پورے پاکستان وچ ہر طبقا احتجاج کر رہیا اے،بینظیر بھٹو شہید دا مشن پورا کراں گے:بلاول بھٹو زرداری۔۔۔٭رویل نیوز٭

گلگت (نمایندا رویل) پاکستان پیپلز پارٹی دے چیئرمین بلاول بھٹو زرداری دا کہنا اے کہ 15 نومبر نُوں گلگت بلتستان دیاں چوناں وچ فتح حاصل کرن دے بعد ذوالفقار علی بھٹو تے محترما بینظیر بھٹو شہید دا مشن پورا کراں گے‘ پاکستان پیپلز پارٹی ای گلگت بلتستان نُوں حقوق دلوا سکدی اے‘ اسیں حقوق دین والے آں‘ حقوق کھوہن والے نہیں۔ گلگت بلتستان ای نہیں وفاق وچ وی حکومت بناواں گے۔ نگر وچ عوامی جلسے نال خطاب کردیاں ہویاں اوہناں دا کہنا سی کہ ’میں گلگت بلتستان دے ہر حلقے وچ گھُم رہیا آں تے اوہ علاقا لبھ رہیا آں جتھے بھٹو شہید نے قدم نہ رکھیا ہووے پر ہُن تک مینوں ایہو جہی کوئی تھاں نہیں ملی‘۔ اوہناں دا کہنا سی کہ ’ساڈا 3 نسلاں دا پرانا رشتا اے‘ اسیں ایہنوں قایم رکھاں گے تے بھٹو شہید تے بی بی شہید دا نامکمل مشن پورا کراں گے‘۔ اوہناں نے وفاقی حکومت اُتے تنقید کردیاں ہویاں کہیا کہ ایس سلیکٹڈ حکومت د ے 2 سال ہو چکے نیں‘ عمران خان نے تہاڈے لئی کیہ کیتا؟ اوہناں نے اِک منصوبا وی گلگت بلتستان لئی نہیں دِتا تے ہُن کہندے نیں کہ عبوری صوبا بناواں گے۔ چیئرمین پیپلز پارٹی دا کہنا سی کہ ’چوناں توں پہلاں اوہناں نے ایہدی مخالفت کیتی سی تے ہُن ایہناں نُوں ایہ یاد آ رہیا اے‘۔ اوہناں دا کہنا سی کہ ’پیپلز پارٹی نے 2018 دے منشور وچ کہیا سی کہ گلگت بلتستان دا مطالبا اے کہ سینیٹ تے قومی اسمبلی وچ اوہناں دی نمایندگی ہونی چاہیدی اے۔ اوہناں نے کہیا کہ 15 نومبر نُوں گلگت بلتستان دی جدوجہد دے امتحان دا دن اے تے ایس دن پیپلزپارٹی نُوں ووٹ دوو تاں جے اسیں گلگت بلتستان نُوں ا یہدا حق دلوا سکیے۔ اوہناں دا کہنا سی کہ ’جہڑے لوک صوبا بنن توں پہلاں گلگت بلتستان دی سبسڈی ختم کرن‘ ٹیکس ودھان تے اوہ صوبا بنان دے بعد کیہ کرن گے‘۔ اوہناں نے کہیا کہ پیپلز پارٹی مطالبا کرے گی کہ جہڑی سبسڈی شہید ذوالفقار علی بھٹو نے دِتی سی اوہ ساری بحال کیتی جاوے‘ ساڈا دوجا مطالبا گلگت بلتستان دی لوکائی نُوں اپنی دھرتی دا مالک بنوانا اے‘ ایتھوں دے نوجواناں نُوں روزگار فراہم کرنا اے‘ خدانخواستا ایتھے وی کٹھ پتلی دی حکومت بنی تے نوجواناں دے نال ایہ کیہ کیہ کرن گے‘ پورے پاکستان وچ ہر طبقا احتجاج کر رہیا اے۔ دوجے پاسے بلاول زرداری تے ہوراں نُوں گلگت بلتستان وچ انتخابی مہم دی اجازت مل گئی۔ سپریم ایپلیٹ کورٹ گلگت بلتستان نے چیف کورٹ دا فیصلا 12 نومبر تک معطل کر دِتا اے۔