جسٹس قاضی فائز ریفرنس وچ سپریم کورٹ دے دو ججاں دا اختلافی نوٹ۔۔۔٭رویل نیوز٭

اسلام باد (نیوز ڈیسک) جسٹس قاضی فائز ریفرنس وچ سپریم کورٹ دے دو ججاں دا اختلافی نوٹ ساہمنے آ گیا۔ جسٹس منصور علی شاہ نے 65 صفحیاں اُتے مشتمل اختلافی نوٹ لکھیا جہدے وچ اوہناں نے لکھیا کہ وحید ڈوگر نے جج دے خلاف ایکشن لئی شکایت دا اندراج کروایا‘ شکایت کنندا نُوں جسٹس قاضی فائز عیسیٰ دی گھروالی دا سپینش ناں پتا ہونا تے لندن جائیدادں ا تک رسائی حاصل کرنا حیران کن اے‘ شہزاد اکبر نے نہیں دَسیا کہ وحید ڈوگر نُوں ایس سبھ دے بارے وچ کویں پتا لگا‘ وحید ڈوگر دا درجا اِک شکایت کنندا دا سی اِک صحافی دا نہیں‘ وفاق دا ایہ مؤقف درست نہیں کہ صحافی نُوں ایہدا وسیلا دَسن اُتے مجبور نہیں کیتا جا سکدا‘ ایہنے اپنی تحقیقاتی خبر کسے اخبار وچ چھاپی وی نہیں‘ ایہنوں شکایت لئی معلومات فیڈ کیتیاں گئیاں‘ جہنے وی وحید ڈوگر نُوں ایہ معلومات دِتیاں اوہ ایس کہانی دے اصل کردار نیں۔ جسٹس منصور نے اختلافی نوٹس وچ کہیا کہ کلّے چیئرمین اے آر یو شہزاد اکبر نے جج دے خلاف انکوایری دا فیصلا کیتا‘ وزیر قانون فروغ نسیم نے اے آر یو دی انکوایری اُتے کوئی اعتراض نہیں چُکیا‘ شہزاد اکبر ولوں چُکے گئے اقدامات توں وزیراعظم لا علم سن‘ پر اوہناں نے وزیر قانون تے شہزاد اکبر توں ایہناں دے غیر قانونی اقدامات اُتے کجھ نہیں پُچھیا‘ صدر مملکت نے وی ایہو جہیا کوئی سوال پُچھے بغیر ریفرنس اُتے دستخط کر دِتے۔ جسٹس منصور علی شاہ نے لکھیا کہ جائیداداں دا معاملا ایف بی آر نُوں گھلن دا مطلب ججز فیملی معاملات اُتے جوابدہ نیں‘ ججز دی خوابدہی دا ایہ تصور کوڈ آف کنڈکٹ دے خلاف اے‘ جہدا عدالتی ساکھ نال کوئی تعلق نہیں‘ عدلیا دی ازادی تے عدلیا دا احتساب دو اہم تھم نیں جہناں اُتے کوئی سمجھوتا نہیں ہو سکدا‘ ایہ دوویں تھم رَل کے لوکائی دا اعتماد تے عدالتی نظام دی سچائی نُوں قایم رکھدے نیں‘ آئین ہر شہری نُوں حکومت دی مداخلت دے بغیر ازادی فراہم کردا اے‘ جسٹس عیسیٰ دے خاندان نُوں وی شہریاں وانگوں ازاد ی تے تحفظ حاصل اے‘ جسٹس عیسیٰ دی گھروالی تے بچیاں نُوں بُلاکے نہ سُنیا گیا تے نہ ای فریق بنایا گیا۔ جسٹس منصور علی شاہ نے اختلافی نوٹس وچ متھ دِتا کہ ایف بی آر نُوں تحقیقات دیاں ہدایتاں دین دی لوڑ نہیں سی‘ کونسل کسے وی جج دے معاملے اُتے از خُد نوٹس لین وچ ازاد اے‘ اداریاں نُوں اختیارات نہ ہون اُتے سپریم کورٹ اپنے حکم نال اختیارات نہیں دے سکدی‘ ایف بی آر دی رپورٹ کونسل دے ساہمنے جج دے خلاف اِک نویں شکایت ہووے گی‘ ایف بی آر نُوں آرٹیکل 209 دے تحت صدر نُوں اپروچ کرن دا اختیار نہیں‘ وفاقی حکومت یاں ایہدے ادارے جج دے کنڈکٹ اُتے کونسل نُوں شکایت نہیں کر سکدے۔ جسٹس منصور علی شاہ نے اختلافی نوٹ وچ کہیا کہ جسٹس قاضی فائز عیسیٰ دا ایہ موقف درست اے کہ اوہناں خلاف ریفرنس قانون تے حقایق دی بدنیتی اُتے مبنی اے‘ اوہناں نُوں عہدے توں بے دخل کرن لئی سرکاری مشینری دا استعمال کیتا گیا جہدے وچ درخاست گزار دی خُفیا نگرانی وی شامل اے۔ جسٹس قاضی فائز عیسیٰ نُوں جان بُجھ کے فیض آباد دھرنے دے فیصلے اُتے ٹارگٹ کیتا گی‘ فیض آباد دھرنا کیس دا فیصلا اقتدار وچ بیٹھے لوکاں لئی اختلاف دا کارن بن گیا‘ جسٹس فائز عیسیٰ خلاف انتقام تے ناراضگی نظرثانی دیاں درخاستاں وچ واضح اے جہناں وچ فائز عیسیٰ اُتے الزامات لائے گئے تے ایہناں نُوں ہٹان دی استدعا کیتی گئی۔ جسٹس منصور علی شاہ نے متھ دِتا کہ انتقام تے ناراضگی دی وجھا توں جسٹس عیسیٰ خلاف بوگس کمپلینٹ نُوں پذیرائی دِتی گئی‘ اسیٹ ریکیوری یونٹ وچ مبہم درخاست دا اندراج کیتا گیا‘ جسٹس قاضی تے اوہناں دی فیملی دی نگرانی کیتی گئی‘ اوہناں دے خلاف غیر قانونی طریقے نال مواد اکٹھا کیتا گیا۔ جہنوں وزیراعظم دی ایڈوائز دے نال صدر مملکت نُوں گھلیا گیا‘ ایس لئی شکایت کنندا دی شکایت نُوں پذیرائی دین دے سارے اقدامات کالعدم متھے جاندے نیں‘ ریفرنس بدنیتی اُتے مبنی اے تے صدر مملکت نُوں ریفرنس نُوں منظور کر کے اگے گھلن دا اختیار نہیں سی۔ جسٹس مقبول باقر نے وی 68 صفحیاں اُتے مشتمل اختلافی نوٹ وچ لکھیا کہ ریفرنس کالعدم متھن دے بعد جج دے گھروالیاں دیاں جائیداداں تے اوہناں دے ٹیکس بارے معاملات عوامی مفاد دے زمرے وچ نہیں آندے‘ ایف بی آر قوانین دے مطابق 2013-14 تک خریدیاں گئیاں جائیداداں دے آمدن وسیلیاں بارے معاملے دی تحقیقات نہیں ہو سکدیاں‘ جسٹس قاضی فائز عیسیٰ اُتے لائے جان والے الزامات بے بنیاد تے بدنیتی اُتے مبنی نیں۔