مونہ پھٹ ......۔۔۔٭رویل کالم٭

مونہ پھٹ ……۔۔۔٭رویل کالم٭

پنجابی پیارے ویلے کُویلے پنجابی زبان دے حقاں،پنجاب دی ونڈ تے پنجابی نوں پرایمری پدھر اُتے لاگو کروان لئی پنجاب بھر وچ وکھالا کردے رہندے نیں۔ایسے ای سلسلے وچ ہفتے دے دیہاڑ لاہور پریس کلب دے ساہمنے کئی پنجابی تنظیماں ولوں اُتے ذکر کیتیاں گئیاں منگاں دے نال نال صوبائی وزیر فیاض الحسن چوہان صاحب جہڑے مونہ پھٹ ہون کارن پورے ملک وچ مشہور نیں،اوہناں ولوں پنجابی زبان نوں مندا آکھن تے فیصل آباد دے اک کُڑیاں دے گورنمنٹ کالج دے پراسپیکٹس وچ پنجابی زبان بارے مندے اکھر لکھوان والی پرنسپل دے خلاف احتجاج کیتا گیا۔ایہ کوئی پہلا واقعا نہیں کہ پنجابی زبان نوں مندا آکھیا گیا ہوئے سگوں ایس توں پہلاں وی اک ماڈرن کُڑی تے اک ماڈرن سکول ولوں پنجابی زبان نوں مندا آکھیا گیا۔ایس عمل نال پوری دنیا وچ وسدے پنجابیاں نوں دُکھ ہویا۔ایہ عمل پوری دنیا وچ وسدے پنجابیاں دی توہین اے۔سکول والیاں تے عدالت وچ معافی وی منگی۔پر مونہ پھٹ صوبائی وزیر جو جمے پلے ای پنجاب وچ،اوہناں ولوں اجے تیکر ایس بارے کوئی بیان ساہمنے نہیں آیا۔اسیں حیران آں کہ ایس طرحاں دے بندیاں نوں کیوں وزیر بنا دتا جاندا اے۔فیاض الحسن چوہان صاحب پنجاب واسیاں دی بولی نوں مندا آکھن ویلے تہانوں شرم نہیں آئی؟تُسیں ہو ای بے شرم تہانوں کیہ شرم آنی۔خورے ایس وزیر لئی تے بے شرمی ورگا اکھر وی نِکا ہوئے۔

رب جاندا ایہو کم جے دنیا دے کسے ہور ملک یاں صوبے وچ ہویا ہوندا تے فیاض ہوراں نوں جُتیاں پیندیاں وار نہیں سن آؤنیاں۔پر پنجابیاں نوں تے کوئی ہوش ای نہیں،اوہناں نوں ایس گل نال کیہ لگے۔اوہ جیویں بھنگ پی کے سُتے ہوئے نیں۔پر اسیں فیاض الحسن چوہان تے اوہناں دی حکومت نوں دسنا چاہنے آں کہ کُجھ پنجابی اجے وی جاگدے نیں،سوجھ سیانف رکھدے نیں۔جہناں وچ وڈی گنتی نوجواناں دی اے۔اوہ نوجوان جہناں دے ووٹ نال ایہ حکومت چُنی گئی۔جے ایہو نوجوان حکومت خلاف نکل آئے تے فیر حکومت وی خطرے وچ پے سکدی اے۔

ساڈی وزیراعظم پاکستان تے وزیر اعلا پنجاب اگے بینتی اے کہ اوہ فیاض الحسن چوہان دے نال نال فیصل آباد کالج دے پراسپیکٹس وچ چھپے پنجابی بارے مندے اکھراں دا وی دا نوٹس لیندے ہوئے متعلقا بندیاں خلاف کارروائی دا حکم دین۔ایس توں وکھساڈی عدالتاں اگے وی بینتی اے کہ او ہ ایس گل دا نوٹس لین۔

ساڈی پنجاب واسیاں توں وی بینتی اے کہ اوہ وزیر تے کالج دی پرنسپل دے رویے خلاف بھرویں اواز چُکن۔ایس حوالے نال سوشل میڈیا اُتے ہزاراں لوکاں ولوں اواز وی چُکی گئی پر سانوں ایس توں وی اگانہ ودھ کے کم کرن دی لوڑ ہے۔تاں جے اگانہ توں کوئی وی اِنج دی گھٹیا قسم دی حرکت نہ کر سکے۔

*****