کروناوایرس وباء دی شکست دے دن نیڑے آ گئے ۔۔۔٭رویل نیوز٭

نیو یارک (نمایندا رویل) کرونا دے خلاف وڈی کامیابی مل گئی‘ سانجھے طور اُتے ویکسین بنان والی امریکی تے جرمن کمپنیاں دا دعوا اے کہ اوہناں دی ویکسین تیجے تجرباتی مرحلے وچ 90 فیصد مؤثر ثابت ہو گئی۔ صدر ٹرمپ نے ویکسین دی تیاری دا کریڈٹ اپنے آپ نُوں دے دِتا۔ کرونا دے علاج لئی ویکسین بنان والی امریکی تے جرمن کمپنیاں دا دعوا اے کہ اوہناں دی بِنائی گئی ویکسین تیجے تجرباتی مرحلے وچ 90 فیصد مؤثر ثابت ہوئی اے۔ امریکی کمپنی دے آگو دا کہنا سی کہ ویکسین دی تیاری پوری انسانیت لئی وڈا دن اے‘ اوہناں دا کہنا سی کہ بیماری توں بچن لئی دُبارا ویکسین دا استعمال کافی ہووے گا‘ ڈیمانڈ نُوں پورا کرن لئی اوہناں دی کمپنی ودھ توں ودھ ویکسین دی تیاری اُتے توجا دیوے گی۔ ڈونلڈ ٹرمپ نے ویکسین دی تیاری دا کریڈٹ لیندیاں ہویاں کہیا کہ بڑی چھیتی ویکسین آ رہی اے جہڑی 90 فیصد کامیاب اے۔ ویکسین دی تیاری دی خبر سٹاک مارکیٹاں لئی وی تازا ہوا دا بُلّا ثابت ہوئی‘ یورپی سٹاک مارکیٹ 8 مہینیاں دی اُچی ترین سطح اُتے پہنچ گئی۔