مہنگائی تے بیروزگاری نال مقابلا اے:بلاول بھٹو زرداری ۔۔۔٭رویل نیوز٭

گلگت (نمایندا رویل) چیئرمین پیپلز پارٹی بلاول بھٹو زرداری دا کہنا اے کہ پی ٹی آئی حکومت نے پُرامن احتجاج دا ہر راہ بند کر دِتا اے۔ استور وچ جلسے نال خطاب کردیاں ہویاں چیئرمین پیپلز پارٹی بلاول بھٹو زرداری دا کہنا سی کہ عمران خان دے دور حکومت و چ لوکاں توں روزگار کھوہیا جا رہیا اے‘ ایہ حکومت لوکائی دے نال نا انصافی کر رہی اے‘ ایہ اوہ جماعت اے جہڑی سبسڈی کھوہندی اے‘ انڈسٹری لئی بجلی دی قیمت گھٹ کر رہے نیں‘ عام بندے اُتے بھار پاء رہے نیں‘ اج لوکائی تواریخی مہنگائی تے بیروزگاری دا مقابلا کر رہی اے‘ پہلے زراعت تباہ کیتی ہُن کساناں توں احتجاج دا حق وی کھوہ لیا گیا‘ پی ٹی آئی حکومت نے پُرامن احتجاج دا ہر راہ بند کر دِتا اے‘ لوکائی ایس حکومت دی نالایقی دا بھار چُک رہی اے۔ بلاول بھٹو نے کہیا کہ پیپلز پارٹی نے ہمیشا گلگت بلتستان دی لوکائی دی خدمت کیتی اے‘ ساڈا دور آیا تے گلگت بلتستان نُوں شناخت دِتی گئی‘ ایتھوں دے نوجواناں نُوں پورے ملک دے اداریاں چ نوکری دلوائی‘ اسیں جو جو کم کیتے ایہدا فایدا اج تک ہو رہیا ا۔ چیئرمین پی پی پی نے کہیا کہ پورے پاکستان وچ وی اِک ای جماعت اے جہڑی غربت تے بیروزگاری دا مقابلا تے خاتما تے روزگار دے موقعے پیدا کر سکدی اے‘ بے نظیر انکم سپورٹ پروگرام اج تک غربت دا مقابلا کر رہیا اے۔