عمران خان جعلی وزیراعظم‘ تبدیلی سرکار نے پاکستان وچ تباہی مچا دِتی،گلگت بلتستان وچ ووٹ چوری ہویا تے ایہدا تماشا پوری دنیا ویکھے گی:مریم نواز۔۔۔٭رویل نیوز٭

سکردو (اُچیچا نمایندا) مسلم لیگ (ن) دی نائب صدر مریم نواز نے کہیا اے کہ گلگت بلتستان وچ ووٹ چوری ہویا تے ایہدا تماشا پوری دنیا ویکھے گی‘ لوکائی ووٹ دی پامالی نہ ہون دیوے‘ الیکشن توں پہلاں پارٹی دے 8 توں 9 لیگی امیدواراں دیاں وفاداریاں تبدیل کیتیاں گئیاں‘ نواز شریف دا پیغام اے کہ پارٹی دی پِٹھ وچ چھُرا کھوبن والیاں نُوں لوکائی ووٹ نہ دیوے تے الیکشن پولنگ ڈے اُتے ایہناں لٹیریاں دا گھیراؤ کرو۔ عمران خان جعلی وزیراعظم نیں‘ تبدیلی سرکار نے پاکستان وچ تباہی مچا دِتی‘ گلگت بلتستان دی لوکائی ووٹ دی طاقت نال ایس خطے نُوں تباہی توں بچائے‘ وزیراعظم نُوں اپنے حقاں دا نہیں پتا اوہ آپ کسے دی نوکری کردے نیں‘ ایہ جعلی وزیراعظم اے صوبا بنان دا وعدا جھوٹھ‘ حکومت نُوں آخری دھکا گلگت بلتستان دی لوکائی مارے گی‘ پاک فوج دی تھاں ساڈے دلاں وچ اے۔ ایہناں خیالاں دا اظہار اوہناں نے جمعرات والے دن سکردو پہنچن اُتے میڈیا تے عوامی اجتماع نال خطاب کردیاں ہویاں کیتا۔ مریم نواز نے کہیا کہ سانوں سمجھ اے کہ وزیراعظم مجبور اے تے ایہنوں اپنے حقوق نہیں پتا اوہ آپ کسے دی نوکری کردا اے پر اوہناں لئی تے کجھ کردے جہناں دے حقاں لئی کرسے اُتے بیٹھے او۔ مریم نواز نے حکومت تے وزیرعظم نُوں تنقید دا نشانا بناندیاں ہویاں کہیا کہ 50 لکھ گھر بنان تے 1 کروڑ نوکریاں دین دا وعدا جھوٹھا اے‘ تہاڈا ہر وعدا جھوٹھا اے‘ تہاڈا گلگت بلتستان نُوں صوبا بنان دا وعدا فریب اے تے ایس چالاکی نُوں گلگت دی لوکائی چنگی طرحاں سمجھدی اے۔ مریم نواز دا کہنا سی کہ جھوٹھے وعدے کرن والے نُوں گھر پہنچا کے آنا اے‘ ایہ جہڑا مونہ اُتے ہتھ پھیر کے گل کردا اے ایہ جان والا اے‘ ایہناں نُوں پریشانی بلا وجا نہیں سگوں ایہ جاندا نظر آ رہیا اے‘ بس آخری دھکا گلگت دی لوکائی مارے گی۔ گلگت بلتستان اُتے جدوں میٹنگ ہو رہی سی وزیراعظم نال والے کمرے وچ لُک کے بیٹھے سن۔ اوہناں نے ہور کہیا کہ نواز شریف اِک انسان دا ناں نہیں سگوں اِک وعدے دا ناں اے‘ اج وی 70 سال دی عمر وچ بیماری دی حالت وچ عوامی حق لئی چٹان وانگوں کھلوتا اے۔ مریم نواز نے کہیا کہ پاکستانی فوج دی دل توں قدر کردے آں پر ایہناں دی تھاں ساڈے دلاں تے سرحداں اُتے اے‘ فوج دی تھاں پولنگ سٹیشن وچ نہیں اے۔ ن لیگ دی نائب صدر دا کہنا سی کہ حکومت ڈیگن یاں بنان دا ختیار کسے ادارے یاں کجھ بندیاں نُوں نہیں سگوں ایہدا اختیار صرف لوکائی نُوں اے‘ الیکشن والے دن تُسیں حق تے حرمت لئی کھڑا ہونا اے‘ پارٹی چھڈن والیاں دا گھیراؤ کرنا اے‘ ایہناں نُوں ووٹ نہیں دینا‘ جہڑے ووٹ چوری کر کے آندے نیں اوہ ووٹ چوراں نُوں جوابدہ نیں‘ اسیں تہاڈے ووٹاں نال آندے آں‘ تہانوں جوابدہ آں‘ ایہ نواز شریف دی تقریر توں ڈردے نیں‘ شیر اُتے مہر لان دا مطلب اے تُسیں اپنی ترقی اُتے مہر لاؤ گے‘ ووٹ چوراں دے اگے سر نیواں نہیں کراں گے‘ جے گلگت بلتستان وچ ووٹ چوری ہویا تے تماشا پوری دنیا ویکھے گی‘ جہڑی چوری ہونی سی ہو گئی ہُن ایہدے بعد لوکائی اجازت نہیں دیوے گی‘ جے لو کائی ویکھے کہ ووٹ چوری ہو رہیا اے تے ایہناں کرداراں نُوں بے نقاب کرن۔ ایس توں وکھ جلسے نال خطاب کردیاں ہویاں مریم نواز نے کہیا کہ ووٹ چور گلگت بلتستان اُتے منڈلا رہے نیں‘ ووٹ چوراں دے اگے جھُکنا نہیں‘ لوٹے تھوڑا جہیا دباء وی برداشت نہیں کر سکدے‘ لوٹیاں نُوں دریا وچ روڑھ دوو تے ووٹ نہ دوو‘ مداری دی حکومت دیاں لتاں کنبن لگیاں نیں‘ کسے دے صرف اعلان کرن نال صوبا نہیں بن جاندا‘ گلگت بلستان نُوں صوبا نواز شریف ای بنان گے۔ اوہناں نے کہیا کہ دل توں تہاڈیاں محبتاں تے شفقتاں دا شکریا ادا کردی آں‘ میں وعدا کردی آں کہ میں نواز شریف وانگوں تہاڈی خدمت کراں گی۔ اوہناں نے کہیا کہ میں مسلم لیگ تے تہاڈے رشتے نُوں ٹُٹن نہیں دواں گی‘ جدوں گلگت بلتستان دا سر اُچا رہندا اے تے پاکستان دا سر اُچا رہندا اے‘ میں تہاڈے حقاں لئی لڑاں گی۔ اوہناں نے وزیراعظم اُتے تنقید کردیاں ہویاں کہیا کہ مداری دی حکومت دیاں لتاں کنبن لگیاں نیں‘ گلگت بلتستان نُوں صوبا بنان لئی 3 سال نواز شریف نے کم کیتا‘ ہُن صوبے دا اعلان وی نواز شریف ای کرے گا‘ سلیکٹڈ یاد رکھو گلگت بلتستان دی لوکائی سمجھدا اے‘ ووٹ چو ر دے اعلان دی ہُن کوئی حیثیت نہیں اے۔ گلگت بلتستان دے شیراں دی قیادت 1 شیر ای کر سکدا اے‘ جے گِدڑ دی حکومت بنی تے تُسیں اپنا مقدما ہار جاؤ گے‘ گِدڑاں تے ووٹ چوراں دے اگے جھُکنا نہیں‘ اپنے ووٹاں نُوں بوٹاں تھلے مدھن نہیں دینا‘ سیاچن اُتے کھلوتے فوجیاں نُوں اسیں سارے سلام کردے آں‘ سیاچن دے جوانو‘ تُسیں مریم نواز ورگیاں ماواں تے بھینا ں دا سہارا وی او‘ نواز شریف نے اپنے دور حکومت وچ جنی خدمت گلگت دی کیتی‘ ایہدی مثال نہیں ملدی۔