پاکستانی لوکائی اپنے بوسنیا دے بھرواں دے نال  اے: عمران خان۔۔۔٭رویل نیوز٭

اسلام آباد (نمایندا رویل) وزیراعظم عمران خان نے کہیا اے کہ بوسنیا دے نال سارے شعبیاں وچ تعلقات دے چاہیوان آں۔ پاکستانی لوکائی اپنے بوسنیا دے بھرواں دے نال کھلوتی اے۔رائے دے اظہار دی ازادی دی آڑ وچ کوئی وی مسلمان اپنے نبی حضرت محمدؐ دی گستاخی برداشت نہیں کر سکدا‘ کشمیر اُتے پاکستان دے موقف دی حمایت کرن اُتے بوسنیا دے شکر گزا ر آں۔ منگل نُوں بوسنیا دے صدر شفیق جعفرو وچ وزیراعظم ہاؤس پہنچے جتھے اوہناں نُوں گارڈ آف آنر پیش کیتا گیا‘ جہدے بعد سائنس و ٹیکنالوجی سنے ہور مختلف شعبیاں وچ مفاہمتی یادداشتاں اُتے دستخط کیتے گئے۔ وزیراعظم عمران خان نے چیئرمین بوسنیا پریذیڈنسی شفیق جعفرو وچ نال ملاقات تے مفاہمتی یادداشت اُتے دسخط دے بعد سانجھی پریس کانفرنس کردیاں ہویاں کہیا کہ بوسنیا دے صدر نُوں پاکستان آمد اُتے خش آمدید کہندا آں‘ پاکستانی لوکائی بوسنیا دی لوکائی دے نال شانا بشانا کھلوتی اے۔ وزیراعظم نے کہیا کہ بوسنیا نے مشکل ویلا ویکھیا اے تے اسیں دوہاں ملکاں دے وچکار تعلقات ہور ودھان دے چاہیوان آں‘ دوہاں ملکاں نے تجارت سنے مختلف شعبیاں وچ تعاون تے تعلقات وچ وادھے دا فیصلا کیتا اے تے بوسنیا دے نال تعلقات نُوں پاکستان خصوصی اہمیت دیندا اے۔ عمران خان نے کہیا کہ مقبوضا کشمیر اُتے پاکستان دے موقف دی تائید اُتے بوسنیا دے صدر دا مشکور آں تے دنیا نُوں پتا اے کہ ایس ویلے بھارت کشمیر وچ کیہ کر رہیا اے۔ اسیں ملاقات وچ فرانس وچ مسلماناں خلاف حالیا واقعات اُتے وی گلبات کیتی اے۔ اوہناں نے کہیا کہ مغرب نُوں سمجھنا چاہیدا اے رائے دی ازادی دا مقصد دل ازاری نہیں ہونی چاہیدی تے رائے دے اظہار دی ازادی نُوں کسے مذہب دے خلاف استعمال نہیں کرنا چاہیدا‘ کوئی وی مسلمان اپنے آخری پیغمبر حضرت محمدؐ دی گستاخی برداشت نہیں کر سکدا۔ آپ ؐ دی حرمت مسلماناں لئی اہم معاملا اے‘ بوسنیا دے صدر فیق جعفرو وچ نے کہیا کہ پاکستان آ کے خُشی محوس ہوئی اے‘ دوہاں ملکاں دے وچکار خوشگوار تعلقات پائے جاندے نیں تے بوسنیا پاکستان دے نال تعلقات نُوں قدر دی نگاہ نال ویکھدا اے۔ اوہناں نے کہیا کہ بوسنیا وچ جنگ دے دوران پاکستان دی امداد اُتے مشکور آں تے تعلیم‘ تجارت سنے ہور شعبیاں وچ پاکستان دے نال کم کرن دے وی خاہاں آں۔ اقوام متحدا دے امن مشنز وچ پاکستانی دستیاں نے اہم کردار ادا کیتا‘ دوہاں ملکاں نے مشکل دی گھڑی وچ اِک دوجے دا ساتھ دِتا۔ مسئلا کشمیر اُتے گل کردیاں ہویاں بوسنیا دے صدر نے کہیا کہ مسئلا کشمیر اُتے ساڈے موقف وچ تبدیلی نہیں آئی اے تے ایہنوں اقوام متحدا دیاں قرار داداں دے مطابق ای حل ہونا چاہیدا اے۔ اوہناں نے کہیا کہ فرانس وچ گستاخانا خاکیاں دا معاملا مذمت جوگ اے جد کہ آسٹریا تے افغانستان وچ دہشتگردی دے واقعات دی مذمت کردے آں۔