کرونا وایرس نال تِن ہزار نویں کیسز تے59وفات پا گئے ۔۔۔٭رویل نیوز٭

اسلام آباد (نمایندا رویل) ملک وچ کرونا نال ہور 59 بندے چلانا کر گئے جد کہ ہور 3000 توں ودھ بندیاں وچ وایرس دی تصدیق ہوئی اے جہڑے ساڈھے 4 مہینیاں بعد اِک دن وچ سبھ توں ودھ کیسز نیں۔ پاکستان وچ کرونا دے آنکڑے دَسن والی سائٹ مطابق پھچلے 24 گھنٹیاں دے دوران پورے ملک وچ کرونا دے 41583 ٹیسٹ کیتے گئے جہناں وِچوں 3009 بندیاں وچ کرونا وایرس دی تصدیق ہوئی جد کہ وایرس نال ہور 59 بندے چلانا کر گئے۔ سرکاری پورٹل مطابق پاکستان وچ پچھلے 24 گھنٹیاں دے دوران ساہمنے آن والے کیسز تقریبن ساڈھے 4 مہینیاں دے بعد 1 دن وچ سبھ توں ودھ کیسز نیں‘ ایس توں پہلاں 9 جولائی نُوں ملک وچ اِک دن دے دوران کرونا دے 3359 کیسز رپورٹ ہوئے سن۔ دوجے پاسے سپیکر اسد قیصر دی صدارت ہیٹھ پارلیمانی کمیٹی برائے کرونا دا اجلاس ہویا جہدے وچ اسد عمر‘ بابر اعوان‘ علی محمد خان تے ہور ارکان نے رلت کیتی جد کہ اپوزیشن دا کوئی وی نمایندا شامل نہ ہویا۔ کمیٹی نے مشاورت دے بعد سینیٹ تے قومی اسمبلی دے اجلاس نہ بلاون دا فیصلا کیتا اے۔ سپیکر قومی اسمبلی اسد قیصر نے خیالاں دا اظہار کردیاں ہویاں کہیا کہ اپوزیشن جماعتاں نُوں کرونا ابرے پارلیمانی کمیٹی وچ رلت کرنی چاہیدی سی‘ سانوں کرونا صورتحال نُوں ساہمنے رکھ کے متفقا فیصلے کرنے چاہیدے نیں‘ میں اپوزیشن نال آپ رابطا کیتا تے اجلاس وچ رلت دی دعوت دِتی سی‘ ہُن اپوزیشن دے انکار دی وجھا اوہ آپ دَس سکدے نیں‘ کجھ فیصلے قومی اہمیت دے ہوندے نیں جہناں اُتے سیاست نہیں ہونی چاہیدا۔