لوکائی وچ کرونا دا خوف ختم ہو چکیا،مکمل لاک ڈاؤن کیتا جا سکدا اے:معاون خصوصی اطلاعات پنجاب۔۔۔٭رویل نیوز٭

لاہور (نمایندا رویل) معاون خصوصی اطلاعات پنجاب فردوس عاشق اعوان نے کہیا اے کہ لوکائی نے ایس او پیز اُتے عمل نہ کیتا تے لاک ڈاؤن کیتا جا سکدا اے‘ لوکائی وچ کرونا دا خوف ختم ہو چکیا اے‘ ایہدی حوصلا شکنی ہونی چاہیدی اے‘ لوکائی نُوں زبردستی جیلاں وچ نہیں سُٹ سکدے‘ مقدمے قایم نہیں کر سکدے‘ پر حکومت لاک ڈاؤن ورگا سخت ایکشن لوے گی۔ نجی ٹی وی نال گلبا ت کردیاں ہویاں اوہناں نے کہیا کہ سندھ سرکار دیاں اپنیاں ترجیحاں نیں‘ سندھ سرکار نے پہلی لہر وچ سبھ توں پہلے لاک ڈاؤن کیتا‘ ہُن کیہ صورتحال اے ایس توں سارے اگاہ نیں‘ اسیں دوہاں شیواں نُوں لے کے چلنا اے‘ لوکاں دیاں جاناں تے لوکاں دے روزگار دوہاں دا تحفظ کرنا اے۔ حالات دا جایزا لے کے اپنی حکمت عملی نُوں بدلدے رہنا اے۔ اوہناں نے لاک ڈاؤن لان دے سوال اُتے کہیا کہ لوکائی دے اندر بیماری دے حوالے توں خوف ختم ہو چکیا اے‘ ایہدے حوالے توں کوئی وی ذمے داری ادا نہیں کر رہیا‘ ایہ غیر ذمے داری اے ایہدی حوصلا شکنی ہونی چاہیدی اے‘ ٹرانسپورٹ‘ ریسٹورنٹس تے دفتراں وچ جتھے لوکائی دا میل جول اے‘ اوتھے کوئی وی حکومت لوکائی دے نال زبردستی نہیں کر سکدی‘ جیلاں وچ نہیں سُٹ سکدی‘ مقدمے قایم نہیں کر سکدی‘ جے لوکائی نے ذمے داری دا مظاہرا نہ کیتا تے فیر سخت ایکشن لواں گے۔ اپوزیشن سنے جہڑا وی قانون نُوں اپنے ہتھ وچ لوے گا اوہدے خلاف کارروائی کیتی جاوے گی تے قانون دا شکنجا اوہناں دے گلے وچ پایا جاوے گا۔