورتحال تبدیل ہوئی تے ریفرنس میرے خاوند دی کنڈ پچھے سپریم جوڈیشل کونسل نُوں گھل دِتا گیا‘ ریفرنس دایر ہون دے بعد پچھلے اٹارنی جنرل نے مرزا شہزاد اکبر توں میرے ٹیکس گوشواریاں دی تفصیل منگی۔ سرینا عیسیٰ نے ہور کہیا کہ صدر مملکت میرے خاوند جسٹس قاضی فائز عیسیٰ نے 3 وار تہانوں ریفرنس دی کاپی دے خطوط لکھے پر تُسیں اِک وار وی جواب دینا مناسب نہیں سمجھیا۔ اوہناں نے کہیا کہ جنابِ صدر تُسیں ایوانِ وچ بَہ کے ٹی وی انٹرویوز وچ ریفرنس اُتے وضاحت دیندے رہے‘ حکومت دی ذمے داری اے کہ اوہ شہریاں دے جان مال دی حفاظت کرے‘ میری تے میرے خاندان دی حفاظت اللہ کرے گا‘ کسے دے اشارے اُتے نچن والیوں اسیں واضح کرنا چاہندے آں ہ جے سانوں نقصان پہنچیا تے ایہناں دے ناں ایف اے ٹی ایف‘ انٹر پو تے اقوام متحدا نُوں گھلے جان گے‘ طاقتور لوک ایہ بھُل جاندے نیں کہ اوہناں نے اگلے جہان اللہ نُوں جواب دینا اے۔