kraamaat@gmail.com
+ +92 333-430-6384
نمائندا رویل
November 10, 2020
لاہور (نمایندا رویل) گورنر پنجاب چودھری محمد سرور نے کہیا اے کہ (ق) لیگ نال کوئی ناراضگی نہیں اوہ انشاء اللہ 5 سال تک حکومت دے نال رہن گے‘ اپوزیشن دے کسے رکن دی گرفتاری دا حکومت نال کوئی تعلق نہیں‘ اسیں سیاسی انتقام اُتے یقین نہیں رکھدے‘ لوکائی نے اپوزیشن دے بیانیے نُوں رَد کر دِتا اے‘ الیکشن 2023 توں پہلے کسے صورت نہیں ہون گے‘ جے اپوزیشن ایہ چاہندی اے کہ احتساب دے خاتمے لئی مذاکرات کیتے جان تے ایہو جہیا سوال ای پیدا نہیں ہوندا‘ نیب سنے سارے ادارے مکمل ازادی دے نال کم کر رہے نیں۔ مزار اقبال اُتے حاضری دین دے بعد میڈیا نال گلبات کردیاں ہویاں چودھری محمد سرور نے کہیا کہ (ن) لیگ تے پیپلز پارٹی سنے ہور سیاسی جماعتاں دے خلاف عدالتاں وچ اج جہڑے مقدمات نیں اوہ سبھ ایہ لوک اِک دوجے خلاف بناندے نیں۔ اوہناں نے کہیا کہ تحریک انصاف نے کسے دے خلاف کوئی مقدما نہیں بنایا۔ اِک سوال دے جواب وچ چودھری محمد سرور نے کہیا کہ اپوزیشن چاہندی اے کہ تحریک انصاف دی حکومت ختم ہو جاوے‘ ملک وچ احتساب دا عمل رُک جاوے‘ ایہ دوویں کم ای نہیں ہو سکدے۔ اوہناں نے کہیا کہ اپوزیشن دے کول جے ملکی ترقی تے خشحالی تے لوکائی نُوں ریلیف دین دے حوالے توں کوئی تجویزاں نیں تے اوہ ساہمنے لے کے آن‘ ایہناں نال عوامی ایشوز اُتے مذاکرات ہو سکدے نیں پر کرپشن دے خاتمے اُتے کوئی سمجھوتا تے گلبات نہیں ہووے گی۔
