پی ڈی ایم دی تحریک نُوں کامیابی حاصل ہووے گی‘ جنوری وچ حکومت خلاف لانگ مارچ ہووے گا:بلاول بھٹو زرداری۔۔۔٭رویل نیوز٭

اسلام آباد (نمایندا رویل) پاکستان پیپلز پارٹی دے چیئرمین بلاول بھٹو زرداری نے کہیا اے کہ پاکستان ڈیمو کریٹک موومنٹ (پی ڈی ایم) وچ شامل ساریاں جماعتاں متحد تے متفق نیں جد کہ اپوزیشن دی آل پارٹیز کانفرنس (اے پی سی) وچ کسے شخصیت دا ناں لین توں منع وی نہیں کیتا گیا سی۔ اِک انٹرویو وچ بلاول بھٹو زرداری دا کہنا سی کہ اسیں اسٹیبلشمنٹ دے خلاف کھلون اُتے زور دِتا‘ مسلم لیگ (ن) ہووے یاں پیپلز پارٹی‘ ساریاں جماعتاں دی اپنی اپنی سیاست اے۔ اوہناں نے کہیا کہ جمہوریت دی بحالی‘ اداریاں دے آئینی تے قانونی کردار ادا کرن دی گل کیتی اے تے مسلم لیگ (ن) تے پیپلز پارٹی وچ اتفاق اے۔ نواز شریف دے بیانیے بارے اِک سوال دے جواب وچ بلاول دا کہنا سی کہ پی ڈی ایم دا بیانیا اِک اے کہ سیاست وچ اسٹیبلشمنٹ دی مداخلت ختم ہونی چاہیدی اے‘ پاکستان دی 70 سالا تواریخ دے ایس مسئلے نُوں حل کرنا چاہیدا اے تے ایس نکات اُتے اسیں سارے متحد تے اِک آں۔ اوہناں نے کہیا کہ اسیں ایس گل اُتے زور دِتا کہ ساڈا جہڑا اسٹیبلشمنٹ خلاف بیانیا اے اسیں اوہدے اُتے کھلوتے آں تے جہڑا وی پی ڈی ایم دا سانجھا فیصا ہووے گا اسییں اوہدے نال کھلوتے ہوواں گے۔ بلاول بھٹو زرداری دا کہنا سی کہ اے پی سی وچ ساڈے نکات ساریاں دے ساہمنے نیں‘ پر اے پی سی وچ نہ تے کسے دا ناں لین دا طے ہویا سی پر نال نال کسے دا ناں لین توں منع وی نہیں کیتا گیا سی۔ ایس موقع اُتے اوہناں نے ایہ وی کہیا کہ پی ڈی ایم دا ٹایم ٹیبل بڑا واضح اے‘ پی ڈی ایم دی تحریک نُوں کامیابی حاصل ہووے گی‘ جنوری وچ حکومت خلاف لانگ مارچ ہووے گا جد کہ فروری وچ حکومت نُوں جانا پوے گا۔ چیئرمین پیپلز پارٹی دا کہنا سی کہ پی ڈی ایم نُوں متنازع بنان تے ونڈن دی ناکام کوشش کیتی جا رہی اے‘ غداری دے فتوے ونڈن والیاں نُوں پتا ہونا چاہیدا اے کہ لوکائی ایس کارڈ نُوں جاندی اے۔وزیراعظم عمران خان اُتے تنقید کردیاں ہویاں بلاول زرداری دا کہنا سی کہ عمران خان دا بیانیا کھوکھلا اے‘ اوہ نہ صرف قیادت سگوں ساڈے کارکناں تے پاکستانی لوکائی نُوں کَہ رہے نیں کہ جے تُسیں پیپلز پارٹی تے مسلم لیگ (ن) دے نال او تے غدار او پر لوکائی جاندی اے کلبھوشن نُوں قومی مصالحتی آرڈیننس (این آر او) دین والا عمران خان اے جد کہ نریندر مودی دی جت دی دُعا تے کشمیر دا سودا کرن والا وی عمران خان سی۔ اوہناں نے کہیا کہ ایہ بیانیا ناکام رہوے گا تے پی ڈی ایم دی تحریک نُوں کامیابی ملے گی۔