شہباز شریف تے حمزہ شہباز اُتے فرد جرم عاید ہو گئی اے،مطلب  ساریاں داستاناں سچیاں سن: مشیر داخلا شہزاد اکبر۔۔۔٭رویل نیوز٭

لاہور (انمایندا رویل) مشیر داخلا شہزاد اکب نے کہیا اے کہ شہباز شریف تے حمزہ شہباز اُتے فرد جرم دا مطلب ساریاں داستاناں سچیاں سن‘ ٹی ٹیز راہیں پیسا بیرون ملک منتقل کیتا جاندا سی‘ عدالتی فیصلا پڑھن اُتے لیگی صدر دیاں کارستانیاں دا پتا لگ جاوے گا‘ شہباز شریف دے خلاف 7.3 ارب دا ریفرنس اے‘ نواز شریف دی واپسی لئی برطانوی حکومت دے نال روزانا رابطا ہو رہیا اے‘ نواز شریف دے وزٹ ویزے دی مدت چالو مہینے ختم ہو جاوے گی‘ نواز شریف دی واپسی دی حتمی تاریخ نہیں دے سکدا‘ جدوں تک عمران خان نیں اپوزیشن نُوں این آر او نہیں ملے گا۔ مشیر داخلا شہزاد اکبر نے پریس کانفرنس کردیاں ہویاں کہیا کہ اج لاہور تے میرے لئی اِک تواریخی دن اے‘ میرے اُتے الزام اے اِک سال توں چوری تے کرپشن دیاں جھوٹھیاں داستاناں سُنا رہیا آں‘ اج ایہناں داستاناں اُتے اہم ٹورا کاری ہوئی اے‘ اج شہباز شریف تے حمزہ شہباز اُتے فرد جرم عاید ہو گئی اے‘ فرد جرم دا مطلب اے اوہ ساریاں داستاناں سچیاں سن۔ اوہناں نے کہیا کہ چارج شیٹ دے مطابق کل 16 ملزمان نیں‘ 16 وِچوں 4 ملزمان اشتہاری متھے گئے نیں‘ جوائی ہارون یوسفوی اشتہاری قرار دِتے جا چکے نیں‘ سلمان شہباز‘ علی احمد‘ طاہر نقوی‘ ہارون یوسف نُوں اشتہاری قرار دِتا جا چُکیا اے‘ طاہر نقوی نُوں دبئی توں واپس لیان دیاں کوششاں جاری نیں۔ اوہناں نے کہیا کہ عدالتی فیصلے وچ اِک اِک شے نُوں واضح بیان کیتا گیا اے‘ شہباز شریف کہندے نیں میرے اُتے اِک دھیلے دی کرپشن ثابت نہیں ہوئی‘ ٹی ٹیز راہیں پیسا دوجے ملک گھلیا جاندا سی‘ سارے ای میلز تے دستاویزات شواہد دا حصا نیں‘ شریف فیملی دیاں سوانیاں دا احترا م کردے‘ تُسیں اپنیاں سوانیاں دے ناں اُتے ٹرانزیکشنز کیوں کیتیاں؟۔ اوہناں نے ہور کہیا کہ منی ایکسچینج چلان والے شاہد محمود تے آفتاب دا کردار وی اہم اے‘ شاہد محمود پاکستان‘ آفتاب لندن وچ منی ایکسچینج چلاندے سن‘ تیجا مفرور شریف گرُپ دا اسسٹنٹ منیجر طاہر نقوی دبئی وچ اے‘ 70 توں ودھ بندیاں نے ایہناں نُوں ٹی ٹیز گھلیاں‘ منطور پاپڑ والا کویں شہباز شریف خاندان نُوں پیسے گھل سکدا اے‘ مشتاق چینی اپنا جرم قبول کر چکیا اے‘ جس دن توں کیس بنیا اے دوویں پیو پُتر اِک ای گل کر رہے نیں‘ میرے لَک وچ پیڑ اے‘ مینوں کرسی نہیں دِتی‘ ایہناں لوکاں نے لُٹی ہوئی رقم بینکاں راہیں وائٹ کیتی‘ نصرت شہباز دے ناں نال ساریاں ٹی ٹیز جعلی نیں‘ پیسا فراڈ راہیں گھلیا گیا جو منی لانڈرنگ کہواندی اے‘ ایہ عوامی دستاویز نیں جہناں نُوں تفصیل نال پڑھن دی ضرورت اے۔اِک ہور سوال دے جوا ب وچ شہزاد اکبر نے کہیا کہ نواز شریف لاہور ہائیکورٹ نُوں حلف دین دے بعد بیرون ملک گئے‘ نواز شریف نُوں انسانی ہمدردی دی بنیاد اُتے جان دی اجازت دِتی‘ شہباز شریف دے وزیراعظم بنن دی راہ وچ بھائی صاحب رکاوٹ نیں‘ نواز شریف نے ایس توں پہلے وی کئی وار قوم نُوں دھوکھا دِتا۔