پڑھیاراں نوں انگریزی فوبیا توں بچایا جا سکدا اے؟ــــــــ رویل

انگریزی سکھاون دی لوڑ ایس لئی پئی سی کہ انگریز جو اوس ویلے دے حاکم سن اوہناں نوں اپنی سیوا لئی سیواداراں دی لوڑ سی تے ایتھوں دے ذہنی غلامی قبول کیتے لوکاں نے انگریزی نوں سکھنا شروع کیتا تے وفادار سیوک بن کے جائیداداں حاصل کیتیاں سن۔ہُن جدوں وی آزادی وی لبھ گئی اے انگریزی ایس خطے دی اجہی لوڑ بن گئی جس نوں چھڈیا نہیں جا سکدا اے۔ایس نوں سکھ کے ای تعلیم دے درجے حاصل کیتے جا سکدے نیں۔جے انگریزی نہیں سکھی تاں اگلی کلاس وچ نہیں جاؤ گے ایس لئی ایہنوں اپنے واسطے لازمی سمجھ لوؤ۔

اجوکے سمے پنجاب اندر انگریزی مضمون وچوں فیل ہوون والیاں دی گنتی سبھ توں ودھ اے۔ایہدے کئی کارن نیں جہناں نوں بڑی اَسانی نال حل کیتا جا سکدا اے۔کیوں جے ایس ناکامی دا تعلق قابلیت دی تھاں بُہتا نفسیاتی کارناں دی وجھا توں اے۔

انگریزی توں بلکل خوف نہیں رکھنا چاہیدا سبھ توں پہلاں ایس خوف نوں مکانا ضروری اے ایس مضمون نوں وی عام مضموناں وانگ ای سمجھیا جاوے۔اوہناں پڑھیاراں دیاں گلاں ول اُکا دھیان نہ دِتا جاوے جو ہر ویلے ایہ ای الاپدے رہندے نیں کہ انگریزی وچ پاس ہونا بُہت اوکھا اے۔اوہ ناکامی حاصل کرن والیاں دے وچار وی نفسیاتی طور تے پڑھیاراں نوں کمزور کر دیندے نیں۔

انگریزی نوں اِک اَسان مضمون وانگ سمجھیا جاوے تے ایس نوں سال دے شروع وچ ای پڑھن دا چارا کیتا جاوے جے سال دے شروع وچ ای پڑھن تے یاد کرن دا معمول بن جاوے تاں بڑی اَسانی نال سلیبس نوں مکمل کیتا جا سکدا اے۔انج کرن نال بہت سارے پڑھیاراں نوں کامیابی مل سکدی اے کیوں جے انج بوجھ نہیں محسوس ہوندا اے تے اوہ یاد وی کر لیندے تے فیر ایس نوں ہمیش لئی اپنی یادداشت وچ محفوظ کر سکدے نیں۔اک نالائق پڑھیار وی ایسراں کرن نال کامیاب ہو جاوے گا۔

صرف یاد کر کے چھڈ دیون نال پڑھیاراں واسطے ٹھیک نہیں اے۔یاد کرن دے عمل نوں وِیہ فیصد تے دُہرانrevise دے عمل نوں اَسی فیصد اہمیت دین دی لوڑ رہندی اے۔

انگریزی نوں روز پڑھیا جاوے،تے پڑھن دا طریقا انج رکھیا جاوے کہ اینا اُچا پڑھیا جاوے جس نال واج تہاڈے کناں تیکر ضرور اپڑے۔جدوں پڑھ کے فارغ ہوؤ تاں دس توں پندرھاں منٹ تک ضرور لکھو بھاویں دیکھ کے ای لکھو۔

سبھ توں پہلاں نصاب نوں مُکاون دا جتن کیتا جاوے،ویکھیا گیا اے کہ پڑھیار انگریزی پڑھدیاں ہوئیاں انگریزی دے عالم بنن دی چاہ رکھدیاں ہوئیاں سلیبس توں وکھ لفظاں نوں یاد کردیاں ہوئیاں اپنی ساری دماغی صلاحیت اوہناں تے لا دیندے نیں جہدا نتیجا ایہ نکلدا اے کہ انگریزی تاں پڑھیار ں چوکھی آندی اے پر سلیبس نہ یاد ہوون کر کے اوہ وار وار فیل ہوئی جاندا اے۔

سِدھا ٹیکسٹ بُک توں نہ یاد کرو کیوں جے اوہدے تے لکھاریاں دے جو لیکھ ہوندے نیں اوہدے وچ اوکھے لفظاں دا ورتارا کیتا گیا ہوندا اے۔سبق یاد کرن لئی سوال جواب تے اَسان ہوونے چاہیدے نیں ایس مقصد نوں ویکھدیاں ہوئیاں اجہیا خلاصہ لبھو جو تہانوں اَسان لگے۔ اجہیا خلاصہ نہ لوؤ جو تہانوں تاں اَسان نہیں لگا پر کے یار بیلی دے کہن اُپر تُسیں لے لئی اے تے تہانوں سمجھ اُکا نہیں آ رہی اے۔کئی خلاصیاں والیاں نے غیر ضروری لمے لمے جواب لکھے ہوئے نیں جو پڑھیاراں نوں مشکل وچ پا دیندے نیں۔ایہ یاد رکھو جِنا لما جواب ہووے گا اوہدے وچ سپیلنگ غلط ہوون دا وی ڈر ہوئے گا تے tenseوی وگڑ جاون کر کے پورا جواب غلط ہو سکدا اے۔

روز دے تِن نویں لفظ ضرور سکھے جاون، شروع وچ ایہ لفظ ٹیکسٹ بُک توں ای لئے جاون تاں ٹھیک اے۔ہر سبق دے اخیر تےglossaryدِتی گئی ہوندی اے جس وچ انگریزی توں اَسان انگریزی وچ مطلب دِتا گیا ہوندا اے۔شروع وچ پنجاہ، سو لفظ یاد کرن توں بعد ہر سبق وچ نویں یاد کرن والے لفظاں دی تعداد گھٹدی جاوے گی۔فیر ایہناں لفظاں دے نال نال کئی جُملے وی بنانے آ جاندے نیں کیوں جے معانی نوں سمجھاندیاں ہوئیاں جُملے بنائے گئے ہوندے نیں۔

ہجے (سپیلنگ) ضرور یاد کیتے جاندے نیں کیوں جے پرچیاں وچ نوّے فیصد پرھیار ہجیاں سپیلنگ دی غلطی کردے نیں جس کر کے سوال دا پورا جواب غلط ہو جاندا اے۔

ایہ گل ذہن وچوں کڈھ دیو کہ انگریزی صرفtensesنال ای آندی اے۔tensesانگریزی واسطے ضروری نیں پر سو فیصد ایہناں دے پِچھے لگے رہن کر کے پڑھیار فیل ہو جاندے نیں۔ Tenses دی تھاں (لفظاولی) vocabulary سکھن تے زور دِتا جاوے۔جے ایہناں نوں سکھن دی لوڑ وی ہووے تاں فیر Present IndefiniteتےPast Indefiniteنوں یاد کر لیا جاوے کیوں جے ایہ دونوں حالتاں ای پڑھیارانوں سبھ توں چوکھیاں کم آندیاں نیں۔ ایہ دونوں tensesنال خُد لکھن دا تجربا وی کرنا چاہیدا اے۔سیلف رائٹنگ پڑھیاراں واسطے بُہت ضروری ہوندا اے شروع وچ صرف اپنی روٹین نوں ای انگریزی وچ لکھن دی پریکٹس کرو۔سویر نوں اُٹھن توں بعد شام تک دے ٹاویں ٹاویں کماں نوں اپنے لفظاں وچ لکھن دا چارا کرنا چاہیدا اے۔

کلاس روز پڑھی جاوے تے سبق وچ کیہ بیان ہوندا اے ایس بارے جانکاری ملدی اے نالے کہانی وچ اندر دی کیہ فلاسفی اے تے سوال کویں بن سکدے نیں ایس بارے جاننا وی ضروری ہوندا اے۔

سبقاں داترجما ضرور پڑھ لیا جاوے تاں جو پتا چلے کہ اوس سبق وچ کیہ دسیا گیا اے کرداراں دے ناں تے تھاواں نوں چیتے وچ رکھ لیا جاوے۔اگلی منزل انگریزی اخبار پڑھن دی اے،سارا اخبار پڑھن دی لوڑ نہیں دو چار سطراں وی کافی نیں۔نصاب مکمل کرن توں بعدوں جے ویلا ہووے تاں انگریزی دے کُجھ اکھر جو یاد کیتے گئے نیں اوہناں نوں روز دی بول چال وچ ورتیا جاوے۔