اِک کروڑ کرونا ویکسین منگوان دا فیصلا ۔۔۔٭رویل نیوز٭

اسلام آباد (نیوز ڈیسک) حکومت نے 1 کروڑ شہریاں لئی ابتدائی طور اُتے کرونا ویکسین منگوان دا حتمی فیصلا کر لیا‘ 100 ملین ڈالر بکنگ لئی مختص کر دِتے گئے‘ وزیراعظم توں منظوری لئی چٹھی بڑی چھیتی گھل دِتی جاوے گی‘ تشویش جوگ تے وڈیری عمر دے روگیاں نُوں فوری ویکسین لائی جاوے گی‘ وزارت صحت دیاں اہم تجویزاں اُتے سمری تیار کر لئی گئی‘ معلومات دے مطابق وزارت صحت نے اِک سمری تیار کیتی اے جہدے وچ اوہناں نے تجویز دِتی اے کہ 1 کروڑ بزرگ تے تشویشناک روگیاں لئی کرونا ویکسین بُک کروان لئی 100 ملین ڈالر مختص کر دِتے نیں تے کہیا گیا اے کہ کرونا وباء دی شدید سردیاں وچ دوجی لہر آئی اے جہدے نال عام شہریاں دے علاوا وڈی عمر دے شہریاں تے وینٹی لیٹرز تے ہور ایہو جہے روگیاں جہناں دی حالت ماڑی ہووے گی اوہناں نُوں ویکسین فوری طور اُتے دِتی جاوے گی‘ وزارت صحت دے وسیلیاں دے مطابق وزیراعظم توں منظوری لین لئی بریف سمری دے نال اِک تجویزاں دا رُکا وی گھلیا گیا اے تے امید کیتی جا رہی اے کہ بڑی چھیتی بکنگ لئی اقدامات چُکے جان گے۔