جِنّے مرضی جلسے کر لو!!! این آر او کسے نوں نہیں ملنا،دیس دی معاشی حالت بہتر ہو رہی اے :عمران خان ۔۔۔٭رویل نیوز٭

اسلام آباد (نیوز ڈیسک) وزیراعظم عمران خان نے کہیا کہ اپوزیشن دے جلسیاں دا کوئی فایدا نہیں‘ کسے دے جلسیاں دے دباء وچ آ کے این آر او نہیں دواں گا۔ قبضا مافیا دے خلاف سارے چیف سیکرٹریز نُوں کارروائی دا کَہ دِتا اے‘ ایہناں دیاں چیکاں لوکائی سنے گی۔ اسرائیل نُوں تسلیم کرن دے حوالے توں پاکستان اُتے کوئی دباء نہیں اے۔ ایہناں خیالاں دا اظہار اوہناں نے پچھلے دن لاہور وچ پریس کانفرنس نال خطاب کردیاں ہویاں کیتا۔ ایس موقع اُتے وزیر اعلا پنجاب عثمان بزدار وی موجود سن۔ اوہناں نے کہیا کہ اپوزیشن دے جلسیاں نال پاکستان وچ خطرناک حد تک کرونا کھلر سکدا اے۔ جہڑا دہشتگردی دا لیبل ساڈے اُتے لگ رہیا سی اوہ بہتر ہو گیا اے۔ اقوام عالم ساڈیاں پالیسیاں نُوں تسلیم کر رہے نیں۔ کرونا دے کیسز تیزی نال ودھ رہے نیں‘ ہسپتالاں وچ پریشر ودھے گا‘ ہیلتھ دیاں سہولتاں گھٹ نیں‘ بڑیاں مشکلاں نال معاشی لحاظ نال بہتر ہوئے آں۔ ہندستان و چ کرونا نال لکھ توں ودھ لوک مر چکے‘ ہور ملکاں وانگوں اسیں بُہتے متاثر نہیں ہوئے آں‘ ساڈے کیسز تیزی نال ودھ رہے نیں‘ بحیثیت قوم اسیں ایہدا مقابلا کرنا اے۔ قوم توں اپیل کردا آں کہ احتیاط دا دامن نہ چھڈن۔ کرونا دی پہلی لہر وچ پوری قوم نے میرا ساتھ دِتا۔ علماء نے پہلے تے ہُن وی تعاون کرن۔ معاشرے دے سارے طبقے رل کے ایہدا مقابلا کرن۔ حکومت تے قوم رَل کے کرونا دے خاتمے وچ کردار ادا کر ے۔ اسیں فیکٹریاں بند نہیں کراں گے‘ روزگار نال جڑیاں فیکٹریاں سنے ہور اسباب نُوں بند نہیں کراں گے۔ دکان‘ شاپنگ مال والے بندے ایس او پیز اُتے عملدرآمد کرن۔ پبلک تھاواں اُتے سیفٹی دے لوازمات اختیار کرو‘ ساڈی ایکسپورٹ بہتر ہو رہی اے‘ بنگلا دیش تے انڈیا دی نسبت اسیں بہتر ہو رہے آں‘ کرونا توں لوکائی نُوں بچاواں گے تے بھُکھ نال ایہناں نُوں مرن وی نہیں دواں گے۔ وزیراعظم نے کہیا کہ 2 ہفتیاں وچ مَوتاں 50 توں ٹپ گئیاں نیں‘ اجتماع والیاں تھاواں اُتے کرونا تیزی نال کھلردا اے۔ اسیں اپنے سارے جلوس تے اجتماع ختم کر دِتے نیں‘ جنے مرضی جلسے جلوس کرو‘ NRO کسے نُوں نہیں دواں گے۔ اوہناں نے کہیا کہ ریور راوی پروجیکٹ تے کراچی بندانا پراجیکٹ نیں‘ کراچی وچ ابادی وچ تیزی نال وادھا ہو رہیا اے۔ گندگی تے آلودگی دے علاوا سیوریج دا نظام خراب اے۔ لاہور دا کھلار تیزی نال ودھ رہیا اے۔ راوی پراجیکٹ بنے گا۔ ماضی وچ سارے پروجیکٹ منصوبیاں دے تحت نہیں چل رہے سن۔ راوی پروجیکٹ تے کراچی بندانا پروجیکٹ دا مقصد کراچی تے لاہور نُوں بچانا اے۔ پانی سطح زمین توں گھٹ ہو گیا اے۔ اسیں پانی دی سطح نُوں اُتے لیانا چاہندے آں۔ لاہور وچ 60 لکھ رُکھ اُگاواں گے۔ کراچی بندانا پروجیکٹ اسیں پورے کراچی نُوں بچانا اے۔ غلاظت‘ سیوریج تے گندگی دے نظام نُوں کراچی توں ختم کرنا چاہندے آں۔ فارن انوسٹمنٹ پاکستان آئے گی تے غیر ملکی سرمایا کاری وچ وادھا ہوو ے گا۔ عمران خان نے کہیا کہ ساڈی کامیابی دی وجھا خارجا پالیسی اے۔ ساڈی لابنگ دی وجھا توں خارجا پالیسی بہتر ہوئی۔ ہندستان نُوں اسیں بے نقاب کیتا۔ افغانستان دے نال بہترین کردار ادا کر رہے آں۔ امریکا ساڈے اقدامات نُوں سلاہ رہیا اے۔ افغانستان وچ اسیں امن لے کے آ رہے آں۔ اسیں افغان حکومت دے نال مذاکرات دا سلسلا شروع کیتا تے افغانستان تے امریکا نُوں مذاکرات دی میز اُتے بٹھایا۔ طالبان دے نال مذاکرات ہوئے۔ ماضی وچ اسیں غیراں دی جنگ لڑر ہے ساں۔ چین‘ امریکا‘ ایرن‘ سعودی عرب تے ترکی دے نال ساڈے تعلقات بہتر نیں۔ جدوں تک فلسطین دی لوکائی نُوں اوہناں دا حق نہیں ملدا اسیں کوئی گل نہیں کراں گے۔ اسرائیل نُوں تسلیم کرن لئی پاکستان اُتے کسے قسم دا دباء نہیں۔ اوہناں نے ہور کہیا کہ اوور سیز پاکستانی ساڈا اثاثا نیں‘ پنجاب وچ لینڈ مافیا دے خلاف وی ایکشن لے رہے آں‘ ایہناں دیاں چیکاں دیاں اوازاں لوکائی سُنے گی۔ ماضی وچ ایہ قبضا مافیا حکومتاں چلاندے سن‘ کھرباں رُپئے دیاں زمیناں اُتے قبضے کرد ے سن تے صرف حکومت دے جلسے جلوس کرواندے سن۔ سارے چیف سیکرٹریز دے نال پروگرام تشکیل دِتا اے ایہناں دے گلمیاں اُتے ہتھ پاواں گے‘ کسے نُوں نہیں چھڈاں گے۔ شوگر مافیا دی اجارا داری تے بلیک میلنگ کارن قیمتاں ودھدیاں سن ہُن سانوں ایہناں دی بلیک میلنگ دی سمجھ آ گئی اے۔ اسیں کھنڈ بیرون ملک توں منگوائی اے ایہدیاں قیمتاں گھٹ ہو جان گیاں۔ کنک دی پیدوار دے حوالے توں سانوں غلط آنکڑے مہیا کیتے گئے سن جہدے کارن آٹے دیاں قیمتاں ودھ گئیاں نیں۔ چھیتی ایہناں نُوں کنٹرول کر لواں گے‘ پچھلے چور حکمراناں نے تے مافیا نے رَل کے قرضے لئے سن جہدیاں اسیں قسطا ں ادا کر رہے آں۔ سانوں پتا لگ گیا اے کہ مہنگائی کرن والا اِک مافیا اے ہُن ایہناں دی بلیک میلنگ وچ نہیں آواں گے۔ پاکستان دی معاشی حالت بہتر ہو رہی اے۔ پچھلے حکمراناں دے قرضیاں دا اسیں سود ادا کر رہے آں۔