چھٹیاں دی بجائے تعلیم اُتے توجا دینی چاہیدی اے: وفاقی وزیر تعلیم شفقت محمود ۔۔۔٭رویل نیوز٭

اسلام آباد (نمایندا رویل) وفاقی وزیر تعلیم شفقت محمود نے کہیا اے کہ تعلیمی ادارے بند کرن بارے فیصلا بوجھل دل نال کیتا‘ امید اے جنوری تک سارے تعلیمی ادارے کھل جان گے۔ بچیاں وچ جس طرحاں میری مقبولیت ودھی خُش نہیں آں۔ بچیاں نُوں چھٹیاں دی بجائے تعلیم اُتے توجا دینی چاہیدی اے۔ ایہناں خیالاں دا اظہار اوہناں نے نجی ٹی وی نُوں دِتے گئے اِک انٹرویو وچ کیتا۔ اوہناں نے کہیا کہ سوشل میڈیا اُتے چھٹیاں دے حوالے توں میرے بارے کئی گلاں مزاحیا نیں‘ سوشل میڈیا اُتے بچیاں وچ جس طرحاں میری مقبولیت ودھی اے ایہدے اُتے خُش نہیں آں۔ سوشل میڈیا دا دور اے لوک تفریح نُوں محسوس کردے نیں۔ اوہناں نے کہیا کہ تعلیمی ادارے بند کرن بارے فیصلا بوجھل دل نال کیتا پر تعلیم توں پہلے بچیاں دی صحت پہلی ترجیح اے‘ امید اے جنوری تک سارے تعلیمی ادارے کھُل جان گے۔ بچیاں نُوں چھٹیاں کرن دی بجائے تعلیم اُتے توجا دین دی ضرورت اے‘ چھوٹی دنیا حقیقتاں توں اگاہ نہیں اے‘ ساڈی ذمے داری ہور ودھ جاندی اے‘ اوہناں نے کہیا کہ سوشل میڈیا اُتے بچیاں ولوں دِتیاں جان والیاں دُعاواں چنگیاں لگیاں نیں‘ ملک وچ ٹیلنٹ دی کوئی کمی نہیں اے‘ اسیں تے ہاسٹل وچ وی روندے پِٹدے جاندے سن پر بدقسمتی نال ساڈا تے کوئی امتحان منسوخ نہیں ہویا۔ وزیر تعلیم دا کہنا سی کہ عمران خان دی مقبولیت نُوں کوئی نہیں پہنچ سکدا۔