اپوزیشن نُوں پاکستانی لوکائی تے اپنی پارٹی دے پیرو کاراں نُوں جواب دینا پوے گا:  وفاقی وزیر اطلاعات و نشریات  ۔۔۔٭رویل نیوز٭

اسلام آباد (نمایندا رویل) وفاقی وزیر اطلاعات و نشریات سینیٹر شبلی فراز نے کہیا اے کہ اپوزیشن جماعتاں کرونا وایرس اُتے پارلیمانی کمیٹی دے اجلاس وچ رلت نہ کر کے غیر ذمے داری دا ثبوت دِتا‘ اپوزیشن نے واضح پیغام دِتا کہ ا یہناں نُوں اپنی سیاست عزیز اے‘ لوکائی دیاں جاناں نہیں‘ ہر شے اُتے سیاست نہیں کرنی چاہیدی‘ اپوزیشن تعاون کرے تاں جے قومی ایشو اُتے معاملات مشاورت نال اگے ودھن‘ حکومت کرونا ورگے سنجیدا معاملے اُتے اِک پاسی فیصلے نہیں کرنا چاہندی۔ اسلام آباد وچ پریس کانفرنس کردیاں ہویاں اوہناں نے کہیا کہ کرونا دی پہلی لہر نُوں کامیابی نال شکست دِتی سی‘ ساری دنیا نے ساڈی کرونا پالیسی نُوں سلاہیا‘ ہُن ایہدی دوجی لہر پاکستان وچ آ چکی اے۔ اوہناں دا کہنا سی کہ اپوزیشن نے پارلیمانی کمیٹی دے اجلاس وچ رلت نہ کرن دا فیصلا کر کے اِک واری فیر اپنی غیر ذمے داری دا ثبوت دِتا اے‘ اجلاس وچ رلت نہ کر کے اوہناں نے واضح کر دتا کہ اوہ پارلیمنٹ نُوں نہیں مندے‘ ملک دے مستقبل نال تعلق رکھن والی صورتحال اُتے اجلاس دا بائیکاٹ کر کے اوہناں نے غلط فیصلا کیتا اے۔ اوہناں نے کہیا کہ حکومت دی کوشش ایہو اے کہ اوہ مصروفیات جہڑیاں معاشی سگرمیاں نُوں فروغ نہیں دیندیاں اوہناں اُتے پابندی لائی جاوے تے معیشت دے پہیے نُوں چلان والے کم نُوں خاص ایس او پیز اُتے عمل کردیاں ہویاں نال لے کے چلیے۔ شبلی فراز دا کہنا سی کہ اسیں توقع کردے آں کہ اپوزیشن تعاون کرے تے سیاسی پوائنٹس سکورنگ دی بجائے حکومت دے نال رَل کے کم کر ے گی۔ اپوزیشن چاہندی اے کہ ملک وچ ایہو جہی صورتحال پیدا ہووے جہدے نال بیروزگاری ودھے تے ہسپتالاں اُتے بھار پوے‘ حکومت اپوزیشن دے نال یاں حکومت دے بغیر پاکستان دی فلاح لئی ہر اوہ اقدامات کرے گی جہدے نال پاکستان دے شہریاں دی حفاظت ہووے‘ اوہناں دے صحت تے روزگار دی حفاظت ہووے۔ اِک سوال دے جواب وچ اوہناں نے کہیا کہ اپوزیشن نے اجلاس وچ رلت نہ کر کے بہت وڈا پیغام دِتا اے‘ ایہناں دی اپنی پارٹی دے ارکان ایہناں توں ناراض نیں‘ اپوزیشن نُوں پاکستانی لوکائی تے اپنی پارٹی دے پیرو کاراں نُوں جواب دینا پوے گا‘ ہر شے اُتے سیاست نہیں کرنی چاہیدی‘ اپوزیشن تعاون کرے تاں جے قومی ایشوز اُتے معاملات مشاورت نال اگے ودھن۔