مزارات‘ سینما گھر تے تھیٹر فوری طور اُتے بند کرن دی سفارش، کرونا کیسز وچ تِن گُنا وادھا:این سی او سی۔۔۔٭رویل نیوز٭

اسلام آباد (نیو ز ڈیسک) نیشنل کمانڈ اینڈ اپریشن سینٹر (این سی او سی) نے دربار‘ سینما تے تھیٹرز فوری طور اُتے بند کرن دا فیصلا کر لیا۔ عوامی اجتماعواں اُتے پابندی دی وی سفارش کیتی گئی‘ 500 توں ودھ بندے جمع نہیں ہو سکن گے۔ وفاقی وزیر اسد عمر دی صدارت ہیٹھ این سی او سی دا اجلاس ہویا جہدے وچ نیشنل کمانڈ اینڈ اپریسن سینٹر نے کرونا وباء دا کھلار روکن لئی سخت اقدامات تجویز کردیاں ہویاں وڈے عوامی اجتماعواں اُتے پابندی دی سفارش کر دِتی اے۔ اجلاس وچ کہیا گیا اے کہ بیماری وچ 3 گنا وادھا ہویا اے ایس لئی بُہتے خطرے والے علاقیاں وچ پابندیاں ودھائیاں جان۔ این سی او سی دے مطابق تعلیمی اداریاں وچ مثبت کیس دا تناسب ودھ رہیا اے جہنوں روکن دی ضرورت اے‘ اجلاس وچ تعلیمی اداریاں وچ موسم سرما دیاں چھٹیاں پیشگی شروع کرن دی تجویز وی ساہمنے آئی پر 16 نومبر نُوں وفاقی وزیر تعلیم این سی او سی وچ صوبائی وزرائے تعلیم دے نال ملاقات کرن گے‘ مشاورتی مباحثے دے بعد سفارشاں صوبیاں دے نال شیئر کیتیاں جان گیاں۔ این سی او سی نے شادی تقریباں بارے رہنما اصول وی جاری کر دِتے جہدے مطابق 20 نومبر توں صرف 500 بندیاں دی اُتلی حد دے نال بیرونی شادیاں دی اجازت ہووے گی جد کہ 500 توں ودھ بندیاں دے سیاسی‘ ثقافتی‘ مذہبی‘ تفریحی تے سول سوسائٹی دے اجتماعواں اُتے پابندی دی سفارش کیتی گئی اے۔ این سی او سی ولوں مسیتاں وچ ایس او پیز اُتے عملدرآمد دی درخاست وی کیتی گئی‘ ایہدے علاوا مزارات‘ سینما گھر تے تھیٹر فوری طور اُتے بند کرن دی سفارش سنے بازاراں نُوں چھیتی بند کرن تے مخصوص دناں لئی کھولن دیاں تجویزاں دِتیاں گئیاں پر این سی او سی دیاں تجویزاں اُتے حتمی فیصلے قومی رابطا کمیٹی اجلاس وچ کیتے جان گے۔ اسد عمر نے کہیا اے کہ کرونا وایرس دے ودھدے کسیز دے کارن این سی او سی نے اِک واری فیر ملک وچ وڈے اجتماعات اُتے پابندی دی تجویز دِتی اے‘ ملک وچ تیزی نال ودھدے کرونا کیسز کارن زندگیاں بچان لئی فوری اقدامات دی ضرورت اے۔ اوہناں نے کہیا کہ اکتوبر دے ادھ توں وڈے اجتماعات اُتے پابندی دی تجویز آن دے بعد کرونا کیسز دی گنتی تقریبن 3 گنا ودھ چکی اے۔ اوہناں دا کہنا سی کہ پورے ملک دیس یاسی قیادت ولوں قوم نُوں کرونا بارے حفاظتی اقدامات کرن تے ایس او پیز اُتے عمل کرن لئی پیغام جانا چاہیدا اے۔