شہباز شریف نے اپنے بھرا لئی بہت کجھ قربان کیتا جہدی مثال نہیں ملدی: مریم نواز۔۔۔٭رویل نیوز٭

لاہور (نمایندا رویل) مسلم لیگ ن دی مرکزی نائب صدر مریم نواز نے کہیا اے کہ ایہ ممکن نہیں اے کہ شہباز شریف اپنے بھرا دی مخالفت کرن۔ نواز شریف ہمیشا شہباز شریف نال مشورا کردے نیں۔ شہباز شریف ہمیشا مفاہمت دی گل کردے نیں۔ رائے ونڈ وچ سینئر صحافیاں نال گلبات کردیاں ہویاں مسلم لیگ ن دی مرکزی نائب صدر مریم نوز نے کہیا کہ عمران خان اُتے کسے دی نظر نہ پیندی جے شہباز شریف اپنے بھرا نُوں دھوکھا دے دیندے۔ شہباز شریف نے اپنے بھرا لئی بہت کجھ قربان کیتا جہدی مثال نہیں ملدی۔ میری دادی آخری ویلے تک کہندے رہے کہ شہباز شریف نواز شریف دا ساتھ دوو‘ کدی چاچے بھتیجی دی لڑائی دا کہیا جاندا اے کدی دو بیانیاں دا کہیا جاندا اے‘ اسیں اِک آں۔ مریم نواز نے کہیا کہ عمران خان نُوں تے ایس قابل وی نہیں سمجھدے کہ لوک ایہنوں الزام دین‘ ایس معاملے وچ عمران خان خش قسمت نیں کہ لوک الزام وی ایہدے وڈیاں نُوں دیندے نیں۔ مریم نواز نے کہیا کہ ملک انھے راہ اُتے اے جہنوں معیشت نہیں کہنا آندا اوہ ملک کیہ چلاوے گا۔ مریم نواز دا کہنا سی کہ پہلے کہندے سن کہ سندھ سرکار نے مریم نواز دے کمرے اُتے حملا کیتا‘ پر جدوں باجوا صاحب نے انکوایری کیتی تے سبھ ساہمنے آ گیا۔ عمران خان نے کہیا کہ بہنوئی دے دوست دے پلا ٹ اُتے قبضا ہویا۔ کوئی عمران خان نُوں دَسن والا نہیں کہ ایہو جہیاں گلاں ٹی وی اُتے نہیں کردے۔ مریم نواز نے جیل وچ لنگھے دناں بارے کہیا کہ میں اٹک جیل وچ اُلّی والیاں دوائیاں کھان اُتے مجبور سی۔ مریم نواز دا کہنا سی کہ میرا تجزیا اے کہ حالات نہایت خراب نیں۔ حکومت ہور نہیں چل سکدی۔ گیس دا بحران پیدا ہون والا اے‘ بجلی دے بل 1`1 لکھ آ رہے نیں۔ اوہناں نے ہور کہیا کہ ایہ اسرائیل دی گل کر رہے نیں‘ تُسیں کشمیر دا مقدما ہار چکے او۔ پنجاب وچ وی آئی جی اُتے آئی جی بدلے جا رہے نیں۔ ملتان جلسے وچ رلت بارے اوہناں نے کہیا کہ میں ملتان جلسے وچ رلت کراں گی۔ ذاتی رنج و غم بھُل کے عوامی جلسے وچ رلت کراں گی۔ اوہناں نے کہیا کہ میں نواز شریف دی ہدایت اُتے ملتان جلسے وچ رلت کراں گی۔