حکومت کوئی ہور چلا رہیا اے‘ کرسی اُتے صرف عمران خان بیٹھا اے:مریم نواز۔۔۔٭رویل نیوز٭

گلگت (نمایندا رویل) مسلم لیگ (ن) دی نائب صدر مریم نواز نے کہیا اے کہ نوا ز شریف‘ مریم نواز تے مسلم لیگ (ن) ڈٹی ہوئی اے کہ ظالماں دے اگے نہیں جھُکاں گے‘ وزیراعظم نُوں کجھ نہیں پتا کہ ملک وچ کیہ ہو رہیا اے‘ حکومت کوئی ہور چلا رہیا اے‘ کرسی اُتے صرف عمران خان بیٹھا اے‘ ایہ ظالم حکومت چالو سال ختم ہو جاوے گی ایس لئی گلگت دی لوکائی اپنے ووٹ ایہناں نُوں دے کے ضایع نہ کرے۔ نگر خاص وچ جلسے نال خطاب کردیاں ہویاں مریم نواز نے کہیا کہ کیہ نگر خاص دی لوکائی گواہدی دیندی اے کہ پچھلے 70 سال وچ گلگت بلتستان تے نگر خاص وچ جنے کم نہیں ہوئے اوہ نواز شریف تے حفیظ الرحمان دے پچھلے 5 سالاں وچ ہوئے نیں تے جے ہوئے نیں تے 15 نومبر نُوں تواریخی دن آ رہیا اے۔ اوہناں دا کہنا سی کہ شاید ای کوئی ظلم ہووے جہڑا نواز شریف اُتے ایہناں نے نہ کیتا ہووے‘ عمران خان ورگے جھوٹھے تے ظالم بندے دے دماغ وچ صرف تے صرف حسد تے انتقام دا بھوت سوار اے‘ ایہنے جس طرحاں نوا ز شریف‘ مسلم لیگ ن تے تہاڈی جماعت نُوں انتقام دا نشانا بنایا اے تے کوئی ڈرپوک ہوندا تے اِک پاسے ہٹ جاندا پر نواز شریف نے ہر ظلم بہادراں وانگوں اپنے سینے اُتے سہیا تے اپنی دھی نُوں جیل جاندا ہویا وی ویکھیا۔ اوہناں نے کہیا کہ جعلی ای صحیح‘ زبردستی ساڈے سراں اُتے مسلط کیتا ہویا انسان ای صحیح پر وزیراعظم دی کرسی اُتے تے بیٹھا اے‘ ایہ کنی ڈھٹائی نال کَہ رہیا اے کہ مہنگائی تے نہیں تے مہنگائی تے صرف پراپیگنڈا اے‘ تے آ کے نگر خاص دے گھراں وچ سوانیاں توں آٹے کھنڈ دا ریٹ پُچھو کہ اوہ اپنا گھر کویں چلا رہے نیں فیر پتا لگے گا کہ مہنگائی ہے کہ نہیں۔