حکومت دا جہاز ڈُب رہیا اے‘ جہدے وچ ہُن کوئی سوار نہیں ہووے گا: مریم نواز۔۔۔٭رویل نیوز٭

گلگت بلتستان (نمایندا رویل) مسلم لیگ (ن) دی نائب صدر مریم نواز نے کہیا اے کہ عمران خان دا ناں لیندیاں ہویاں تکلف ہوندی اے‘ ایہدا ناں وی لینا گوارا نہیں کردی‘ پر مجبورن لوکائی دے مجرم عمران خان دا ناں لینا پیندا اے‘ ایہ چھوٹا آدمی اے پر جدوں علاج مقصود ہووے تے بیماری دا ناں لینا پیندا اے‘ عمران خان تے ایہدے سنگی جدوں مونہ کھولدے نیں تے غلاظت ٹپکدی اے‘ حکومت دا جہاز ڈُب رہیا اے‘ جہدے وچ ہُن کوئی سوار نہیں ہووے گا‘ سگوں ایہدے توں چھال مارے گا۔ گلگت بلتستان دے علاقے گوپس وچ مسلم لیگ (ن) دی نائب صدر مریم نواز نے جلسے نال خطں اب کردیاں ہویاں کہیا کہ ایہ اجتماع دَس رہیا اے گلگت بلتستان وچ شیر آئے گا کیوں جے ایس حکومت نُوں کدی حکومت نہیں سمجھیا‘ ایہ جعلی حکومت اے جہدے نصیب وچ لوکائی دی خدمت کرنا لکھیا ای نہیں‘ ایہدے توں درخاست کرن دا کیہ فایدا‘ جے تہانو ں تہاڈا حق نہیں دِتا جا رہیا تے آن والے الیکشن وچ شیر نُوں ووٹ دو و تے اپنے حقاں دے نال جیو۔ اوہناں نے کہیا کہ ایس وادی نُو ویکھ کے جنت دا خیال آندا اے پر جعلی حکومت گوپس دے فنڈز روک کے بیٹھی اے۔ دیامر تے بھاشا ڈیم اُتے نواز شریف نے جہڑا کم کیتا اج تک کسے نے نہیں کیتا‘ پتا لگا اے اوتھے جہڑیاں نوکریاں نکلیاں نیں اوہدے وچ ایتھوں دی لوکائی نُوں معاوضا تے حصا نہیں دِتا جا رہیا‘ ن لیگی ارکان ایہ معاملاپارلیمان وچ چُکن گے تے میں وی دیامر بھاشا ڈیم دے متاثرین لئی اواز چُکاں گی‘ لوکائی دے مسئلیاں دا کلا حل مسلم لیگ ن اے۔ مریم نواز نے کہیا کہ نواز شریف نے پہلے ای کَہ دِتا سی کہ لڑائی تہاڈے نال نہیں اے‘ پاکستان نُوں اج جہڑی بیماری اے اوہدا ناں عمران خان تے پاکستان تحریک انصاف جہڑی جوڑ توڑ کے بنائی گئی اے‘ ملک وچ کرونا ورگی ایہ بیماری 2018 وچ ای آ گئی سی‘ ایہ بیماری ماسک پان نال نہیں جائے گی سگوں ایہنوں چُک کے باہر سُٹن نال ای جاوے گی‘ کیوں جے ایس بیماری نے ملکی اداریاں دیاں جڑاں‘ معیشت‘ اخلاق تے وفاق دیاں اکائیاں نُوں کھوکھلا کر دِتا اے۔ اپنی گل نُوں جاری رکھدیاں ہویاں مریم نواز نے کہیا کہ نواز شریف دے مخالفین اخلاق توں ڈِگے لوک نیں جہناں دا اِک ای کم بد زبانی تے انتقامی کارروائیاں کرنا‘ عمران خان تے ایہدے سنگی جدوں مونہ کھولدے نیں تے ایہناں دے مونہ توں غلاظت ٹپکدی اے‘ ایہو جہے بندا دا مقام وزیراعظم ہاؤس نہیں‘ ایہو جہے بندے نُوں لوکائی دے حوالے کر دوو تاں جے لوکائی دُدھ دا دُدھ تے پانی دا پانی کر دیوے۔ آگو ن لیگ دا کہنا سی کہ حکومت اج گئی یاں کل گئی‘ حکوم دا جہاز ڈُب رہیا اے تے ڈُبدے جہاز اُتے کوئی سوار نہیں ہوندا سگوں ایہدے توں تھلے چھالاں مارن گے‘ لوکائی نے لوٹیاں نُوں ووٹ نہیں دینا سگوں شیر اُتے ٹھپّا لانا اے‘ ووٹاں دی تھاں پولنگ سٹیشن وچ نہیں سگوں بیت الخلاء ہوندی اے‘ ایہناں لوٹیاں نُوں ایتھے وگدے دریا وچ ہمیشا لئی روڑدواں گے‘ حکومت جار رہی اے‘ ایہنوں خدا حافظ وی نہیں کہنا ایہدا حتساب دیہاڑ نیڑے آ رہیا اے۔