کرونا وایرس:سرکاری‘غیر سرکاری‘ اکیڈمیاں‘ ٹیوشن سنٹر تے مدرسے اج جمعرات توں بند،  فیکلیٹی سٹاف حاضر ہون دیاں ہدایتاں جاری ۔۔۔٭رویل نیوز٭

لاہور (نمایندا رویل) وفاق تے پنجاب حکومتاں دے فیصلے دی روشنی وچ پڑھیار تے پڑھیارناں نُوں کرونا دی وباء توں بچان لئی لاہور سنے پورے صوبے دے سارے سرکاری تے نجی تعلیمی ادارے بند کر دِتے گئے نیں جد کہ ایہناں تعلیمی اداریاں دے فیکلیٹی سٹاف نُوں تعلیمی اداریاں وچ حاضر ہون دیاں ہدایتاں جاری کر دِتیاں گئیاں نیں۔ حکومتی فیصلے دے مطابق 26 نومبر توں بند ہون والی تعلیمی ادارے 24 دسمبر تک کرونا دے خطریاں دے پیش نظر بند رہن گے جد کہ 25 دسمبر توں 10 جنوری تک تعلیمی اداریاں وچ موسم سرما دیاں چھٹیاں کر دِتیاں جان گیاں۔ جاری نوٹیفکیشن وچ واضح کیتا گیا اے کہ جہڑے تعلیمی ادارے حکومتی فیصلے دے اُلٹ کھلن گے تے اوہناں دے خلاف قانون دے مطابق کارروائی وی عمل وچ لیاندی جاوے گی۔ صوبائی وزیر سکولز ایجوکیشن ڈاکٹر مراد راس نے کہیا اے کہ سارے سرکاری‘ نجی سکولز‘ اکیڈمیاں‘ ٹیوشن سنٹر تے مدرسے اج جمعرات توں بند ہون گے‘ بندش دے دوران تعلیمی ادارے کھولن دے حوالے توں کسے ادارے نُوں کسے وی قسم دی چھوٹ نہیں دِتی جاوے گی‘ حکومتی احکامات دی خلاف ورزی اُتے سخت کارروائی کیتی جاوے گی۔