کرونا وایر س دی دوجی لہر ،پِچھلے  چَوی گھنٹیاں وچ  چالھی مَوتاں،  تِن ہزار نویں کیسز۔۔۔٭رویل نیوز٭

اسلام آباد (نمایندا رویل) کرونا وایر س دی دوجی لہر دے دوران ملک وچ جمعرات نُوں مسلسل دوجے دن 3 ہزار توں ودھ کیسز رپورٹ ہوئے نیں جد کہ ہور 40 بندے انتقال کر گئے‘ جولائی دے بعد مسلسل دوجے دن کیسز دی اینی وڈی گنتی اے۔ ایس ویلے ملک وچ کرونا وایرس دے مجموعی کیساں دی گنتی 3 لکھ 86 ہزار 198 اے جہدے وِچوں 3 لکھ 34 ہزار 392 صحت یاب ہوئے نیں جہڑے 86 فیصد توں ودھ اے جد کہ مَوتاں دی گنتی 7 ہزار 843 تک پہنچ گئی اے۔ سرکاری آنکڑیاں دے مطابق پچھلے 24 گھنٹیاں وچ ملک وچ کرونا وایرس دے 3 ہزار 306 کیسز تے 40 مَوتاں دا وادھا رپورٹ ہویا جد کہ 1 ہزار 418روگی صحتیاب وی ہوئے جہدے بعد فعال کیسز دی گنتی 43 ہزار 963 تک پہنچ گئی۔ جمعرات 26 نومبر نُوں ملک وچ کرونا وایرس دی صورتحال دے مطابق صوبا سندھ جہڑا ایس وایرس توں سبھ توں ودھ متاثر اے اوتھے 24 گھنٹیاں وچ ہور 1 ہزار 348 کیسز دا وادھا ہویا تے مجموعی گنتی 1 لکھ 67 ہزار 381 تک پہنچ گئی۔ پنجاب وچ پچھلے 24 گھنٹیاں دے دوران کرونا دے 720 نویں کیسز ساہمنے آئے جہدے بعد ایتھے متاثرین دی گنتی 1 لکھ 16 ہزار 506 ہو گئی‘ صوبے وچ وبا ء دی وجھا توں ہور 19 روگی چلانا کر گئے نیں۔ پاکستان وچ پچھلے 24 گھنٹیاں وچ ہور 1418 بندے شفایاب ہوئے نیں۔ دوجے پاسے پورید نیا وچ کرونا وایرس نال متاثرا بندیاں دی گنتی 6 کروڑ توں ودھ گئی اے۔