kraamaat@gmail.com
+ +92 333-430-6384


اجوکی تبدیلی دا سفر ۔۔۔۔۔٭رویل کالم٭


الیاس عباسی November 06, 2020


اجوکی تبدیلی دا سفر ۔۔۔۔۔٭رویل کالم٭

الیاس عباسی

انسان بدل رہیااے ، سوچاں بدل رہئیاں نیں ہر شے بدل رہی اے حضرت انسان نے تبدیلی دا اجہیا بھرواں وکھالا شاید ای پہلی وار ویکھیا ہووے ایس تبدیلی نے جتھے ودھیا کم وکھائے نیں اوتھے انسان توں ازادی کھوہ چھڈی اے اج دا انسان غلام اے اوہدی سوچ تے پابندی اے جو ،،وڈے،، چاہندے نیں تے اوہو ای ہوندا اے کجھ یار دوست سمجھدے نیں کہ ایہہ انسان دا سُپر ہیومن ول جاون دا پہلا قدم اے تے جہدا بھرواں مُل اے تے ایس توں ڈر کے اسیں اگے ودھن دا سفر کیوں روک چھڈیئے ؟

اتہاس توں سبق مل دا اے کہ جہنے ایس بدلاؤ نوں روکن دی کوشش کیتی اج اوہناں دی ہوند دی نشانی وی ملنی اوکھی اے سیانپ اے کہ اسیں گزرے کل توں آون آلے کل ول جھات پائیے

ایس ادلا بدلی دے دور وچ ساڈا تعلق وی بدل چکیا اے کائنات دے دوجیاں سیارے نال ساڈے سنبندھ بدل رہے نیں مریخ تے پہنچن دی دوڑ ہووے یاں سمندراں وچوں معدنیات لبھن دا جتن ہووے انسان ہار نہیں من رہیا تے اوس دی بھُکھ کئی واری معصوم جاناں دی بلی وی منگ دی اے ترکی تے یورپ وچکار سرد جنگ مفادات دی اے جہڑی اج دے کارپوریٹ انسان دیمجبوری اے سوشلزم دی ہار تے فری مارکیٹ دے نظریے دی جِت نیں اج پوری دنیا دا نقشہ ای بدل چھڈیااے ایس جھگڑے توں بعد زندارہن لئی نویں ڈھنگ بنے نویاںتےنویاںکہانیاں دا جنم ہویا۔

ساڈی دنیا دی تواریخ وچ ہزاراں انقلاب آئے نیں جہدے راہیں ساڈی اجوکی حالت بنی اے تے کجھ سوشل سائنس دے ماہرسمجھ دے نیں کہ اصل انقلاب ،،توانائی دا انقلاب،، اے تے اج اسیں چنگے تے ودھیاڈھنگ نال اپنیاں لوڑاں پُوریاں کرن جوگے ہوگئے آں پانی توں ماحول دوست توانائی پان جوگ ہوگئے آں سمندراں دے پانیاں توںٹکرکھاندیاں تیز ہواواں نال بجلی بناکے سماج وچ چانن پھیلاون جوگ ہوگئے آں کائنات دی فیاضی توں فائیداچُکنا عقلمندی اے تے ایس فائدے نوں ہرتھاں ، ہرکسے تیکر بغیر کسے ونڈ توں پہنچانا وی اج دا فرض اے۔

انسان دی اپنی تخلیق ٹیکنالوجی دے ہتھیںانسان نوںوختاپیا ہویا اے کئی تگڑے مُلکاں وچ پہلامسئلابے روزگاری دا اے جتھے اجوکی ٹیکنالوجی نے روایتی ڈھنگ نال مال بنان دے طریقے بدل دتے ، انسان دی تھاں ، مشیناں آگیاں ۔ صحت، تعلیم تے سروسز سیکٹر وچ ایس ٹیکنالوجی نوں ورتیا جارہیااے جہنے انسانی تکلیفاں مُکاون وچ مسیحائی کردار پیش کیتا اے ہن ورچوئیل حقیقت راہیں آسانیاں پیدا کیتی جارہیاں نیں کسے وی ماڑے ملک دامریض ، انٹرنیٹ راہیں ترقی یافتا ملک دے ماہر فزیشین کولوں اپنا علاج کروان جوگا ہوگیا اے تے روبوٹیکس دے عمل نے ماہر سرجن دی تھاں لے لئی اے تے انسان دی تکلیف گھٹ کرن ول اک ہور نِکا جہیاقدم اے۔

اجوکے ویلے دی لوڑ اے کہ اسیں وی غلامی توں باہر نکل کے سائنس نوں پڑھیے چُبھن رکھن والے سوالاں توں ڈرکے منہ لُکاون دی لوڑ نہیں۔

تخلیقی عمل نوں ودھاون لئی سکولاں دے نصاب نوں بدلیا جاوے تے چوتھے وڈے صنعتی انقلاب توں بعد ہون والی جدت دا سبق دتا جاوے آرٹیفیشیل انٹیلیجنس حقیقت بن چُکی اے ایس کھیتر وچ کم کرن دی لوڑ اے ساڈے تعلیمی اداریاں وچ نویں شعبے بنان دی لوڑ اے ہُن روایتی صنعتاں دا ویلا مُک گیا اے تے اپنی صنعتی تے ٹیکنالوجی اداریاں اندر وی تبدیلی لیاون دے جتن کیتے جاون ۔ اجوکی حقیقت اے کہ اوہی قوماں زندا رہندیاں نیں جہڑیاں معاشی تے سائنسی طاقت رکھن اج دے دور وچ ٹینک تے چڑھ کے کوئی دُوجا ملک ، کسے دُوجے ملک تے حملہ نہیں کردا۔ امریکا ، چین تے یورپ دے تگڑے ملکاں نوں کسے تے حملہ کرن دی نوبت ای پیش نہیں آئی۔

جے اسیں اپنے ماضی ول جھات پائیے تاں پتہ لگدا اے کہ تبدیلی دا عمل بہت ای ہولی رہیا اے ایس گل دا اندازا لالِوو کہپہلا اکھر لِکھن توںتوں پرنٹنگ دے عملتیکرسانوں کوئی دس ہزار ورھے لگے تے اجوکے ٹیکنالوجی دے دور وچ تبدیلی دا ایہ سفر ورھیاں توں مہینیاں ، مہینیاں توں دناں تے دِناں چوں لمحیاں وچ پرت گیا اے کل دی اک وڈی موبائیل فون بنان والی کمپنی نوکیا دا وجود تقریبن مُک چکیااے۔

ساڈا سواگت آرٹیفیشیل انٹیلی جنس ون سونیاں حیرت انگیز تبدیلیاں نال کررہی اے تے ایس سفردی ریس وچ امریکا تے چین وچکار خاموش جنگ وی چل رہی اے امریکیاں نوں ڈر اے کجھ ورھے بعد ایس دوڑدا لیڈر چین ہووے گا جیس نے ایس کھیتر وچ بوہت کم کیتا اے تے امریکہ دے نیڑے پوہنچ چکیا اے ایسے رفتار نال آن والے ورھیاں وچ چین آرٹیفیشیل انٹیلیجنس وچ نویکلی تھاں تے ہووے گا۔ اج تیکر ہوئی ترقی توں پتا چلدا اے کہ جہدے کول ، جہناں زیادا ڈیٹا ہووے گا اوہ اوہناں ای ایس ٹیکنالوجی توں فائیدا چُک سکے گا ایسے لئی وڈیاں کمپنیاں ڈیٹا دے اکٹھ تے ایہدی سیکیورٹی لئی کئی بلین ڈالر وی خرچ کررہیاں نیں اج فیس بک، ایمازون تے مائیکروسافٹ ورگیاں کارپوریشنز پوری دنیا وچ جو چاہوون اوہو ای ہوندااے فیس بک دے بانی زُکربرگ ہوری تاں امریکی سینٹ اگےانسانی حقاں دی انجانی خلاف ورزی تےمعافی وی منگ چُکے نیں۔

اک مشہورکارپوریٹ ماہر نے بڑی سوہنی گل کیتی اے کہ اج دے دور وچ جے ڈیٹا ،،تیل،، ہووے تاں فیر تسی من لوو کہ چین ایس ڈیٹا دا سعودی عرب اے۔

ایس حقیقت نال کُجھ خرابیاں وی آئیاں نیں سبھ توں وڈی خرابی ازادیتے ڈاکا اے چین ورگے ملکاں وچکار ایہدا وکھالا محسوس کیتا جاسکدا اے جتھے انسان دی سوشل ریٹنگ کیتی جاندی اے اوہدی ہر حرکت تے چینی سرکار دی نظر اے ایتھوں تیکر ٹیکنالوجی نوں ورتیا جاندا اے کہ سوچاں تے پبلک دی رائے نوں بدلیا تے ،،سُدھایا،، جاندا اے ایہدا سبھ توں وڈا ثبوت چین دے مسلمان ابادی والے صوبے سنکیانگ دی حالت اے جہدے تے ساڈی مسلم اُمہ وی چپ اے۔

کیہ ایس ترقی راہیں انسان نوں صاف ستھری ہوا مل سکدی اے ؟ پین نوں صاف پانی مل سکدااے ؟ کھان نوں صاف تے غذائییت نال بھری خوراک مل سکدی اے ؟ ماڑے لوکاں دے شوشن نوں ختم کیتا جاسکدا اے ؟ جے ایہ سبھ کُجھ ممکن نہیں تاں فیر اسیں اپنی قبر اپنے ہتھیں کھود رہے آں !!!!

٭٭٭٭٭